Kuruga omu buto bwe, Samuiri yaikaraga kandi n’ahereza omu heema erukwera, nambere abantu bagendaga kuramya Yahwe. Omanyire omulingo Samuiri yatandikire kwikara omu heema erukwera? Katubanze tusome hali Haana, nyina Samuiri.

Kumara akasumi, Haana akaba atarukusobora kuzaara gonze yali nagonza muno omwana. Akasaba Yahwe amukonyere azaale. Akaraganiza Yahwe ngu obw’alizaara omwana ow’obwoojo, alimuhayo aheereze omu heema ya Yahwe ebiro bye byoona. Yahwe akamuhu’ra, yazaara omwana ow’obwoojo. Akamuruka Samuiri. Nkoku Haana akaba yeragire, Samuiri obu yahikize emyaka nk’esaatu rundi ena akamutwara omu heema kuheereza Ruhanga.

Eri nuwe yaali nyakatagara omukuru omu heema. Batabani be ababiri nabo baherezaaga omu heema. Nkoku kiri nti eheema yaali nju ya Yahwe ey’okuramizaamu, abantu abaikarayoga baali baine kuba n’engeso nnungi. Baitu batabani ba Eri bakorrayoga ebintu ebibi muno. Samuiri yabiroraga. Nauwe akakora nkoku batabani ba Eri baali nibakora?— Nangwa, akasigara nakora ebihikire nkoku bazaire be b’amwegeseze.

Noteekereza Eri y’akukolire ki batabani be?— Yakubaire n’abafubira. Tiyakubaikirize kugaruka kuheereza omu heema ya Yahwe. Baitu eki, Eri atakikole. Nahabwekyo Yahwe akamubiihi’rwa hamu n’abatabani be, yacwamu kubafubira.

Kiro kimu Samuiri obu akaba abyamire akahu’ra omuntu n’amweta: ‘Samuiri!’ Akaimuka yagenda nambere Eri akaba ali baitu Eri yamugamba: ‘Tinkakwesire.’ Kinu kikabaho emirundi endi ebiri. Ha murundi ogw’akasatu, Eri akagamba Samuiri ngu obu yakugarukire kuhu’ra iraaka nirimweta agambe: ‘Baza Yahwe, ninkuhu’ra.’ Samuiri nukwo atyo yakozere.  Yahwe akagamba Samuiri: ‘Gambira Eri ngu ninyija kumufubira habw’ebintu ebibi uwe n’abatabani be ebi bakozere.’ Noteekereza kikaba kyanguhire Samuiri kugambira Eri ebigambo ebyo?— Nangwa, kitabe kyangu. Baitu gonze Samuiri yaali n’atiina, akakora nkoku Yahwe akaba amugambire. Yahwe ebi yagambire bikahikirira. Batabani ba Eri bakaitwa kandi na Eri yafa.

Samuiri kyokuroraho kirungi. Gonze yaroraga abantu nibakora ebintu ebibi, uwe yakoraga ebirungi. Iwe orakora ota? Orakora ebirungi nka Samuiri? Obworakora otyo, noija kusemeza Yahwe n’abazaire baawe.