OGU ayameriire aho nuwe omukwenda Petero kandi abo abali enyuma ye bamu ha banywani be. Baitu habwaki omusaija onu nainamira Petero? Asemerire kukora ekyo? Nomanya nuwe oha?

Omusaija onu nuwe Koruneryo. Mukuru mwihe ry’Abarumi. Koruneryo tamanyire Petero, Baitu akagambirwa okumusembeza munju ye. Katuzole nkoku kinu kyabaireho.

Abakurasi ab’okubanza aba Yesu bakaba Bayudaaya, baitu Koruneryo tali Muyudaya. Nagonza Ruhanga kandi namusaba, kandi akorra abantu ebintu bingi ebirungi. Mwihangwe limu, maraika akamubonekera kandi yamugamba ati: ‘Ruhanga akusemererirwe kandi naija kugarukamu okusaba kwawe. Tuma abasaija batabarre omusaija arukwetwa Petero. Naikara mu Yoppa mu nju ya Simoni arukwikara haihi n’enyanja.’

Mubwangu Koruneryo yatuma abasaija kuserra Petero. Ekiro ekya garukireho, abasaija banu obu bakaba bali haihi kuhika Yoppa, Petero akaba ali ha rusu oruterekerire orw’enju ya Simoni. Hanu Ruhanga yasukurra Petero orugoye rukooto orwasirimukire kuruga mu iguru. Murugoye halimu ebisoro ebyabuli mulingo. Kusigikirra ha biragiro bya Ruhanga, ebisoro binu tibisemerire kuliibwa, baitu iraka lyagamba: ‘Petero, Imuka oite kandi olye.’

Petero yagarukamu ati: ‘Nangwa! Tinkalyaga ekitasemiire.’ Baitu iraka lyagambira Petero: ‘Otagaruka kweta ebi Ruhanga yayereze ebitasemiire.’ Kinu kyabaho emirundi esatu. Obu Petero akaba nakyecumitiriza binu kiki eki birukumanyisa, abasaija abakaba batumirwe Koruneryo bahika hanju kandi bakaguza Petero nambere ali.

Petero yasirimuka h’amadaara kandi yagamba ati: ‘Ninyowe ou mukuserra. Habwaki mwizire?’ Abasaija banu obu basoboroire ngu maraika akagambira Koruneryo okusaba Petero kwija munjuye, Petero yaikiriza kugenda nabo. Ekiro ekyagarukireho, Petero n’abanywani be baruga hanu bagenda kubungira Koruneryo mu Kaisaliya.

Koruneryo akaba asoroize abanyabuzale n’abanywani be. Petero obu yaizire, Koruneryo yamutangana. Yagwa hansi yainama ha bigere bya Petero, nkoku orukurora hanu. Baitu Petero yagamba ati: ‘Imuka, nanye ndi muntu buntu kaiwe.’ Ego Baibuli neyoleka ngu tikihikire kwinamira kandi okaramya omuntu. Tusemerire kuramya Yahwe wenka.

Petero hati atebeza abo abakaba besoroize. Yagamba: ‘Nindora Ruhanga naikiriza abantu boona abarukugonza kumuhereza.’ Obu aba nakyabaza, Ruhanga atweka omwoyo ogurukwera, kandi abantu batandika kugamba omu ndimi ezitarukusisana. Kinu kikahunihiriza abegeswa abakaba bali Bayudaya abakaba baizire na Petero, habwokuba bakaba nibatekereza ngu Ruhanga nasiima Abayudaya bonka. Kinu kikabegesa ngu Ruhanga tarukutwara abantu b’ihanga limu kuba ab’omuhendo kukira ab’ihanga erindi. Kinu tikiri kintu kirungi buli kiro kukiijukaga?