1, 2. Mulimo ki ogw’okwombeka ogw’orukukora, kandi habwaki osemeriire kugutwara kuba mukuru?

TERAMU akasisani oyekambire kwombeka. Harabireho akasumi noyombeka kandi n’obusumi oburukwija noija kuba nokyayombeka. Omulimo gunu tigwanguhire baitu nigukuletera okusemererwa. Omaliriire ngu ekiraija kiije, torukwija kuguleka rundi kugayarra habwokuba obwomeezi bwawe rundi n’obusumi bw’omu maiso bwemeriire ha mulimo gunu. Habwaki? Habwokuba, ekintu eky’orukwombeka niiwe wenyini!

² Omwegeswa Yuda akoleka kurungi ngu tusemeriire kweyombeka. Atakatereriire Abakristaayo ngu “mwerindege omu kugonza kwa Ruhanga,” akabanza kwoleka ekirukusobora kubakonyera obu yagambire ngu: “Nimweyombeka hali okuikiriza kwanyu okurukwera muno.” (Yuda 20, 21) Nosobora kweyombeka omu miringo ki okongera kugumya okwikiriza kwawe nukwo oyerindire omu kugonza kwa Ruhanga? Leka tubazeeho emiringo esatu ey’osobora kwombekamu okwikiriza kwawe.

3-5. (a) Ntekereza ki egwire Setani ey’arukugonza obe nayo habikwatiraine n’ebiragiro bya Yahwe? (b) Baitu ebiragiro bya Ruhanga tusemeriire kubirora tuta, kandi bisemeriire kukwataho bita entekereza yaitu? Kozesa ekyokurorraho.

³ Ekintu eky’okubanza, tusemeriire kugumya okwikiriza kwaitu omu biragiro bya Ruhanga. Obwobaire noyega akatabu  kanu, oyegere ha ngeso Yahwe arukukwetagisa. Emisingi enu iwe ogirozere ota? Setani n’agonza kukuhabya otekereze ngu ebiragiro bya Ruhanga, emisingi ye, hamu n’eby’arukukwetagisa bigumire muno kandi nibikumaraho obugabe. Aikaire n’akozesa omutego gunu kuruga omu rugonjo rwa Adeni kandi gumukoliire kurungi. (Okubanza 3:1-6) Notekereza naiwe n’asobora kugukutega? Nikiija kusigikirra ha ntekereza yawe.

⁴ Kukyetegereza kurungi, katukozese ekyokurorraho. Oli omu irindiro ly’ebisoro n’orubatarubata. Hanyuma warora ekiikaro kimu bakitaireho orugo rw’amaani. Omunda y’orugo runu nihazooka kurungi. Omurundi gw’okubanza n’osobora kuteekereza ngu orugo runu nirukulemesa kutaahamu kurambura akaikaro ako. Obwoyeyongera kulinguliriza omu rugo runu, orora entale enkooto n’esooba ine eky’erukugonza kukwata! Obu nubwo orora omugaso gw’orugo runu—oyetegereza ngu rutairweho kukulinda hali akabi. Haroho ekintu ekirukukusoberra nikigonza kukulya? Baibuli etugambira eti: “Mwerindege, murolege, omunyanzigwa wanyu Setani nagendagenda nase’ra owaralya.”—1 Petero 5:8.

⁵ Setani muhiigi omubi muno. Baitu habw’okutagonza tuliibwe Setani, Yahwe ataireho ebiragiro ebirukutulinda hali “obudupe bwa Setani.” (Abefeso 6:11) Nahabweki buli murundi turacumitiriza ha biragiro bya Yahwe, leka turole ngu Isiitwe ow’omu iguru abitaireho habw’okugonza. Kakuba tubirora tuti, nibiija kutulinda n’okutuletera okusemererwa. Omukwenda Yakobo akagamba: “Anyakurora omu biragiro ebihikiriire, nibyo byobugabe, nayekamba ati . . . alihabwa omugisa omu kukorakwe.”—Yakobo 1:25.

6. Mulingo ki ogurukukirayo oburungi ogutusobora kwombekamu okwikiriza kwaitu omu biragiro n’emisingi ya Ruhanga? Ha ekyokurorraho.

