1, 2. Abantu abaingi bekaguza ki?

BULI kiro tuhurra ebigwererezi by’amaani. Eky’okurorraho, n’osobora kuhurra ngu ekiyaga ky’amaani kihwerekeriize ekyaro, omuntu agenzere omu iramizo y’arasa abantu amasasi. Rundi omukazi aisirwe oburwaire bw’ekokoro, y’aleka abaana bataano.

² Obuhabaho ebigwererezi rundi obutandwa, abantu baingi bekaguza, “Habwaki?” Baingi bekaguza habwaki ensi ijwiremu enobi hamu n’okubonabona? Naiwe wakekaguzaaga habwaki ebizibu nka binu bibaho?

3, 4. (a) Bikaguzo ki Habakuki ebi yakagwize? (b) Yahwe akamugarukamu ata?

³ Baibuli eyoleka ngu abasaija bamu abaali baine okwikiriza okw’amaani bakekaguza ebikaguzo nka binu. Nk’ekyokurorraho, nabbi Habakuki akakaguza Yahwe: ‘Kiki onyoleka okutahiki’ra, norora ha butigi? Baitu okunyaga niitima biri omu maiso gange, kandi haroho empaka, n’enkungani imuka.’—Habakuki 1:3.

⁴ Habakuki 2:2, 3 nirwoleka ngu Ruhanga akagarukamu ebikaguzo bya Habakuki kandi y’amuraganiza kumaraho obutali bwinganiza. (Habakuki 2:2, 3) Baibuli n’eyoleka ngu Yahwe agonza muno abantu. Egamba: “Nakufaaho.” (1 Petero 5:7, NW) Ruhanga anobera kimu okubonabona n’okukira omulingo tukunoba. (Isaya 55:8, 9) Katubazeeho ekikaguzo kinu, Habwaki haroho okubonabona kwingi omu nsi?

5. Amadiini maingi gegesa ki habikwatiraine n’okubonabona? Baibuli eyegesa ki?

⁵ Abebembezi b’amadiini, bagamba ngu kuba kugonza kwa Ruhanga abantu kubonabona. Abamu nibasobora kugamba ngu Ruhanga akategeka ira buli kintu ekirahika h’abantu otwaliremu n’ebintu ebibi, kandi ngu titurukusobora kumanya habwaki ebintu y’abitegekere omulingo nk’ogu. Abamu nibasobora kugamba ngu abantu bafa nukwo bagende kwikara na Ruhanga omu iguru. Ganu tigali mananu. Yahwe tali niwe aletaho ebintu ebibi. Baibuli egamba ngu: “Kimuli hara Ruhanga okukora kubi, Owobusobozi bwona okukora okutahiki’ra!”—Yobu 34:10.

6. Habwaki abantu baingi bajunaana Ruhanga habw’okubonabona okuli omu nsi?

⁶ Abantu bajunaana Ruhanga habw’okubonabona okuli omu nsi habwokuba bateekereza ngu niwe omulemi w’ensi. Baitu nk’okutwayegere omu Suura 3, omulemi w’ensi enu niwe Setani Omuhangirizi.

7, 8. Habwaki haroho okubonabona kwingi omu nsi?

⁷ Baibuli etugambira ngu: “Nensi yona ikaire omu mubi.” (1 Yohana 5:19) Setani omulemi w’ensi aine itima n’ekiniga kingi. Setani nuwe “arukubihabiha ensi zona.” (Okusuku’rwa 12:9) Abantu baingi bakora ebikorwa ebirukusisana n’ebya Setani. Enu niyo nsonga ey’okubanza habwaki ensi yoona ijwiremu ebisuba, enobi, hamu n’itima.

⁸ Haroho ensonga ezindi habwaki ensi yoona erumu okubonabona kwingi. Adamu na Haawa obu bajemiire Ruhanga, bakagwetera abaana baabo ekibi. Kandi ekibi kinu kireteriize abantu kubonabonesa bagenzi baabu, kwetwara kuba ba ha iguru kukira abandi, kurwanisangana, hamu n’okumigirizangana. (Omugambizi 4:1; 8:9)  Ensonga endi eri, abantu boona “bagwerwa kwonka obusumi [n’obutandwa].” (Omugambizi 9:11) Omuntu n’asobora kugwibwaho ekizibu habw’okusangwa ali omu kiikaro nambere ekizibu kibaire kiri ky’okubaho.

