MAHANO! Kiki ekibaire hanu? Omwojo onu anyakubyamire hansi ahutaire muno? Dora! Omu h’abasaija abarukuruga munju nuwe Paulo! Norora Timoseo nawe aroho? Omwojo onu ahanukire kuruga omu idirisa?

Mali, ekyo nikyo kyabaireho. Paulo akaba naha abakurasi orubazo hanu mu Teroa. Akaba namanya ngu tarukwija kugaruka kubarora kumara akasumi kakooto habwokuba ekiro ekyakurasireho, akaba nagenda n’eryato. Nubwo yabalize kuhikya mwitumbi.

Omwojo onu arukwetwa Yutuko akaba aikaliire ha idirisa kandi yagwijagira. Akagwa kuruga omu idirisa arya kaina yakasatu! Nikyo orukurorra abantu beralikiriire muno. Obu bakwasire ha mwojo, bakasanga afiire!

Paulo obu yarozire ngu omwojo afiire, yamubyamaho kandi yamufumbatira. Nubwo yagamba ati: ‘Mutatiina. Ali kurungi!’ Kandi mananu nukwo kiri! Kinu kyamahano! Paulo amuhumbwire! Ekitebe kyona kyatunga okusemererwa.

Boona batemba amadaara bagaruka haiguru kandi batunga eky’ekiro. Paulo ayeyongera kubabaliza kuhikya obwire obu bwakiire. Baitu nosobora kugumya ngu, Yutuko taragarukire kugwijagira! Nubwo Paulo, Timoseo n’abo abakaba nagenda nabo bagenda mu ryato. Baitu omanyire ei barukugenda?

Paulo amalirize orugendo rwe orw’akasatu orw’okutebeza, kandi hati ali mu rugendo kugaruka owabu. Omu rugendo runu Paulo akamara emyaka esatu naikara mu rubuga rwa Efeso. Kale amazire akasumi kakoto mu rugendo runu kukira orwakabiri.

Abu barugire Teroa, eryato lyayemerraho Mireto okumara akasumi kake. Habwokuba Efeso teri hara na hanu, Paulo atumaho abagurusi b’ekitebe eki kwija Mireto asobole kubaza nabo omurundi ogurukuherrukayo. Hanyumaho obwire obu bwahikire eryato kugenda, kabakasalirwa muno kurora Paulo nabagendaho!

Hamperu, eryato ligaruka Kaisaliya. Obu Paulo akaba naikara hanu omunju y’omwegeswa Firipo, omurangi Agabo akamuhabura. Agamba ngu Paulo aija kufoorwa omunyankomo obu aragenda Yerusalemu. Kandi mazima kwo, kinu nikyo kyabaireho. Hanyuma, y’okuba mu nkomo emyaka ebiri mu Kaisaliya, Paulo bamwohereza Rumi okusalirwa omusango mu maiso ga Kaisali omulemi w’Abarumi. Katurole ebyabaireho murugendo rwe okugenda Rumi.