⁶ Kuhonderaga ebiragiro bya Ruhanga guli mulingo ogurukukirayo ogusobora kutukonyera kwombeka okwikiriza kwaitu hali ogu ayataireho ebiragiro n’omu mugaso gw’ebiragiro bye. Ekyokurorraho, “ekiragiro kya Kristo” nikitwarramu ekiragiro yatuhaire eky’okwegesa abantu “byona [ebiyaturagiire].”  (Abagaratiya 6:2; Matayo 28:19, 20) Kandi Abakristaayo batwara ekiragiro ky’okwesorroza kuramiza hamu n’okugarramungana amaani kuba kikuru muno. (Abaheburaniya 10:24, 25) Ebiragiro ebindi ebya Ruhanga nibitwarramu kuhondera obuhabuzi obw’okusaba Yahwe buli kiro kandi kuruga ha mutima. (Matayo 6:5-8; 1 Abasesalonika 5:17) Obu turahondera ebiragiro bye, nitwija kweyongera kurora oburungi gw’oburagirizi bwa Yahwe. Kubyorobera kituletera okusemererwa n’okumarwa oku tutarukusobora kusanga hantu handi hoona omu nsi enu ijwire ebizibu. Obwoyecumitiriza ha mulingo ogasiirwe habw’okuhondera ebiragiro bya Ruhanga, okwikiriza kwawe tikweyongera kuguma?

7, 8. Ekigambo kya Ruhanga kigarramu kita amaani abantu abatuntura ngu nibasobora kulemwa kulinda obwesigwa bwabo omu myaka erukuhonderaho?

⁷ Abantu abamu batuntura nibatekereza ngu obwire nibwija kuhika ebiragiro bya Ruhanga byeyongere kuguma. Batiina nibagamba ngu nibasobora kulemwa kubihondera. Kakuba otunga entekereza enu, oikale noijuka ebigambo binu: “Ninyowe Mukama Ruhanga wawe, arukukwegesa okugasa, arukukuterekereza omu muhanda ogwoliba nogendamu. Ai bambi, kakuba ohuliire ebiragiro byange! Obusinge bwawe bwakubaire nkekyambu, nokuhiki’ra kwawe kwakubaire nkebigonzi byenyanja.”  (Isaya 48:17, 18) Wali olengereho kutekereza ha mulingo ebigambo binu birukugarramu amaani?

⁸ Yahwe natwoleka ngu nitwija kwegasira obu turamworobera. N’aturaganiza emigisa y’emirundi ebiri kakuba tumworobera. Ogw’okubanza, obusinge bwaitu nibwija kusisana n’ekyambu, ekirukumanyisa nitwija kuba tutekaine, kandi twine obusinge bwingi. Ogwakabiri, okuhiki’ra kwaitu nikwija kuba nk’ebigonzi by’enyanja. Kakuba oyemerra ha musa gw’enyanja okarora omulingo ebigonzi birukwekulingura nibihonderana, tosobora kugurukyagurukya ngu ebigonzi binu nibiija kweyongera kubaho. Okimanyira kimu ngu ebigonzi binu nibiija kweyongeraga kuteera ha musa gw’enyanja habw’emyaka yoona. Yahwe n’agamba ngu okuhikirra kwawe nikwija kuba nk’ebigonzi ebi. Yahwe tarukwija kukuleka wenka kakabu olinda obwesigwa! (Soma Zabuli 55:22.) Emirago emirungi nk’enu terukwombeka okwikiriza kwawe omu Yahwe n’ebiragiro bye ebirukwerra?

9, 10. (a) Habwaki kiri kirungi Omukristaayo kweteraho ekigendererwa ky’okukura omu by’omwoyo? (b) Kuba n’entekereza ey’eby’omwoyo ereta eta okusemererwa?

⁹ Ekintu ekyakabiri eky’osemeriire kwombeka nikisangwa omu bigambo binu: “Leka tweyongere kukura.” (Abaheburaniya 6:1, NW) Kukura omu by’omwoyo kigendererwa kirungi Omukristaayo asemeriire kukorra. Okukura omu by’omwoyo kwanguhire kukutunga omu kasumi kanu tikuli nk’okuhikirra okututarukusobora kutunga omu kasumi kanu. Ekintu ekindi, Abakristaayo batunga okusemererwa kw’amaani obu beyongera kukurakurana omu buhereza bwabo. Habwaki nitugamba tuti?

¹⁰ Omukristaayo akuzire nuwe omuntu aba n’afaayo ha bintu eby’omwoyo. Arora ebintu nk’oku Yahwe abirora. (Yohana 4:23) Paulo akahandiika ati: “Baitu abanyakukuratira omubiri batekereza ebyomubiri; baitu abanyakukuratira omwoyo batekereza ebyomwoyo.” (Abarumi 8:5) Entekereza y’omubiri tesobora  kuleta okusemererwa habwokuba omuntu aba nayetekerezaho wenka, atarukurora ebya hara kandi n’akorra itungo. Entekereza ey’eby’omwoyo ereta okusemererwa habwokuba omuntu aba n’afaayo ha ntekereza ya Yahwe, “Ruhanga w’okusemererwa.” (1 Timoseo 1:11) Omuntu ow’eby’omwoyo aikara n’agonza kusemeza Yahwe kandi n’obwatunga ebizibu aikara asemeriirwe. Habwaki? Ebizibu binu abirora nk’omugisa gw’okwoleka ngu Setani mubiihi kandi nk’omulingo gw’okwoleka obwesigwa bwe hali Yahwe.—Enfumo 27:11; soma Yakobo 1:2, 3.