9. Habwaki nutusobora kukigumya ngu Yahwe aine ensonga nungi ey’okulekaho okubonabona?

⁹ Yahwe tali niwe arukuleetaho okubonabona. Titusemeriire kumujunaana habw’obulemu, obucwi bw’ebiragiro, hamu n’okumigirizibwa oku abantu barukurabamu. Ruhanga tali niwe arukuletaho emisisa, ebiyaga eby’amaani, rundi okusandaara kw’amaizi. N’osobora kwekaguza, ‘Habwaki Yahwe atatanga ebintu binu kubaho obwaraaba ali niwe arukukirrayo kimu amaani n’obusobozi omu nsi yoona?’ Tukimanyire ngu Ruhanga atufaaho. Baitu aine ensonga nungi habwaki akyalekereho okubonabona.—1 Yohana 4:8.

10. Setani akasoisoimya ata Ruhanga?

¹⁰ Setani akahabisa Adamu na Haawa obu baali omu rugonjo rwa Adeni. Setani akagamba ngu Ruhanga Mulemi mubi. Kandi akoongera y’agamba haroho ekintu kirungi Ruhanga ekyakaba n’asereka Adamu na Haawa. Setani akaba n’agonza batekereze ngu uwe mulemi murungi kukira Yahwe, kandi ngu kikaba kitarukwetaagisa kuba hansi y’obulemi bwa Ruhanga.—Okubanza 3:2-5; rora Ebyongiirweho, akacweka 27.

11. Kikaguzo ki ekitusemeriire kugarukamu?

¹¹ Adamu na Haawa bakajemera Ruhanga. Bakatekereza ngu baali baine obusobozi obw’okwecweramu hagati y’ekihikire n’ekitahikire. Yahwe yakwolekere ata ngu abajeemu baali batahikire, kandi ngu akaba n’agondeza abantu ebintu ebirungi?

12, 13. (a) Habwaki Yahwe atarahwerekeriize abajeemu aho n’aho? (b) Habwaki Yahwe alekere abantu kwerema na Setani kuba mulemi w’ensi?

 ¹² Yahwe atahwerekereze Adamu na Haawa aho n’aho. Akabaleka bazaale abaana. Nukwo y’aheereza abaana ba Adamu na Haawa obugabe bw’okwecweramu ou baraheereza nk’omulemi waabu. Ekigendererwa kya Yahwe kikaba ky’okwijuza ensi yoona n’abantu abahikiriire, kandi n’aija kukihikiriza n’obukiraaba ngu Setani n’alengaho kukiremesa.—Okubanza 1:28; Isaya 55:10, 11.

¹³ Setani akasoisoimya Yahwe omu maiso g’obukaikuru n’obukaikuru bw’abamaraika. (Yobu 38:7; Danieri 7:10) Yahwe akalekera Setani obwire oburukumara nukwo ayoleke ebi yagambire obu biraaba byali by’amananu. Akalekera abantu obwire bw’okwerema hansi y’obusobozi bwa Setani nukwo barole obu baraaba nibasobora kwekorra ekintu kyona ekirungi Yahwe atabakonyire.

14. Abantu betegeriize ki hanyuma ya Yahwe kubalekera obwire bw’okwerema?

¹⁴ Abantu balengereho kwerema kumara emyaka nyingi baitu balemerwe. Kinu nikigumya ngu Setani mubiihi. Abantu nibeetagisa Ruhanga kubakonyera. Nabbi Yeremiya akahikya obu yagambire: “Ai Mukama, manyire nti omuhanda ogwomuntu tiguli omuluwe wenka, tikiri omu muntu arukugenda okuterekereza ebigerebye.”—Yeremiya 10:23.

15, 16. (a) Habwaki Yahwe alekereho okubonabona kumara akasumi kaingi? (b) Habwaki Yahwe ataihireho ebizibu ebireserweho Setani?

