Yonasani mutabani wa Saulo omuzigaijo akaba murwani omumanzi. Daudi akagamba ngu Yonasani akaba narahuka kukira empungu kandi aine amaani kukira entale. Kiro kimu Yonasani akarora abaserikale b’Abafirisiti 20 ha kasozi. Akagambira omusaija ayamukwatiraga eby’okurwanisa bye ati: ‘Yahwe obwaratuha akokurorraho nubwo turabarwanisa. Abafirisiti obu baratweta kutemba eruguru ha rusozi, tumanye ngu twine kubarwanisa.’ Abafirisiti bakatokera haiguru bagamba bati: ‘Mwije turwane!’ Abasaija banu ababiri bakatemba haiguru ha kasozi barwanisa Abafirisiti babasingura.

Kusigikirra nk’oku Yonasani akaba ali mutabani wa Saulo omuzigaijo, nuwe akaba asemeriire kuba mukama arukuhonderaho. Baitu Yonasani n’obwaraaba yali akimanyire ngu Yahwe akakoma Daudi kuba mukama wa  Isareri arukuhonderaho, atakwatwe ihali. Yonasani na Daudi bakafooka banywani nfe na nfe. Buli omu akaraganiza mugenzi we kumurwanirra n’okumulinda. Yonasani akaha Daudi ekooti ye, empirima, obuta, hamu n’omweko gwe kumwoleka ngu akaba munywani we mali.

Daudi obwakaba nairuka Saulo, Yonasani akagenda hali Daudi yamugambira ati: ‘Ogume, kandi obe mumanzi. Yahwe akukomere kuba omukama. Kandi ise nyowe nauwe akimanyire.’ Wakugondeze kuba n’omunywani omurungi nka Yonasani?

Emirundi nyingi, Yonasani akata obwomeezi bwe omu kabi kusobora kukonyera munywani we. Akaba akimanyire ngu Omukama Saulo akaba n’agonza kwita Daudi, akagambira ise ati: ‘Noija kuba osisire kwita Daudi; busaho kibi kyona ekyakozere.’ Baitu Saulo akakwatirwa Yonasani ekiniga. Hanyuma y’emyaka nke, Saulo na Yonasani bakafera hamu omu bulemu.

Yonasani obuyafiire, Daudi akaserra mutabani wa Yonasani arukwetwa Mefibosesi. Obu yamuzoire, akamugambira ati: ‘Kusigikirra nk’oku so yali munywani wange nfe na nfe, ninyija kukurolerra obwomeezi bwawe bwona. Noija kwikaraga omu kikaali kyange kandi oliire ha meeza yange.’ Daudi atebwe munywani we Yonasani.