Ekimu ha bintu ebitusaliza muno nukwo kurora omunyabuzaale rundi omunywani waitu nfe na nfe kubingwa omu kitebe habw’okwanga kwegarukamu ekibi kye. Omulingo twikirizaamu oburagirizi obuli omu Baibuli nikisobora kwoleka okugonza oku twine hali Yahwe n’obwesigwa bwaitu omu ntekaniza ei ataireho. * wetegereze ebikaguzo ebiijaho habw’ensonga enu.

Tusemeriire kutwaza tuta omuntu anyakubingirwe omu kitebe? Baibuli n’ekutererra “okutaterana hamu nomuntu wena anyakweta mwene wanyu obwaba ali musihani, rundi omwegombi, rundi aramya ebisisani, rundi omujumi, rundi omutamizi, rundi omuhogozi: anyakusisana ati nobukwakuba okulya nauwe.” (1 Abakolinso 5:11) Kandi omuntu wena ‘ataikara omu kwegesa kwa Kristo,’ Baibuli egamba: “mutalimuiriza omunju yanyu, kunu mutalimuramukya: baitu anyakumuramukya buli ateraine omu ngesoze ezibihire.” (2 Yohana 9-11) Titubaza na muntu anyakubingirwe ha bintu eby’omwoyo rundi kuba n’enkoragana yoona nauwe. Watchtower eya Sebutemba 15, 1981, rupapura 25, egamba: “okuramukya kwonka nikusobora kukurugirramu kutandika kubaza n’omuntu nk’ogu n’okunywana. Mali twakugondeze kutandikaho omuganjano n’omuntu anyakubingirwe?”

Mali nikyetagisa kwetantarra kimu omuntu abingirwe omu kitebe? Ego, habw’ensonga nyingi. Ensonga ey’okubanza, kyoleka ngu tuli besigwa hali Yahwe n’Ekigambo kye. Tworobera Yahwe hatali obu kirikuba kyorobere kwonka baitu n’obu kirukuba kigumangaine. Okugonza kwaitu hali Yahwe kutuletera kworobera ebiragiro bye, kandi tumanyire ngu w’okugonza, w’obwinganiza kandi n’ebiragiro bye bitugasira. (Isaya 48:17; 1 Yohana 5:3) Ensonga eyakabiri, kwetantara omuntu anyakwangire kwegarukamu kitulinda itwe hamu n’ekitebe  okutasisikara omu by’omwoyo n’omungeso kandi kirinda ibara ly’ekitebe. (1 Abakolinso 5:6, 7) Ensonga eya kasatu, kugumira ha misingi ya Baibuli nikisobora kugasira omuntu anyakubingirwe. Obuturukusagika encwamu ey’akatebe ka bagurusi b’ekitebe abahulirize ensonga egi, nikisobora kuhika ha mutima gw’omusisi anyakwangire obukonyezi obumuhairwe abagurusi b’ekitebe. Kufeerwa enkoragana ye n’abagonzebwa nikisobora kumuletera ‘kwegarukamu’ ekibi kye, kandi agira eki yakoraho kugaruka hali Yahwe.—Luka 15:17.

Kakuba omunyabuzaale abingwa omu kitebe? Omu nsonga nk’enu, okugonza kwaitu ha banyabuzaale kusobora kulengesa obwesigwa bwaitu hali Yahwe. Tusemeriire kutwaza tuta omunyabuzaale anyakubingirwe? Titurukusobora kubazaho enyikara zoona ezisobora kubaho, baitu katubazeeho ibiri ezikira kubaho.

Obwire obumu, omuntu anyakubingirwe n’asobora kuba munyabuzaale kandi n’aikara omu ka. Baitu nk’oku okubingwa omu kitebe kitaihaho obuzaale, enkoragana ey’omu ka eya buli kiro n’esobora kwikaraho. Baitu, habw’emihanda ye wenka, omuntu ogu n’aba acwiremu kwihaho enkoragana ye n’abanyabuzaale omu by’omwoyo. Nahabweki ab’omu ka abesigwa baba batakyakoragana nauwe omu by’omwoyo. Ekyokurorraho, kakuba aba ali omu ka, tibasemeriire kumwikiriza kubeteranizaho omu kuramya kwabu okw’eka. Baitu, anyakubingirwe kakuba aba ali mwana muto, abazaire baba bakyaine obujunanizibwa bw’okuhana n’okwegesa omwana wabo. Nahabweki, abazaire abaine okugonza batekaho entekaniza y’okwega Baibuli n’omwana ogu—Enfumo 6:20-22; 29:17. *

Obwire obumu, omunyabuzaale anyakubingirwe n’asobora kuba atarukwikara omu ka egi. Baitu kakuba kyetagisa kumuhikirra kumaraho ensonga ez’omuka, enkoragana egi esemeriire kuba nke muno. Abakristayo abesigwa omu ka tibasemeriire kuba n’ekyokwekwasa nukwo baikale nibabaza n’omunyabuzaale anyakubingirwe kandi atarukwikara omu  ka. Baitu, obwesigwa bwaitu hali Yahwe n’Ekitebe kye nibyo bibaletera kworobera entekaniza y’Ebyahandikirwe erukukwata ha kubinga abatarukwegarukamu. Kugumira ha ntekaniza enu nikikonyera omuntu arukuba asiisire, nikisobora kumukonyera kugasirwa omu kuhanwa akwaba atungire. *—Abaheburaniya 12:11.