Nk’omu kwezi okwakana omu mwaka 30 C.E., Yesu akagenda Yerusalemu. Abantu baingi bakaba baizire omu rubuga kujaguza Okuhingurwaho. Omu kasumi k’Okuhingurwaho, bahongaga ebisoro ha yekaru. Abantu abamu baijaga n’ebisoro, baitu abandi babiguraga Yerusalemu.

Yesu obuyagenzere omu yekaru, akasanga abantu nibatundiramu ebisoro. Bakaba nibekorra sente omu nju ya Yahwe ey’okuramizaamu! Yesu akakora ki? Akakozesa omuguha nka kibboko kuturukya entaama hamu n’ente kuruga omu yekaru. Yesu akajumika emeeza zaabo ezibahingisizahoga sente  kandi sente zoona zaseseka. Yesu akagambira abo abakaba nibatunda amaiba ati: ‘Ebintu binu mubiihe hanu! Enju ya Ise nyowe mutagifoora y’okusuburramu!’

Abantu abakaba bali ha yekaru bakahunirra habw’ekintu Yesu yakozere. Abahondezi be bakaijuka obunabbi oburukukwata hali Masiya oburukugamba ngu: ‘Ihali eryenju yawe lirindya.’

Hanyuma y’akasumi, omu mwaka 33 C.E., Yesu akongera yasemeza yekaru omurundi ogwakabiri. Akaba atarukwikiriza omuntu wena kuzaanisa enju ya Ise.