Musa na Aroni bakatwara obutumwa bunu hali Faraho bamugambira bati: ‘Obw’otaleke abantu bange kugenda, ninyija kukusindikira emizinga y’ensohera zijule buli hamu hoona.’ Emizinga y’ensohera ekatahirra amaju g’abantu boona aba Misiri, abaguuda n’abanaku. Ensi yoona ekaijura ensohera. Baitu ensohera zinu zitagende Goseni, nambere Abaisareri baikaraga. Kuruga ha muhito gunu ogwakana, emihito endi yoona eyahondiireho ekabonabonesa Abamisiri bonka. Faraho akesengereza nagamba ati: ‘Wesengereze Yahwe aiheho ensohera zinu zoona, abantu baawe bagende.’ Baitu Yahwe obu yamazireho ensohera zinu, Faraho akehindura yayanga kubaleka kugenda. Baitu mali Faraho yakuhikire ahinduka?

Yahwe akagamba ati: ‘Faraho obwaraaba atalekere abantu bange kugenda, ebisoro byona eby’Abamisiri nibiija kurwara bife.’ Ekiro ekyahondiireho, ebisoro bikatandika kufa. Baitu ebisoro by’Abaisareri bitafe. Baitu nabwo, Faraho akagumanganiza omutima gwe yayanga kuleka Abaisareri kugenda.

Yahwe akagambira Musa kugaruka hali Faraho amiise iju omu mwanya. Iju linu likafooka cuucu eyaijwire omu mwanya kandi eyagwire hali Abamisiri boona. Ecuucu enu ekarwaza abantu ba Misiri hamu n’ebisoro ebiziimba ebirukuruma muno. Baitu nabwo, Faraho akanga kuleka Abaisareri kugenda.

Yahwe akongera yatuma Musa kugarukayo hali Faraho amugambire ngu: ‘Na hati okyayangire kuleka abantu bange kugenda? Nyenkya nihaija kugwa enjura  n’orubaale rw’amaani.’ Ekiro ekyahondiireho, Yahwe akanaga orubaale, enkuba ekatera, kandi omurro gukagwa kuruga omu iguru. Likaba ihunga ly’amaani muno erikaba litakabahoga omu ihanga lya Misiri. Emiti yoona n’ebimera byona bikahwerekerra oihireho eby’omu Goseni nambere Abaisareri baikaraga. Faraho akagamba ati: ‘Wesengereze Yahwe kutwihaho omuhito gunu! Nukwo hanyuma mugende.’ Baitu enjura n’orubaale obu byakiire biti, Faraho akongera yayanga.

Kinu obu kyabaireho, Musa akagamba ati: ‘Hati enzige niziija kulya ebimera byona ebisigaireho ebitahwerekereziibwe orubale.’ Obukaikuru n’obukaikuru bw’enzige zikaija zalya buli kikoora kyona ekikaba kisigaire ha muti n’omu musiri. Faraho akongera yayesengereza ati: ‘Wesengereze Yahwe kutwihaho enzige zinu.’ Baitu nabwo, enzige obu zagenzere, aho n’aho Faraho akagumanganiza omutima gwe.

Yahwe akagambira Musa ati: ‘Gorra omukono gwawe haiguru omu mwanya.’ Aho n’aho, omwirima gw’amaani gukakwata. Omwirima gukamara ebiro bisatu gukwasire, Abamisiri bakaba batarukusobora kurora ekintu kyona rundi omuntu wena. Abaisareri bonka nubo bakaba baine ekyererezi omu maju gabo.

Faraho akagambira Musa ati: ‘Genda n’abantu bawe. Oihireho ebisoro mubireke hanu.’ Musa akagamba: ‘Ebisoro byaitu tusemeriire kubitwara habwokuba nitugenda kubihongera Ruhanga waitu.’ Faraho akabihirwa muno. Akatokera haiguru muno yagamba ati: ‘Muruge hanu mugende! Obu ndigaruka kubarora hanu, ndibaita.’