ABANTU banu begeswa ba Yesu. Bamworobiire, n’okusigara mu Yerusalemu. Boona obu baba balindiriire hamu, okuhiirra kwijura enju yoona. Nikusisana nk’okuhiirra kw’omuyaga ogw’amaani. Kandi nubwo endiimi z’omu’ro zayolekebwa haiguru ya habuli mutwe gw’omwegeswa. Norora omu’ro haiguru ya buli omu? Binu byoona nibimanyisa ki?

Kinu kyamahano! Yesu agarukireyo omu iguru ali hamu na Ise, kandi naseesa omwoyo gwa Ruhanga ogurukwera ha begeswa be. Omanyire omwoyo gunu eki gubaletera kukora? Boona batandika kubaza mu ndimi ezitakusisana.

Abantu baingi mu Yerusalemu bahurra okuhiirra okwasisaine nk’omuyaga ogw’amaani, kandi baija kurora ekyabaho. Abantu abamu bakaba barugire mu mahanga agandi kwija hanu mu Yerusalemu ha kukuza Pentekoti. Abagenyi banu kabakatunga ekyokuhunirra! Bahurra abageswa nibabaza mu ndimi zabo habikukwata ha bintu ebyamahano Ruhanga ebyakozire.

Abagenyi bakekaguza bati: ‘Abantu banu boona nibaruga Galiraaya. Nibasobora bata kubaza mu ndimi ezirukusisana n’ez’omunsi y’owaitu?’

Petero ayemerra kubasoborra. Mwiraka lihango, agambira abantu nkoku Yesu yaisirwe kandi nkoku Yahwe yamuhumbwire kuruga mubafu. Petero agamba ati: ‘Hati Yesu ali mwiguru ha mukono gw’obulyo ogwa Ruhanga, kandi aseesere omwoyo ogurukwera ogwanihiziibwe. Nikyo muroliire kandi mwahurra ebyamahano binu.’

Petero obu yagambire binu, abantu baingi batunga okusasa mumutima habw’ebyakozerwe hali Yesu. Bakaguza bati: ‘Hati tukole ki?’ Petero abagambira ati: ‘Nikibetagise kuhindura ha ngeso zaanyu kandi mubatizibwe.’ Kale ha kiro ekyo, abantu haihi 3000 babatizibwa kandi bafooka abakurasi ba Yesu.