Setani n’amasitani ge tibarukugonza ohereze Ruhanga. Nibagonza kuhindura abantu boona baleeke kuhereza Ruhanga. Kinu nibalengaho kukikora bata? Omuhanda gumu nukwo kuraba mu dini y’ebisuba. (2 Abakolinso 11:13-15) Edini eba y’ebisuba bweba etarukwegesa amazima okuruga mu Baibuli. Edini y’ebisuba nesisana nk’esente ezebikwangara​—nizisisana sente mali baitu tizine mugaso. Zisobora n’okukuletera emitalibano gy’amani.

Ebisuba by’edini tibisobora kusemeza Yahwe, Ruhanga ow’amazima. Yesu obwakaba ali mu nsi, hakaba haroho ekitebe ky’edini eky’ayenzire kumwita. Bakatekereza ngu omulingo gwabo ogw’okuramya gwali nugwo guhikire. Bakagamba: ‘Twine isitwe omu, nuwe Ruhanga.’ Yesu akakikiriza? Nangwa! Akabagamba ngu: “Muli ba isinywe Setani.” (Yohana 8:41, 44) Biro binu abantu baingi nibatekereza ngu nibaramya Ruhanga, baitu mali nibahereza Setani na masitani ge!​—1 Abakolinso 10:20.

 Nk’omuti ogujunzire gwana ebyana bibi, n’edini y’ebisuba ebamu abantu abakora ebibi. Ensi ijwiremu emitalibano nyingi muno habwokuba abantu nibakora ebintu bibi bingi. Haroho obusihani, okurwana, okwiba, okutuntuzibwa, obwisi n’okuhamba abakazi. Baingi abarukukora ebintu binu baine edini, baitu edini yabu tebatamu mani kukora ebirungi. Tibasobora kuba banywani ba Ruhanga kwihaho balekere kukora ebintu ebibi.​—Matayo 7:17, 18.

Edini y’ebisuba eyegesa abantu kusaba ebisisani ebisarwirwe. Ruhanga atanga kusaba ebisisani ebisarwirwe. Kinu ky’amagezi. Wakugondeze omuntu obutabaza naiwe, baitu agende atandike kubaza n’ekisisani kyawe? Omuntu ogu mazima n’asobora kuba munywani wawe? Tasobora. Yahwe nayenda abantu babaze nawe hatali ebisisani ebibumbirwe rundi ebisiigire ebitaine obwomezi.​—Okuruga 20:4, 5.

Edini y’ebisuba eyegesa ngu kirungi okwita abantu mu bwire bw’obulemu. Yesu akagamba ngu abanywani ba Ruhanga baine okugonzangana. Titusobora kwita abantu abaturukugonza. (Yohana 13:35) Kibi muno hali itwe n’okwita abantu ababi. Abanyanzigwa ba Yesu obu baizire kumukwata, ataikirize abegeswa be kumurwanirra nukwo bamukize.​—Matayo 26:51, 52.

Edini y’ebisuba eyegesa ngu abantu boona balyokebwa mu murro ogutarara. Baitu Baibuli eyegesa ngu ekibi nikyo kireta okufa. (Abarumi 6:23) Yahwe Ruhanga w’okugonza. Ky’amananu Ruhanga ow’okugonza n’asobora kubonesabonesa abantu ebiro byoona mu murro? Tasobora! Omu Rugonjo rwa Ruhanga halibayo edini emu yonka, egyo yonka Yahwe eyarukusiima. (Okusuku’rwa 15:4) Edini zoona ezine emisingi gyazo mu bisuba bya Setani ziriba zihoireho.