11, 12. (a) Paulo obwakaba nabaza ha kubaganizamu ebirungi n’ebibi, akamanyisa ki obu yakozeseze ekigambo “obwokwemanyiza”? (b) Omubiri tusemeriire kugutendeka omu mulingo ki kurora gwaguma?

¹¹ Okwetendeka nukwo kuleta obukuru omu bintu eby’omwoyo. Tekereza ha rukarra runu: “Baitu ebyokulya ebigumire nibiseme’ra abakuzire, nibo abatungire amagezi obwokwemanyiza okubaganizamu ebirungi nebibi.” (Abaheburaniya 5:14) Paulo obu yagambire ngu batungire amagezi “obwokwemanyiza,” akakozesa ekigambo ky’Oruyonaani ekiine kuba kyali nikikozesebwa omu matendekero g’emizaano ag’ekyasa ky’okubanza omu ihanga lya Buyonaani, habwokuba nikisobora kukozesebwa kumanyisa ‘atendekerwe nk’omutezi wa sama.’ Hati banza otekerezeho ha kutendekwa abantu abo oku batunga.

¹² Obu twazairwe, emibiri yaitu ekaba etatendekerwe. Ekyokurorraho, omwana akyali nkerembe aba atamanyire nambere arukuta emikono n’amaguru ge. Enu niyo ensonga habwaki aikara n’ahungya emikono kunu na kuli obwire obundi n’ayetera omu maiso atakimanyire. Baitu hanyuma y’akaire, ayemanyiza kukozesa omubiri gwe. Atandika kwajura, kurubata, kandi atandika kwiruka. * Baitu kandi omuzaani uwe ayetendeka  ata? Obworora omuzaani n’aguruka kandi nayehindurra omu mwanya omu mulingo gw’ekika kya haiguru muno, hataroho okugurukyagurukya, omanya ngu omuntu onu omubiri gwe agutendekere gwamanyira. Titusobora kugamba ngu omuzaani onu akazarwa amanyire kuzaana emizano enu—kikamutwarra akasumi kaingi nayetendeka. Baibuli negamba ngu okwemanyiza okw’omulingo gunu “nukugasa kake.” Kinu kanikyoleka obukuru bw’okutendeka obusobozi bwaitu obw’okwetegereza ebintu eby’omwoyo!—1 Timoseo 4:8.

13. Nitusobora tuta kutendeka obusobozi bwaitu obw’okwetegereza?

¹³ Omu kitabu kinu, tubaliizeho ebintu bingi ebirukwija kukukonyera kwongera kutendeka obusobozi bwawe obw’okwetegereza nukwo osobole kwikara oli mwesigwa hali Yahwe kandi oli muntu w’eby’omwoyo. Butoosa omu bwomeezi bwawe, osabege Yahwe otakakozere encwamu yoona kandi otekerezeho emisingi n’ebiragiro bye. Buli ncwamu yona ey’oragonza kukora, banza owekaguze: ‘Biragiro ki bya Baibuli ebirukubaza ha nsonga enu? Ninsobora nta kubita omu nkora? Ncwamu ki erasemeza Ise nyowe ow’omwiguru?’ (Soma Enfumo 3:5, 6; Yakobo 1:5.) Obworakora oti omu ncwamu zaawe zoona, noija kutendeka obusobozi bwawe obw’okwetegereza. Okutendeka ky’omulingo gunu nikwija kukukonyera kufooka muntu w’eby’omwoyo kandi nukwo orukwija kwikara.

