Omukwenda Yohana obwakaba akwatirwe ha kizinga kya Patimo, Yesu akamwoleka okwolekwa okw’emirundi 16, rundi ebisisani by’ebintu ebikaba nibigenda kubaho omu busumi bw’omu maiso. Okwolekwa kunu kwona kukaba nikwoleka omulingo ibara lya Yahwe likaba nirigenda kwezebwa, omulingo Obukama bwa Ruhanga bukaba nibugenda kwija, n’omulingo ebintu Yahwe agonza bikaba nibigenda kukorwa omu nsi nk’oku bikorwa omu iguru.

Omu kwolekwa okumu, Yohana akarora Yahwe aikaliire omu ntebe ye ey’ekitiinisa omu iguru, ayetoroirwe abakuru 24 abakaba bajwaire engoye ezirukwera kandi bajwaire ekondo z’ezabu. Emirabyo n’enkuba bikaba nibiteera kuruga ha ntebe ya Yahwe. Abakuru 24 bakaba nibainama kuha Yahwe ekitiinisa n’okumuramya. Omu kwolekwa okundi, Yohana akarora ekitebe kingi kirumu abantu kuruga omu mahanga goona, enganda, n’endimi nikiramya Yahwe. Omwana gw’Entaama, ogu nuwe Yesu Kristo, akaba naliisa ekitebe kinu ekingi, kandi nakitwara kugenda kunywa amaizi ag’obwomeezi. Omu kwolekwa okundi, Yohana akarora Yesu atandikire kulema omu iguru kandi nalema hamu n’abakuru 24. Omu kwolekwa okundi, Yohana akarora Yesu narwanisa ekijoka, ekirukumanyisa Setani, hamu n’abamaraika be ababi. Yesu akababinga omu iguru yabanaga omu nsi.

 Yohana akongera yarora ekisisani ekirungi eky’Omwana gw’Entaama hamu n’abantu 144,000 bemeriire ha Rusozi Sayuni. Kandi akarora maraika nahurruka omu mwanya, nayetoroora ensi, n’agambira abantu kutiina Ruhanga n’okumuha ekitiinisa.

Omu kwolekwa okundi, Yohana akarora obulemu bwa Haramagedoni butandikire. Omu bulemu obu, Yesu n’ihe lye bakasingura Setani n’abantu be boona. Omu kwolekwa okurukumalirra, Yohana akarora haizireho obumu omu iguru n’omu nsi. Setani n’oruzaro rwe bahwerekerezibwe. Kandi akarora buli muntu omu iguru n’omu nsi nayeza ibara lya Yahwe kandi naramya uwe wenka.