DORA emiti egyo eraihire, ebimuli ebirungi, hamu n’ensozi eziraihire muno. Hanu tihali harungi muno? Dora omwana nk’oku arukulisiza engabi omungaro ze. Kandi dora oku entale n’embarasi zoona zemerire omu bunyansi. Tiwakugondeze kwikara omunju enyakuli omukiikaro nka kinu?

Ruhanga nakugondeza kuba mwomezi ebiro byona omurugonjo omunsi. Kandi tarukukugondeza obe n’obusaasi hamu n’okucenywa okuli mu bantu ebiro binu. Kinu nikyo Baibuli erukunihiza hali abo boona abalikara omu rugonjo oruhyaka: ‘Ruhanga aliba nabo tihalibaho kufa rundi kucura rundi kusaasa. Ebya ira biraba bihoireho.’

Yesu aligumya ngu ebintu binu ebirungi nibibaho. Nomanya ddi? Ego, obu aliba amazireho obubi hamu n’abantu ababi. Ijuka, Yesu obu akaba ali omunsi, akakiza oburwaire bw’abantu obwa buli mulingo kandi yahumbuura abantu kuruga mu bafu. Yesu akakora binu okwoleka kiki ekyalikora omunsi yoona obu alifookere Omukama w’obukama bwa Ruhanga.

Kale cumitirizaho nkoku obwomezi omu rugonjo oruhyaka omunsi buliba! Yesu hamu nabo abalikoma, baliremera omu iguru. Abalemi banu balifaaho muno ha buli muntu wena aliba omunsi, n’okugumya ngu boona bali kurungi. Leka turole kiki ekitusemerire okukora okugumya ngu Ruhanga alituha obwomezi obutahwaho omu rugonjo oruhyaka.