14. Tusemeriire kutunga njara ya mulingo ki kusobora kukura omu by’omwoyo, baitu kintu ki eki tusemeriire kwegendereza?

¹⁴ Nobukiraaba ngu omuntu n’asobora kukura omu mubiri nahwayo, okukura omu by’omwoyo tikuhwayo. Omuntu akura habw’eby’okulya. Nikyo omukwenda Paulo yagambire ngu:  “Ebyokulya ebigumire nibiseme’ra abakuzire.” Ekintu ekikuru ekirakukonyera kwombeka okwikiriza kwawe nukwo kwerisa eby’okulya eby’omwoyo. Obworata omu nkora eby’orukwega, eki nikiija kwoleka amagezi. Kandi Baibuli egamba: “Amagezi nigo garukukira byona.” Nahabweki nitwetagisa kuba n’enjara yonyini ey’amananu agarukuruga hali Yahwe. (Enfumo 4:5-7; 1 Petero 2:2) Baitu titusemeriire kufooka b’emyehembo habw’okutunga okumanya n’amagezi agaruga hali Ruhanga. Nitwetagisa kwikara nitwekebera obwire bwona habwokuba titurukugonza emyehembo rundi obuceke bundi okutukwata bukakurra omu mutima gwaitu. Paulo akagamba ati: “Mwerole inywenka, rundi muikale omu kuikiriza; mwerenge inywenka.”—2 Abakolinso 13:5.

15. Habwaki okugonza nikwetagisa kusobora kukura omu by’omwoyo?

¹⁵ Enju n’esobora kwombekwa ekahwa baitu omulimo gw’okugiikaza eri nungi tiguhwa. Kugisemeza n’okugidabiriza bintu bikuru, kandi obwire nibusobora kuhika kiketagisa kugyongeraho ekisiika ekindi. Kintu ki ekiturukwetagisa kusobora kukura omu by’omwoyo n’okwerinda okutagarukirra? Ekirukukira byona nukwo kugonza. Nitwetaga kwikara nitukurakuraniza okugonza kwaitu hali Yahwe na hali Abakristaayo bagenzi baitu. Obu turaaba tutaine okugonza, ebintu ebitumanyire n’ebitukora nibiija kutufera busa. (1 Abakolinso 13:1-3) Okugonza nukwo kurukusobora kutukonyera kufooka bakuru omu by’omwoyo n’okusigara tuli b’eby’omwoyo.

16. Setani aletereza abantu kuba n’entekereza ki embi, kandi bulinzi ki Yahwe obw’atuhaire?

¹⁶ Katwongere tubazeeho ekintu kindi ky’orukwetagisa ha mulimo gwawe ogw’okwombeka. Kusobora kweyombeka nk’omwegeswa wa Kristo owonyini, osemeriire kwerinda omu ntekereza yaawe. Omulemi w’ensi enu Setani amanyire kurungi omulingo asobora kuletera abantu ebitekerezo ebibi, okutanihirra omu birungi, okutesiga, n’okutaba n’okunihira. (Abefeso  2:2) Entekereza ya mulingo gunu mbi muno hali Omukristaayo nk’oku embaaho ezihumbire ziba z’akabi hali enju eyombekerwe omu mbaaho. Ekirungi kiri ngu Yahwe atuhaire eky’okurwanisa ekikuru—okunihira.

17. Baibuli erengesaniza omugaso gw’okunihira na ki?

¹⁷ Baibuli esoborra ebicweka ebirukwahukana ebiri ha ky’okujwara eky’okurwana ekitusemeriire kujwara kusobora kurwanisa Setani n’ensi enu. Ekintu ekikuru ha ky’okujwara kinu niyo enkofiira, “eyokunihira okujunwa.” (1 Abasesalonika 5:8) Omu busumi bwa kara, omusirikale yaikaraga amanyire ngu tasobora kwikara ali mwomeezi kakuba atajwara enkofiira ye ali omu bulemu. Enkofiira enu eyakiraga kukorwa omu kyoma kandi ha iguru n’etekwaho ekisaato ekigumire yakonyeraga kulinda omutwe okutahutazibwa muno kakuba omuntu yaterwaga ha mutwe. Nk’oku enkofiira enu yakonyeraga omutwe, okunihira nakwo nikusobora kulinda ebitekerezo byawe.

18, 19. Yesu akatuteraho kyokurorraho ki omu kuba n’okunihira, kandi nitusobora tuta okumwegeraho?

¹⁸ Yesu akatuteraho ekyokurorraho ekirungi muno eky’okwikara n’okunihira. Ijuka ebi yagumisiriize ha bwire bw’ekiro ekyamaliriireyo atakaisirwe. Omunywani we akamugobeza habw’esente. Ondi akamwehakana ngu tamumanyire. Abandi bakairuka bakamuleka wenka. Abantu ab’omu ihanga lye lyonyini bakamwehindukirra, nibatokera kimu ngu ahanikwe ha muti. Nitugumya ngu naiwe norora nk’oku ebizibu ebi yatungire nibikirra kimu ebyaitu ebi tutunga. Kiki ekyamukonyire? Abaheburaniya 12:2 nirugamba: “Obwokusemererwa okwatairweho omu maisoge ayagumisiriize omuti nagaya ensoni zagwo, kandi yaika’ra ha mukono ogwobulyo ogwekitebe kya Ruhanga.” Yesu atebwe ‘okusemererwa okwatairwe omu maisoge.’

