Musa obwakaba ali ha Rusozi Sinai, Yahwe akamuragira kwombeka eheema ey’embaganiza nambere Abaisareri bararamizaaga Yahwe. Eheema enu baali b’okugihimba buli murundi obu babaga nibagenda.

Yahwe akagamba ati: ‘Gambira abantu baheyo kyona ekibarukusobora nukwo eheema eyombekwe.’ Abaisareri bakahayo ezaabu, efeeza, omulinga, amabale ag’omuhendo, enkwanzi hamu n’ebikomo eby’omuhendo. Kandi bakahayo engoye ezirukugajuka, ekitani ekisemiire, ebisaatu by’ebisoro, hamu n’ebintu ebindi bingi. Bakahayo ebintu biingi muno kandi kyaletera na Musa kubagambira ngu: ‘Binu nibimara! Mutongera kuleeta.’

Abasaija n’abakazi bakakozesa obukugu bwabo kwombeka eheema. Yahwe akabaha amagezi ag’okubakonyera kukora omulimo gunu. Abamu bakakozesa ehuuzi kuruka ebitaani kandi baabisemeza nukwo bizooke kurungi. Abandi bakakora ha mabaale, ezaabu, kandi abandi bakora emirimo y’okubaija.

Abantu bakombeka eheema omu mulingo Yahwe akaba n’agonza. Bakakora orutimbi orurungi muno baruta omu heema kwahukaniza ekicweka Ekirukwera hali Ekirukwera Muno. Omu kicweka Ekirukwera Muno hakabamu esanduuko y’endagaano ey’ekaba ekozerwe omu muti gw’omusisa n’ezaabu. Omu kicweka Ekirukwera hakaba harumu emeeza, ekikondo ky’etaara ekikozerwe omu zaabu enungi, hamu n’ekyoto eky’okwoterraho emyamirro. Omu zigati hakaba harumu orwoho [ebafu] rw’omulinga hamu n’ekyoto kikooto muno. Esanduuko y’ekiragaano ekaba eri y’okwijukya Abaisareri ngu bakaba baraganiize kworobera Yahwe.  Omanyire ekiragaano nikyo kiki? Nukwo kuraganiza omuntu omu mulingo ogw’embaganiza.

Yahwe akakoma Aroni n’abatabani be kukora nk’abanyakatagara ha heema. Bakaba basemeriire kugirolerra kurungi n’okuhonga ebihongwa hali Yahwe. Aroni nyakatagara omukuru, nuwe wenka ayaikirizibwaga kutaaha omu Kicweka Ekirukwera Muno. Yatahayoga omurundi gumu buli mwaka okuhongerayo ekihongwa habw’ebibi bye, ebibi eby’eka ye, hamu n’ebibi by’ihanga lyona erya Isareri.

Abaisareri bakamara kwombeka heema enu harabireho omwaka gumu barugire Misiri. Kuruga obu bakatunga ekiikaro nambere bakaba nibasobora kuramiza.

Yahwe akoleka ngu akaba asimire eheema enu kandi yaleta ekicu haiguru yayo. Ekicu obu kyaikaraga haiguru y’eheema, Abaisareri bakaba basemeriire kwikara nambere bali. Baitu ekicu obu kyarugahoga, kinu kyamanyisaga ngu obwire bw’okufuruka buhikire. Bapangurraga eheema kandi bakuratiraga ekicu.