ESUURA EYAKABIRI
Baibuli—Ekitabu Ekyarugire Hali Ruhanga
1, 2. Habwaki tusobora kugamba ngu Baibuli kiri kisembo kuruga hali Ruhanga?
OYEHURRA ota omunywani waawe obwakuha ekisembo eky’obaire otarukunihira? Osemererwa muno kandi omusiima habw’okukufaaho.
2 Baibuli kisembo kuruga hali Ruhanga. Etugambira hali ebintu ebitutakusoboire kumanya. Nk’ekyokurorraho, etugambira ngu Ruhanga nuwe yahangire iguru, ensi, omusaija, n’omukazi ababandize. Etuheereza emisingi erukusobora kutukonyera omu bwire bw’ebizibu. Baibuli niyo etugambira omulingo Ruhanga arahikiriza ekigendererwa kye eky’okufoora ensi orugonjo orurungi. Baibuli kakisembo kirungi muno!
3. Biki eby’orukwija kwega obw’orayeyongera kusoma Baibuli?
3 Obw’orayeyongera kwega Baibuli, noija kurora ngu Ruhanga n’agonza obe munywani we. Obworaikara noyega ebirukumukwataho, noija kugumya enkoragana yaawe nauwe.
4. Kiki ekirukuhuniriza hali Baibuli?
4 Baibuli ehindwirwe omu ndimi ezirukuhika 2,600, kandi enkumi n’enkumi ziturukiibwe. Obucweka oburukukira omu 90 ha 100 omu nsi yoona baina Baibuli omu rulimi rwabu habwabu. Buli wiiki, abantu abarukuhingura omu kakaikuru batunga Baibuli! Gali mananu ngu tiharoho kitabu kindi kyona ekirukwingana Baibuli.
5. Habwaki tusobora kugamba ngu Baibuli ekahandiikisibwa Ruhanga?
5 Baibuli ekahandikisibwa Ruhanga. (Soma 2 Timoseo 3:16.) Abantu bamu nibasobora kwekaguza, ‘nikiija kita kugamba ngu Baibuli ekaruga hali Ruhanga kandi kunu ekahandiikwa abantu?’ Baibuli n’egarukamu eti: “abantu bagambaga ebyarugire hali Ruhanga baterekeriziibwe omwoyo ogurukwera.” (2 Petero 1:21) Nitusobora kukirengesaniza n’omukuru w’ekitongole anyakwina omuhandiiki we. Kakuba omukuru onu aragira omuhandiiki we kuhandiika ebbaruha, noteekereza ebbaruha enu n’eba eri y’omuhandiiki rundi ki y’omukuru w’ekitongole? Ebbaruha enu n’eba eri y’omukuru w’ekitongole. Omulingo nugwo gumu, Ruhanga akakozesa abantu kuhandiika Baibuli. Ruhanga akabakozesa kuhandiika ebiteekerezo bye. Nahabwekyo, gali mananu ngu Baibuli ‘kigambo kya Ruhanga.’—1 Abasesalonika 2:13; rora Ebyongiirweho, akacweka 2.
Baibuli ya New World Translation of the Holy Scriptures eri omu ndimi nyingi
BAIBULI EHIKIRE
6, 7. Habwaki nitusobora kugamba ngu Baibuli niikirraniza?
6 Baibuli ekamara emyaka erukuhingura omu 1,600 kurora yona yahwa. Abagihandiikire bakabaho omu busumi oburukwahukana. Abamu baali basomere muno kandi abandi batasomere. Nk’ekyokurorraho, omu aha bagihandiikire akaba ali dakitaali. Abandi baali balimi, basohi, baliisa, banabbi, bacwi b’emisango, hamu n’abakama. N’obukiraaba ngu baali nibahukana, ebitabu byona eby’omu Baibuli nibiikirraniza kurungi. Torukusobora kusanga ekitabu kimu nikihakaniza ekindi. *
7 Esuura ezirukubanza omu Baibuli nizisoborra omulingo ebizibu byatandikire, kandi esuura ezirukumaliira nizisoborra omulingo Ruhanga alimaraho ebizibu ebi kandi aleeteho ensi empyaka. Baibuli n’ebazaaho ebyafaayo by’abantu eby’emyaka n’emyaka kandi n’esoborra omulingo ekigendererwa kya Ruhanga kirihikirizibwa.
8. Byokurorraho ki ebirukwoleka ngu Baibuli ehikire obw’ebaza ha bya sayansi?
8 Habikwatiraine na sayansi, Baibuli ehikiire kimu n’obukiraaba ngu etahandiikwe kwegesa ebya sayansi. Eki tikirukuhuniriza habwokuba ekaruga hali Ruhanga. Nk’ekyokurorraho, ekitabu Kyabalevi kirumu ebiragiro ebi Ruhanga yahaire Abaisareri ebirukwoleka omulingo gw’okutanga endwaire okujanjaara. Ebintu binu bikahandikwa ira muno abantu batakamanyire omulingo endwaire oku zijanjaara. Baibuli eyegesa ngu ensi tehanikirwe ha kintu kyona. (Yobu 26:7) Akasumi abantu bateekerezaaga ngu ensi eterekeriire, Baibuli ekaba ekyolekere ira ngu ensi eyekulingiriire.—Isaya 40:22.