¹⁹ Kusemererwa ki okwatairwe omu maiso ga Yesu? Akakimanya ngu omu kugumisiriza, akaba n’agenda kuhaisaniza ibara lya Yahwe erirukwera. Akaba n’agenda kuha obwa kaiso oburukukirayo oburukwoleka ngu Setani mubiihi. Tiharoho okunihira kundi okukaba nikusobora kuha Yesu okusemererwa okukira okw’omulingo gunu! Kandi akaba akimanyire ngu Yahwe  akaba n’agenda kumuha empeera y’amaani ey’okugarukamu kuba na Ise habw’okulinda obwesigwa. Yesu akaikara n’atekerezaaho okunihira kunu okurungi n’obwakaba n’araba omu bwire obw’ebizibu by’amaani. Naitwe nikyo kimu ekiturukwetagisa kukora. Naitwe twine okusemererwa okutuhairwe. Itwena Yahwe atuhaire omugisa gw’okweza ibara lye erikuru. Nitusobora kwoleka ngu Setani mubiihi kakuba tukomamu Yahwe kuba Mulemi waitu n’okwerindira omu kugonza kwa Isitwe n’obutwakuba tutungire ebirengeso eby’amaani.

20. Kiki ekirukusobora kukukonyera kwikara n’ebitekerezo ebirungi hamu n’okunihira?

²⁰ Yahwe n’agonza kandi ayetegekere okuha abahereza be abesigwa empeera. (Isaya 30:18; soma Maraki 3:10.) Kimusemeza kuha abahereza be ebintu ebirungi emitima yabo eyegomba. (Zabuli 37:4) Nahabweki ebitekerezo byawe byona biikaze ha bintu Ruhanga aturaganiize. Otaikiriza ntekereza etahikire ey’ensi ya Setani okukuhabya. Kakuba omanya ngu omwoyo gw’ensi gutandikire kukutaaha omu mutima, wesengereze Yahwe akuhe ‘obusinge bwa Ruhanga oburukukira okumanywa kwona.’ Obusinge nibwija kulinda omutima gwawe n’ebitekerezo byawe.—Abafiripi 4:6, 7.

21, 22. (a) Kunihira ki abantu ‘ab’ekitebe kingi’ oku barukutwara kuba okw’omuhendo mwingi? (b) Kunihira ki okw’Ekikristaayo okurukukirayo kuba kw’omugaso hali iwe, kandi omalirirre kukora ki?

²¹ Kunu ka kunihira kurungi okwoine kutekerezaho! Obworaba  oli omu ha bantu ‘ab’ekitebe kingi,’ abarukwija kuraba omu “muhito omwingi,” tekereza ha bwomeezi obw’orukugenda kutunga omu busumi obutali bwa hara. (Okusuku’rwa 7:9, 14) Setani n’abamaraika be nibaija kuba batakyaroho, kandi kinu nikiija kumanyisa ngu noija kutunga okuhumuzibwa okw’otarukusobora kulengesaniza n’ekintu kyona omu kasumi kanu. Noha hali itwe atakatungahoga ebizibu ebirukuletwa Setani? Hanyuma y’ebizibu ebi kuhwaho, ka nitwija kutunga okusemererwa kukora omulimo gw’okuhindura ensi yoona kugifoora rugonjo tuli hansi y’oburagirizi bwa Yesu n’abalemi bagenzi be 144,000 ab’omwiguru! N’okusemererwa kwingi katulindirre kurora oburwaire n’obuceke byona bihirweho, okutangirra abagonzebwa baitu abafiire abali omu bituuro obu baliba nibahumbuuka, okuba n’obwomeezi Ruhanga akaba atutegekiire! Obuhikiriire obu buliba nibweyongera, haroho omugabo gundi oguraganiziibwe omu kitabu ky’Abarumi 8:21 ogu tulitunga—‘Obugabe bw’ekitiinisa eky’abana ba Ruhanga.’

²² Yahwe n’agonza otunge obugabe bwingi obw’otarukusobora kulenga n’ekintu kyona. Omuhanda ogurukuhikya ha bugabe obu nigusigikirra ha buhulizi. Mali ebintu binu tibirukutwekambisa kutamu amaani kworobera Yahwe buli kiro? Nahabweki, kora kyona ekirukusoboka okweyongera kwombeka okwikiriza kwawe kuba kw’amaani nukwo oyerindire omu kugonza kwa Ruhanga obusinge bwona!