1. Kiki ekirabaho ‘obuturai’ra haihi Ruhanga’?

YAHWE agonza abo abamuhereza. Kakuba oraba noramya Yahwe, naija kukuha emigisa hati kandi n’omubiro by’omu maiso. Baibuli egamba ngu: “Mui’re haihi Ruhanga nauwe alibai’ra haihi.”​—Yakobo 4:⁠8.

2. Nitusobora tuta kwirra haihi Ruhanga, kandi kinu kirakwataho kita okusaba kwaitu?

² Okwirra haihi Ruhanga nikimanyisa ngu, oine kusoma n’okuta munkora eby’osomere kuruga mu Kigambo kye. Obu orasabaga nkoku arukugonza, Yahwe naija kuhurra okusaba kwawe kandi akwanukule. Omukwenda Omukristayo Yohana akahandika ngu: “Kandi bunu nubwo bumanzi obutunyina namberali ngu obutusaba ekintu kyona nkokwagonza atuhurra kandi obuturaba ntumanya ngu atuhurra kyona eki tumusaba tumanya ngu tunyine ebitwamusabire.”​—1 Yohana 5:​14, 15.

3-7. Nitusobora tuta kuba n’amagezi agarukuruga hali Ruhanga, kandi nigaija kutuyamba gata?

³ Ekindi kiri nti obworasemberra Ruhanga, naija kukuha amagezi agarakuyamba mubwomezi obwa buli kiro. Baibuli egamba ngu: “Omuntu wena omulinywe obwaburwa amagezi, asabe Ruhanga.”​—Yakobo 1:⁠5.

⁴ Amagezi agarukuruga hali Ruhanga nigasobora kukukonyera gata? Nigasobora kukuyamba kumanya ebibihiza Yahwe. Noija n’okumanya habwaki bitahikire. Kandi habwaki oine n’okubyetantara. Okumanya kunu nikwija kukulinda kutagwa mumitalibano ei abantu abarukukira obwingi ei bagwamu. Nk’ekyokuroraho, okuhuliriza okuhaburwa kwa Ruhanga okukwatiraine n’engeso enyonjo nikikonyera kulinda abantu ba Ruhanga obutatunga enda ezitarukwendwa, oburwaire oburuga mubusihani, obuswere obwenaku rundi amaka agarukuseseka.

⁵ Amagezi kuruga hali Ruhanga nigasobora kukukorra ki? Nigasobora kukutungisa omugaso gw’obwomezi. Nigasobora kukuyamba kusaramu n’amagezi mu bintu ebya buli kiro nk’omulingo ogwokusoboramu kukozesa sente zawe. Noija kuba n’ebigendererwa ebirungi okangira kimu ebigendererwa ebitaine mugaso.

⁶ Amagezi agarukuruga hali Ruhanga nigakuyamba n’omunkoragana yawe nabandi. Nosobora kuba n’amaka amarungi. Nosobora kuba n’obunywani obugumire nabandi kandi baingi nibaija kukutamu ekitinisa, otwalireme naabo abatarukuhereza Ruhanga.

⁷ Okuba na magezi agarukuruga hali Ruhanga nikija kukwoleka nkoku oine kutwaramu obwomezi. Nigaija kukuyamba kugumira emitalibaine ey’obwomezi, hamu nebyo ebimaramu amani. Kandi noija kuba n’okunihira okugumire. Kinu nikija kukuyamba kuba n’obwomezi obw’omubiri oburungi.​—Enfumo 14:30; Isaya 48:⁠17.

8. Kakuba ohereza Ruhanga, kiki ky’otarukwija kutiina?

⁸ Kakuba ohereza Ruhanga, noija kuba n’obugabe obw’obutatina emitalibaine obutasisana abo abatarukuhereza Ruhanga. Habwokuba nomanya ngu abo abafiire bali mukituro kandi tibaine bwomezi, tokubatina. Kandi habwokuba oine  okunihira okugumire ngu Ruhanga naija kubahumbura, tokwija kutina kufa. Kandi habwokumanya ngu Ruhanga nuwe w’amani goona toija kutina marogo rundi obusezi.​—Yohana 8:​32.

9-11. Nibaha abalikara omu Rugonjo rwa Ruhanga, kandi nibaha abatalibayo?

