ISOMO 56
Yosiya Yagonzaga Muno Ebiragiro bya Ruhanga
Yosiya akafooka mukama wa Isareri obwakaba aine emyaka munaana. Omu kasumi nambere Yosiya yafokiire mukama, abantu baramyaga ebisisani kandi bakoraga eby’oburogo. Yosiya obu yahikize emyaka 16, akalengaho kwega omulingo oguhikire ogw’okuramya Yahwe. Obu yahikize emyaka 20, akatandika kuhwerekereza ebisisani hamu n’ebyoto bya baruhanga ab’ebisuba. Kandi Yosiya obu yahikize emyaka 26 akakora entekaniza ez’okusemeza yekaru ya Yahwe.
Hirikiya nyakatagara omukuru, akasanga omuzingo gw’ebiragiro bya Yahwe omu yekaru—kandi nigusobora kuba gwali muzingo ogwahandiikirwe Musa. Omuhandiiki w’omukama arukwetwa Safani akaletera omukama Yosiya omuzingo gunu kandi yatandika kusoma ebiragiro binu omu iraka erikuhulirwa. Yosiya akahuliiriza kandi yarora nk’oku abantu baali bahugukire baruga ha biragiro bya Ruhanga kumara emyaka nyingi. Omukama Yosiya akagambira Hirikiya nyakatagara omukuru ati: ‘Yahwe atubihiriirwe muno. Genda obaze nauwe kandi n’aija kutugambira ekitusemeriire kukora.’ Yahwe akabagambira eky’okukora kuraba omu nabbi omukazi arukweta Hulida, ati: ‘Abantu ba Yuda bandugireho. Nibaija kufubirwa baitu hatali omu bulemi bw’Omukama Yosiya habwokuba Yosiya ayolekere okwebundaaza.’
Omukama Yosiya obu yahuliire ebigambo binu, akagenda ha yekaru kandi yayeta abantu boona aba Yuda. Hanyuma yabasomera Ebiragiro bya Yahwe omu iraka erikuhulirwa. Yosiya hamu n’abantu boona bakaraganiza ngu nibaija kuhondera Ebiragiro bya Yahwe n’emitima yabo yoona.
Ihanga lya Yuda likaba limazire emyaka nyingi litakujaguza ekiro ky’Okuhingurwaho. Baitu Yosiya obuyabasomiire Ebiragiro bya Yahwe ebikaba nibyoleka ngu basemeriire kujaguza ekiro kinu buli mwaka, akabagambira ati: ‘Nitwija kujaguza ekiro ky’Okuhingurwaho.’ Yosiya akakora entekaniza ey’okuhonga ebihongwa bingi kandi yaserra abazini ab’okuzina ha yekaru. Abantu ba Yuda bakajaguza Okuhingurwaho hamu n’Omukoro ogw’Emigati Etatumbisiibwe kumara ebiro musanju. Kandi omu Isareri yoona, hakaba hatakabahoga Okuhingurwaho okurukwingana n’oku kuruga omu busumi bwa Samuiri. Yosiya mali yagonzaga muno Ebiragiro bya Ruhanga. Iwe ogonza kwega hali Yahwe?
“Ekigambo kyawe niyo etabaza hali ebigere byange, kandi omusana hali omuhanda gwange.”—Zabuli 119:105
Nosobora Kugonza na Binu;
MWEGESE ABAANA BAANYU
Yosiya Akaba n’Abanywani Abarungi
Baibuli etugambira ngu Yosiya kitamwanguhire kukora ekihikire. Rora omulingo minywani ye bamukonyire.
