OMUSIGAZI ow’okurora hanu n’omukwenda Paulo nuwe Timoseo. Timoseo naikara n’abazaire be mu Rusitura. Nyina nibamweta Unike kandi nyinenkuru nayetwa Loi.

Gunu murundi gwa kasatu Paulo okubungira Rusitura. Hahoireho nk’omwaka kuruga Paulo na Barunaba babanza kwija hanu ha rugendo, rw’okutebeza. Kandi hati Paulo agarukire n’omunywani we Sira.

Omanyire Paulo ekyarukugambira Timoseo? Namukaguza ati ‘Wakugondeze kutweteranizaho, nyowe na Sira? Nosobora kutukoonyera mu kutebeza abantu mu biikaro byahara.’

Timoseo yagarukamu: ‘Ego, ningoza kugenda nainywe.’ Hanyuma y’akasumi kake, Timoseo alekaho abazaire be kandi agenda na Paulo na Sira. Baitu tutakegere ha rugendo rwabu, katubanze twetegereze ebibaire nibiba hali Paulo. Hati haihi myaka 17 kuruga Yesu amubonekera mu muhanda ogurukugenda Damasiko.

Ijuka, Paulo akaba nagenda Damasiko okubonabonesa abageswa ba Yesu, baitu hati nawe mwegeswa! Hanyuma, abanyanzigwa abamu batekaniza kwita Paulo habwokuba tibarukugonza ayegese hali Yesu. Baitu abegeswa bakonyera Paulo okutoroka. Bamuteeka mukigega bamusirimu’ra ha kisiika ky’orubuga.

Hanyuma, Paulo agenda Antyokiya kutebeza. Kunu nuho abegeswa ba Yesu baabandize kwetwa Abakristayo. Paulo na Barunaba batumwa kuruga Antyokiya kugenda murugendo rw’okutebeza munsi eza hara. Orubuga orumu oru babungiire rukaba Rusitura, nambere Timoseo akaba naikara.

Hati, hanyuma y’omwaka gumu, Paulo agarukire Rusitura ha rugendo rwakabiri. Timoseo obu yagenzire kunu na Paulo na Sira, omanyire nambere bagenzere? Dora ha maapu, kandi oyege ebiikaro ebimu.

Okubanza, bagenda haihi na Ikonio, hanyuma, murubuga orwakabiri orurukwetwa Antyokiya. Hanyuma, bagenda Teroa, kandi beyongerayo Firipi, Sesalonika, na Beroya. Norora Asene ha maapu? Kunu naho Paulo akatebezayo. Hanyuma, bamara omwaka n’ekicweka nibatebeza mu Kolinso. Hampero, bemerraho kake mu Efeso. Hanyuma bagaruka Kaisaliya kandi bagenda Antyokiya, nambere Paulo akaba naikara.

Nahabwekyo, Timoseo agenda ebikumi n’ebikumi bya mairo nakonyera Paulo kutebeza ‘amakuru amarungi’ kandi n’okutandikaho ebitebe bingi eby’Abakristayo. Obworakura oraba omuhereza wa Ruhanga omwesigwa okusisana nka Timoseo?