⁹ Obworasemberra haihi Ruhanga toija kutina ebirukwija omu maiso. Nkoku tumazire kurora, Baibuli ekaragura okubaho kw’emihito nyingi ei turukurora biro binu. Yahwe natugambira ngu binu ebiturukurora bya kanya bwanya; Obukama bwa Ruhanga buli haihi kufora ensi enu orugonjo rwa Ruhanga.​—Luka 21:​10, 11, 31; 23:⁠43.

¹⁰ Abo bonka abarukwirra haihi na Yahwe kandi bakamuhereza nibo balikara mu Rugonjo rwa Ruhanga. Baibuli egamba ngu: “Hasigaireho akacu kake omubi alihera: ego olitekereza muno ekiikaro kye, baitu talibaho. Baitu abaculezi baligwetwa ensi; balikyanganuka abwobusinge obwingi.”​—Zabuli 37:​10, 11.

¹¹ Abo abajemera kimu kworobera ebiragiro bya Ruhanga ebihikirire baliferwa obwomezi bwabu ebiro byona. (2 Abasesalonika 1:​8, 9) Tibalibaho nakake. Baliteranizibwa hamu na Setani n’amasetani ge omukufa okutahwaho. (Okusuku’rwa 20:​10, 14) Baitu abo abarukwega hali Yahwe kandi bakamuhereza nibaija kusemererwa obwomezi omu Rugonjo rwa Ruhanga omu nsi.

12. Baibuli egamba ki hali ebi ebirukwija omu maiso?

¹² Yahwe anihize ebintu bingi abo abamugonza. Werorre wenka ekigambo kye nkoku kigamba ha bwomezi nkoku buliba omu Rugonjo rwa Ruhanga omu nsi:

• Obwingi bw’eby’okulya: “Halibaho omweru gwobura [ebyokulya] omu nsi; ha mutwe gwensozi.”​—⁠Zabuli 72:⁠16.

• Amaju amarungi: “Balyombeka enju balizitahamu.”​—Isaya 65:⁠21.

• Emirimu emirungi: ‘Nabakome bange balisemere’rwa omwanya mukoto omulimo ogwengaro zabu. Tibalitalibanira busa.’​—Isaya 65:​22, 23.

• Busaho burwaire: “Anyakuikarayo taligamba ati Ndi murwaire.”​—Isaya 33:⁠24.

• Busaho bulema: “Nubwo amaiso gabafu bamaiso galiiguka, namatu gabafu bamatu galiigurwa. Nubwo omuntu omulema aliguruka nkensa, norulimi rwakifa munwa rulizina.”​—Isaya 35:​5, 6.

• Busaho kurumwa, naku, n’okufa: “[Ruhanga] alisusura amaizi gona ha maiso gabu: kandi tihakiroho kufa; nobukwakuba kutera empamo, nobukwakuba oku’ra, nobukwakuba kusasa tibikiroho. Ebyokubanza bihoireho.”​—Okusuku’rwa 21:⁠4.

• Busaho bulemu: “[Ruhanga] amaraho obulemu okuhika ha mperu [y’]ensi.”​—Zabuli 46:⁠9.

• Obwomezi obutahwaho: “Abahikirire baligweta ensi, baragiikaramuga ebiro nebiro.”​—Zabuli 37:⁠29.

13. Noha arukusobora kufoora ensi enu okuba orugonjo rwa Ruhanga, kandi habwaki?

¹³ Abantu tibasobora kuletaho ebintu binu, baitu Yahwe aine obusobozi bwokukora kyona ekyagamba. Busaho kyona ekikusobora kumutanga kukora ekyarukugonza. Baibuli egamba eti: “Busaho kigambo ekiruga hali Ruhanga kyatasobora kuhikiriza.”​—Luka 1:​37, NW.

14. Nosobora ota kugya mu muhanda ogurukuhikya omu bwomezi obutahwaho?

¹⁴ Nakozesa Bakaiso be, Yahwe naha abantu buli hantu hoona omugisa ‘gw’okutaha omu irembo erifunzire’ kandi n’okugendera mu muhanda ogurabahikya mu bwomezi obutahwaho. Ka kyakubaire kirungi okuba omu hali abo abarukwikiriza kutangirirwa. Kyakubaire kirungi kusoma ediini y’amazima okatunga emigisa ya Yahwe ebiro byona!​—Matayo 7:​13, 14.