OMUSAIJA atiize amaju hanu nuwe Sitefano. Mwegeswa wa Yesu omwesigwa. Baitu dora ekikumuhikaho! Abasaija banu nibamuhungurra amabale amakooto. Habwaki banobere Sitefano kuhika hanu, n’okukora ekikorwa kinu ekibi? Katurole.

Ruhanga abaire nakonyera Sitefano okukora ebyamahano ebikuhuniiriza. Binu bitasemeze abasaija banu, nubwo kutandika kumuteza empaka ha bikwatiraine n’amananu agaakaba nayegesa abantu. Baitu Ruhanga akaha Sitefano amagezi maingi, kandi Sitefano ayoleka abantu banu oku babaire nibegesa eby’ebisuba. Kinu kibaletera kweyongera kubihirwa. Nukwo bamukwata, kandi beeta abantu bamubazeho eby’ebisuba.

Nyakatagara omukuru akaguza Sitefano ati: ‘Binu ni mananu?’ Sitefano yagarukamu naha orubazo orurungi kuruga mu Baibuli. Hakumalirra kwarwo, yagamba h’abasaija ababi nkoku bayangire abarangi ba Yahwe abaira. Abagamba ati: ‘Nimusisana abasaija abo. Mukaita omuhereza wa Ruhanga Yesu, kandi timworobire ebiragiro bya Ruhanga.’

Kinu kiretera abakuru b’ediini banu kubihirwa muno! Banena amaino gabo n’ekiniga. Kyonka Sitefano yaimukya omutwe gwe kandi yagamba ati: ‘Dora!, nindora Yesu ayemerire ha rubaju rw’obulyo bwa Ruhanga omu iguru.’ Obu bahuliire kinu, abasaija banu bateka emikono yabo h’amatu gabo kandi bagwera Sitefano. Bamukwata kandi bamukurra bamutwara aheru y’orubuga.

Kunu beihaho eminagiro yabo kandi bagikwasa omusigazi Saulo kugirinda. Norora Saulo? Nubwo abasaija abamu batandika kutera Sitefano amabale. Sitefano ateza amaju, nk’oku orukurora, kandi asaba Ruhanga: ‘Yahwe otabajunana ekintu ekibi kinu.’ Amanyire ngu abamu halibo bahabisibwe abakuru b’ediini. Hanyuma ya kinu Sitefano afa.

Omuntu kakuba akukora ekibi, olengaho naiwe kumukora kubi, rundi osaba Ruhanga amukole kubi? Sitefano na Yesu tikuli nukwo bakozere. Bakagirra embabazi abo ababakozire kubi. Katulengeho kuhondera eky’okurorraho kyabo.