Obw’okuba n’ogonza kuba munywani wa Ruhanga, oine kuba mu dini eya Ruhanga arukusiima. Yesu akagamba ngu “abaramya amazima” obu bararamizamuga Ruhanga ‘n’amazima.’ (Yohana 4:23, 24) Haroho omuhanda gumu gw’onka oguhikire ogw’okuramizamu Ruhanga. (Abefeso 4:4-6) Edini y’amazima eyebembera kuhikya mu bwomezi obutahwaho, kandi edini ey’ebisuba etwara mu kuhwerekerra.​—Matayo 7:13, 14.

N’osobora kumanya edini y’amazima kuba oyetegereza abantu abagirimu. Yahwe nkoku ali murungi, naabo abamuramya baine kuba bantu barungi. Nk’oku omuti gw’omucunguwa omurungi gwaana emicunguwa emirungi, nukwo n’edini y’amazima ezaala abantu abakukirayo oburungi.​—Matayo 7:15-20.

Abanywani ba Yahwe batamu Baibuli ekitinisa. Bakimanyire ngu Baibuli ekaruga hali Ruhanga. Bakorra ha magezi geha mu bwomezi bwabo, okujangurra emitalibano yabo, n’okubayamba okwega hali Ruhanga. (2 Timoseo 3:16) Balengaho kuta mu nkora ebi baba nibatebeza.

 Abanywani ba Yahwe bagonzagana. Yesu akoleka okugonza kwe hali abantu n’abegesa ebirukukwata hali Ruhanga, n’akiza abarwaire. Naabo abali mu dini y’amazima boleka okugonza hali abandi. Okusisana na Yesu, tibagaya abanaku rundi ab’enganda ezindi. Yesu akagamba ngu abantu balimanya abegeswa be ha kugonzangana okuboleka bonka na bonka.​—Yohana 13:35.

Abanywani ba Ruhanga baha ekitinisa ibara lye, Yahwe. Kakuba omuntu ayanga kukozesa ibara lyawe nosobora kumweta munywani wawe mali? Nangwa! Obu tuba n’omunywani, tukozesa ibara lye, kandi tumubazaho ebirungi hali abandi. N’abo abarukugonza kuba banywani ba Ruhanga baine kukozesa ibara lye n’okugambira abandi ebirukumukwataho. Yahwe nayenda tukole nikyo kimu.​—Matayo 6:9; Abarumi 10:13, 14.

Okusisana na Yesu, abanywani ba Ruhanga begesa abantu ha Bukama bwa Ruhanga. Obukama bwa Ruhanga nibwo bulemi obw’omw’iguru obulifoora ensi enu Orugonjo rwa Ruhanga. Abanywani ba Ruhanga bagabana n’abandi ha makuru ganu amarungi agarukukwata ha Bukama bwa Ruhanga.​—Matayo 24:14.

Bakaiso ba Yahwe balengaho kuba banywani ba Ruhanga. Batamu ekitinisa Baibuli kandi baine okugonzangana bonka na bonka. Bakozesa kandi batamu ekitinisa ibara lya Ruhanga, kandi begesa abandi hali Obukama bwa Ruhanga. Bakaiso ba Yahwe bali mu dini ey’amazima omu nsi biro binu.