¹⁵ Habwaki Yahwe alekere okubonabona kwikaraho akasumi kanu koona? Habwaki atatanga ebintu bibi  kubaho? Kitwaire akaire karaihire kurora abantu bagumya ngu obulemi bwa Setani bulemerwe. Abantu balengereho kutandikaho gavumenti eza buli mulingo baitu balemerwe. Obutali bwinganiza, obunaku, obucwi bw’ebiragiro, hamu n’obulemu byeyongiire kukira n’akara n’obukiraaba ngu ensi n’ekurakurana omu bya kalimagezi. Ruhanga niwe asemeriire kulema abantu hatali abantu kwerema bonka.

¹⁶ Baitu, Yahwe taihireho ebizibu ebya Setani alesereho. Kakuba Ruhanga aihaho ebizibu binu, kikuba nikyoleka ngu n’asagika obulemi bwa Setani. Eki kintu eky’atarukusobora kukora. Ekintu ekindi, abantu bakutekeriize ngu nibasobora kwerema bonka Ruhanga atabebembiire. Kinu nakyo kisuba Ruhanga eky’atarukusobora kusagika habwokuba tabaza ebisuba.—Abaheburaniya 6:18.

17, 18. Yahwe arakorra ki obubi bwona oburugiriire omu bulemi bwa Setani?

¹⁷ Mali nikisoboka Yahwe kugarraho buhyaka buli kintu kyona eki Setani n’abantu be basisire? Ego. Hali Ruhanga, buli kintu kyona nikisoboka. Yahwe amanyire akasumi akalimarraho okusoisoimya kwa Setani. Nubwo alifoora ensi yoona orugonjo nk’oku akaba agondeze. Boona abali “omu bituro” balihumbuuka. (Yohana 5:28, 29) Abantu tibaligaruka kurwara rundi kufa. Yesu alisemeza buli kintu kyona Setani eki y’asiisire. Yahwe alikozesa Yesu nukwo “ahwerekereze emirimo ya Setani.” (1 Yohana 3:8) Nitusiima Yahwe habwokuba atuhaire obwire oburukumara nukwo tweyongere kumumanya kandi twecweremu obu turaaba nitugonza abe mulemi waitu. (Soma 2 Petero 3:9, 10.) N’obututunga okubonabona, atukonyera kugumiisiriza.—Yohana 4:23; soma 1 Abakolinso 10:13.

¹⁸ Yahwe tatuhambiriza okumuheereza. Akatuha ekisembo  eky’obugabe obw’okwecweramu. Leka turole omugaso gw’ekisembo kinu.

19. Kisembo ki eky’omuhendo eki Yahwe atuhaire? Habwaki tusemeriire kumusiima habw’ekisembo kinu?

¹⁹ Ekisembo kinu nikitufoora abembaganiza hali ebisoro. Ebisoro tibyecweramu oihireho bihondera buhondera amagezi agabihangirwemu. Baitu itwe nitusobora kucwamu omulingo turakozesa obwomeezi bwaitu rundi obu turaaba nitugonza kuheereza Yahwe. (Enfumo 30:24) Kandi ekintu ekindi, tituli nk’ebyoma kalimagezi ebitegekerwe kukorra ha biragiro. Twine obugabe obw’okwecweramu ekiturukugonza kuba, abantu abaturukugonza kunywana, n’omulingo turukugonza kukozesaamu obwomeezi bwaitu. Yahwe n’agonza twegondeze omu bwomeezi.

20, 21. Ncwamu ki ey’amagezi ey’osobora kukora omu kasumi kanu?

²⁰ Yahwe n’agonza tumwoleke okugonza. (Matayo 22:37, 38) Ali nk’omuzaire arukugonza omwana we amugambire kuruga ha mutima gwe ngu “Ninkugonza” atahambiriizibwe. Yahwe akatuha obugabe bw’okwecweramu kumuheereza rundi okutamuheereza. Setani, Adamu, na Haawa bakacwamu kujeemera Yahwe. Orakozesa ota ekisembo kyawe eky’okwecweramu?

²¹ Kozesa ekisembo kyawe eky’okwecweramu kuheereza Yahwe. Haroho obukaikuru n’obukaikuru bw’abantu abacwiremu kwanga obulemi bwa Setani nukwo baheereze Yahwe. (Enfumo 27:11) Kiki eky’osemeriire kukora kusobora kuba omu nsi empyaka eya Ruhanga nambere hataliba okubonabona kwona? Esuura erukuhonderaho n’eija kugarukamu ekikagazo eki.