OBU barugire omu kisiika eky’ahaiguru, Yesu n’abegeswa be bakagenda omu musiri ogwa Gesesemane. Hanu bakaba baraizireho emirundi nyingi. Yesu hati abagambira ngu baikale nibarora kandi nibasaba. Agendaho akaanya kake, ateeza amaju hansi, ainama, atandika okusaba.

Hanyuma, aija hali abegeswa be nambere akaba abalekere. Nomanya kiki eki baali nibakora? Boona bakaba bagwijagiire! Yesu amara emirundi esatu nabaijukya okwikara bulindaara, baitu obu yagarukaga yabasangaga bagwijagire. ‘Musobora muta kugwijagira mubwire nka bunu?’ Omurundi ogw’ahampero Yesu obu yagarukire akagamba ati: ‘Dora akasumi kamalize kuhika okuhebwayo hati omu mikono y’abanyanzigwa bange.’

Mukanya ako, etoko y’abantu abangi ekaba n’ehulirwa. Dora! Abasaija baizire n’empirima n’ebigo! Kandi bakaba bakwasire ebimuli by’omu’ro kubaha ekyererezi. Obu baizire haihi, omuntu omu aruga hagati y’abantu, airra haihi na Yesu. Amunywegera nkoku orukurora hanu. Omuntu onu niwe Yuda Isekalyota! Habwaki yanywegera Yesu?

Yesu amukaguza: ‘Yuda, nongobeza n’okunywegera?’ Mali okunywegera kaali kokurorraho. Nikamanyisa abasaija aba Yuda yaizire nabo ou Yesu ali. Nahabwekyo abanyanzigwa ba Yesu bamukwata. Kyonka Petero tarukwenda kuleka abanyanzigwa kutwara Yesu atamurwanirire. Asomorayo busitama ye ei akaba aizire nayo, atema omusaija ou akaba ali haihi nawe. Aburwaho kake kumutemaho omutwe kyonka akwasa okutu kw’obulyo. Baitu Yesu akwata okutu kw’omusaija n’okumukiza.

Yesu agambira Petero ati: ‘Empirima yawe ogigarurre omu kiraaro kyayo. Notekereza oti tindukusobora kusaba ise nyowe okumpa hati bamu habamaraika okunkonyera?’ Ego nasobora. Baitu Yesu atasabe Ruhanga kumuha bamaraika habwokuba akaba amanyire obwire bw’abanyanzigwa be bukaba buhikire kumutwara. Nukwo kuleka bakamutwara. Hati katurole kiki ekyabaireho hali Yesu.