YESU ayemeriire kuhumuraho haiziba eriri mu Samaliya. Abegeswa be bakaba bagenzere murubuga kugura ebyokulya. Omukazi Yesu ou arukubaza nawe aizire kutaha amaizi. Yamugamba: ‘Mpa amaizi nyweho.’

Kinu kikahuniriza muno omukazi ogu. Omanyire habwaki? Habw’okuba Yesu Muyudaya kandi omukazi Musamaliya. Kandi Abayudaya abakukira obwingi tibagonza Abasamaliya. N’okubaza tibabaza nabo! Baitu Yesu agonza abantu ba buli mulingo. Kale nubwo yagamba: ‘Kakuba nomanya arukukusaba amaizi kunywa, wakumusabire kandi akakuhaire amaizi agarukuleta obwomezi.’

Omukazi agamba ati: ‘Waitu, iziba riraihire kandi tonyina eky’okutahisa. Hati noija kwiha nkaha amaizi ganu agarukuleta obwomezi?’

Yesu amusoborra: ‘Kuba onywa amaizi ag’iziba linu oija kugaruka kukwatwa iroho, baitu amaizi agandakuha nigaletera omuntu kwomera ebiro byoona.’

Omukazi amugamba ati: ‘Waitu, mpa amaizi ganu! Nukwo tindukwija kukwatwa iroho obundi. Kandi tikirukwija kunyetagisa kwija hanu kutaha amaizi omurundi ogundi.’

Omukazi natekereza ngu Yesu nagamba h’amaizi gonyini. Baitu uwe nagamba ha mananu agarukukwata ha Ruhanga naha Bukama bwe. Amananu ganu nigasisana n’amaizi agarukuleta obwomezi. Nigasobora kuha omuntu obwomezi obutahwaho.

Hati Yesu agambira omukazi ati: ‘Genda oyete baro kandi ogaruke.’

Omukazi amugarukamu ati: ‘Tinyina iba nyowe.’

Yesu agamba ati: ‘Ogarukiremu ekihikire. Baitu okatunga abasaija bataano, kandi omusaija owoli nawe hati tali baro.’

Omukazi ahunirra, habw’okuba binu byoona by’amananu. Baitu Yesu akamanya ata ebintu binu? Mali kiri nti Yesu Nuwe Ayanihiziibwe, ayatumirwe Ruhanga, kandi Ruhanga nuwe yamumanyisize binu. Ha bwire bunu, abegeswa ba Yesu bagaruka, kandi bahunirra kusanga Yesu nabaza n’omukazi Omusamaliya.

Kiki ekiturukwega mu binu byona? Nikyoleka ngu Yesu aine embabazi hali abantu ab’enganda zoona. Naitwe nukwo tusemerire kuba. Titusemerire kutekereza ngu abantu abamu babi habw’okuba nibaruga mu ruganda orumu. Yesu nayenda abantu boona bamanye amananu agarukuhikya ha bwomezi obutahwaho. Kandi naitwe tusemerire kukonyera abantu kwega amananu.