Okufa tikusisana n’obwomezi. Okufa nikusisana nk’okugwijagira okw’amani. (Yohana 11:11-14) Abafu tibasobora kuhurra, kurora, kubaza, rundi kutekereza ekintu kyoona. (Omugambizi 9:5, 10) Edini y’ebisuba eyegesa ngu abafu bagenda mu nsi y’emwoyo kwikarayo n’abaisenkuru bo. Ekyo tinikyo Baibuli eyegesa.

Abo abafire tibasobora kutuyamba rundi kuturumya. Kya buli kiro abantu okukora emikoro n’okuhayo ebihongwa okusemeza abo abafire. Kinu kibihiza Ruhanga habwokuba nikisagika ekisuba kya Setani. Tikisobora kusemeza abafu habwokuba tibaine bwomezi. Titwine kutiina rundi kuramya abafu. Twine kuramya Ruhanga wenka.​—Matayo 4:10.

Abafu baliba bomezi omurundi ogundi. Yahwe alisisimura abafu okuba bomezi omu Rugonjo rwe omu nsi. Ekyo nikija kubaho mu biro eby’omu maiso. (Yohana 5:28, 29; Engeso ezabakwenda 24:15) Ruhanga n’asobora kusisimura abo boona abafiire nkoku osisimura omuntu kuruga mu turo.​—Marako 5:22, 23, 41, 42.

Ekitekerezo ngu titufa kiba kisuba ekikuraranganizibwa Setani Diabolo. Setani na masitani ge baletera abantu kutekereza ngu emyoyo gy’abafu gikyayomire kandi ngu niyo giturwaza kandi niyo gituletera emitalibano endi. Setani abihabiha abantu obundi kuraba mu biroto n’omu kwolekebwa. Yahwe ajumirra muno abo abalengaho kubaza na bafu.​—Ekyebiragiro 18:10-12.