9. Obwesigwa obwayolekerwe abahandiiki ba Baibuli nibukukonyera kwetegereza ki?
9 Baibuli ehikire obw’ebazaaho ebyafaayo. Ebitabu ebingi ebirukubaza ha byafaayo tibihikire habwokuba abahandiiki tibali besigwa. Eky’okurorraho, baingi batahandiike h’amahanga gabo obu gasingurwaga omu bulemu. Baitu abahandiikire Baibuli, bakooleka obwesigwa obu bahandiikire ha kusingurwa kwa Isareri. Bakahandiika n’ensobi ezi baali bakozere. Nk’eky’okurorraho, omu kitabu ky’Okubara, Musa akahandiika ha nsobi ze ezamuletiire kufubirwa Ruhanga. (Okubara 20:2-12) Obwesigwa obwayolekerwe abahandiiki ba Baibuli nibwoleka ngu Baibuli ekaruga hali Ruhanga. Nahabwekyo tusemeriire kugyesiga.
EKITABU EKIRUMU AMAGEZI AGARUKUGASA
10. Obuhabuzi bwa Baibuli busobora kutugasira buta omu busumi bwaitu?
10 Baibuli eterekereziibwe omwoyo gwa Ruhanga, n’egasa habw’okwegesa, okuhana, okuterekereza ensonga, n’ahabw’okugambirra omu kuhikirra. (2 Timoseo 3:16) N’omu kasumi kanu, obuhabuzi obuli omu Baibuli nibutugasira. Yahwe amanyire omulingo twahangirwemu kandi amanyire n’omulingo tuteekereza n’oku twehurra. Atumanyire kurungi n’okukira omulingo twemanyire, kandi n’agonza tube n’okusemere’rwa. Ruhanga amanyire ebintu ebirukusobora kutugasira n’ebitakutugasira.
11, 12. (a) Yesu akaha buhabuzi ki omu Matayo esuura 5 kuhika 7? (b) Bintu ki ebindi ebiturukusobora kwega kuruga omu Baibuli?
11 Matayo esuura 5 kuhika 7, etugambira obuhabuzi oburungi Yesu yahaire oburukwoleka omulingo tusobora kutunga okusemererwa, kumaraho obutetegerezangana, omulingo tusemeriire okusaba, hamu n’omulingo oguhikire ogw’okutwaramu itungo. Obuhabuzi Yesu yahaire bw’amaani kandi bwina omugaso n’obukiraaba yabubalizeeho emyaka 2,000 erabireho.
12 Yahwe akozesa Baibuli kutwegesa emisingi eratukoonyera okuba n’okusemere’rwa omu maka, kuba abakozi abarungi, hamu n’okuba n’enkoragana ennungi hagati yaitu n’abantu abandi. Baibuli erumu emisingi kandi n’esobora kukonyera buli muntu weena kuraba omu kizibu kyona.—Soma Isaya 48:17; rora Ebyongiirweho, akacweka 3.
N’OSOBORA KWESIGA OBUNABBI OBULI OMU BAIBULI
Nabbi Isaya akaragura ngu orubuga rwa Baburoni rukaba nirugenda kuhwerekerezebwa
13. Isaya akagamba orubuga rwa Baburoni rwali nirugenda kuhwerekerezebwa ruta?
13 Obunabbi oburukukira obwingi obuli omu Baibuli bukahikirizibwa. Nk’ekyokurorraho, Isaya akaragura ngu orubuga rwa Baburoni rwakuhwerekerezibwe. (Isaya 13:19) Akasoborra omulingo kinu kyakukozerwemu. Orubuga runu rwali rwehingulizibwe ekisaaru n’orukomera orwali ruroho enyigi enkooto muno. Baitu Isaya akaranga ngu ekisaaru kinu kyali nikigenda kwoma kandi n’enyigi zakulekerwe zikingwirwe. Abanyanzigwa bakuhambire orubuga batarwaine. Isaya akagamba ngu omusaija arukwetwa Kuro nuwe yali n’agenda kuhwerekereza Baburoni.—Soma Isaya 44:27–45:2; rora Ebyongiirweho, akacweka 4.
14, 15. Obunabbi bwa Isaya bukahikirra buta?
14 Hanyuma y’emyaka bikumi bibiri obunnabi bunu buhandiikirwe, amahe gakatera orukande ha rubuga rwa Baburoni. Noha yali mwebembezi wago? Kuro omukama wa Buperusi. Obunnabi bukaba butandikire kuhikirizibwa.
15 Aba Baburoni bali baina obugenyi ha kiro batahiriirwe. Bateekerezaaga ngu busaho kabi akakaba nikasobora kubahikaho habwokuba orubuga rwabu rwali rwehunguliriziibwe ekikomera ky’amaani hamu n’ekisaaru. Baitu ha kiro eki, Kuro n’amahe ge bakatandika kuhugura ekisaaru ekyaleteriire amaizi kukeeha. Amaizi gakakehera kimu kandi amahe ga Kuro g’asobora kwambuka. Baitu ihe linu lyakukozere ki kusobora kurabaho ebisiika by’orubuga? Obunnabi nk’oku bwagambire, enyigi zikalekwa zitakingirwe kandi amahe gakahamba orubuga gatarwaine.
16. (a) Isaya akabazaaho ki ekyali nikigenda kuhika ha rubuga rwa Baburoni? (b) Tumanyire tuta ngu obunabbi bwa Isaya bukahikirra?
16 Isaya akaragura ngu tahalibaho omuntu weena aligaruka kwikara omu Baburoni. Akagamba: “Terigaruka okutahwamu obundi, kunu tibaligiraramu okuhikya obusinge bwona.” (Isaya 13:20) Ebigambo binu bikahikirra? Amatongo ga Baburoni nigasangwa mairo 50 omu masirimuka ga Baghdad omu ihanga lya Iraq. N’omu kasumi kanu, tiharoho muntu weena arukwikarayo. Yahwe akasingo’ra Baburoni “nekisingolezo kyokuhwerekereza.”—Isaya 14:22, 23. *
Amatonga ga Baburoni
17. Habwaki tusemeriire kwesiga byona Ruhanga araganiize?
17 Nitusobora kwesiga Baibuli habwokuba obunabbi obwingi bukahikirizibwa. Nitukigumya ngu Yahwe n’aija kuhikiriza okuraganiza kwe okw’okufoora ensi orugonjo orurungi. (Soma Okubara 23:19.) Nitukigumya ngu nitwija kutunga obwomeezi obutahwaho obu Yahwe y’araganiize habwokuba ali “Ruhanga atarukusobora kubiha.”—Tito 1:2. *
BAIBULI N’ESOBORA KUHINDURA OBWOMEEZI BWAWE
18. Omukwenda Paulo akalengesaniza “ekigambo kya Ruhanga” na kintu ki?
18 Twegere ngu busaho kitabu kindi kyona ekirukusobora kulengesanizibwa na Baibuli. Niikirraniza kandi obw’erukubaza ha bya sayansi hamu n’ebyafaayo ehikire. Erumu obuhabuzi, obunabbi obwahikirizibwe, kandi erumu ebintu bingi ebirukusobora kutugasira. Omukwenda Paulo akahandiika: ‘ekigambo kya Ruhanga kyomeezi kandi ky’amaani.’ Ebigambo ebi nibimanyisa ki?—Soma Abaheburaniya 4:12.
19, 20. (a) Baibuli n’esobora eta kukukonyera kwekebera? (b) N’osobora ota kwoleka ngu n’otwara Baibuli nk’ekisembo kuruga hali Ruhanga?
19 Baibuli n’esobora kuhindura obwomeezi bwawe. Niija kukukonyera kwekebera okamanya oli muntu wa mulingo ki. Nk’ekyokurorraho, n’esobora kutukonyera kuteeka omu nkora ebiturukwega hatali kugamba bugamba ngu nitugonza Ruhanga.
20 Mananukwo Baibuli kiri kitabu kuruga hali Ruhanga. N’agonza ogisome, ogyetegereze, kandi ogigonze. Yoleka okusiima kwawe habw’ekisembo kinu kandi oyeyongere okugisoma.Obw’orakora eki, noija kwetegereza ekigendererwa Ruhanga ainiire abantu. Omu suura erukuhonderaho, nitwija kumanya ebirukukiraho ha kigendererwa kinu.
^ kac. 6 Abantu abamu bagamba ngu Baibuli tikirraniza. Ago tigali mananu. Rora akatabu The Bible—God’s Word or Man’s? esuura 7, akatiirwe Abakaiso ba Yahwe.
^ kac. 16 Obworaaba n’ogonza kumanya ebirukukiraho ha bunabbi, n’osobora kusoma ebiri omu burocuwa A Book for All People, rupapura 27-29, eyatiirwe Abakaiso ba Yahwe.
^ kac. 17 Obunabbi bwa Baburoni buli bumu ha bunabbi obuhikiriziibwe omu Baibuli. N’osobora kurora Ebyongiirweho, akacweka 5 kurora obunabbi obundi oburukubaza hali Yesu.
Nosobora Kugonza na Binu;
ENYEGESA ZA BAIBULI ENKURU
Nitusobora Kugumya Tuta Ngu Baibuli Ehikire?
Ruhanga obwaraaba nuwe yahandikisize Baibuli, esemeriire kwahukanaho ebitabu ebindi ebyakahandikwa.
