1. Nitugenda kubazaho saara ki?

OBUKAIKURU n’obukaikuru bw’abantu bamanyire esaara ya Isiitwe, rundi ey’abandi beeta Esaara ya Mukama waitu. Yesu akakozesa esaara enu kwegesa abegeswa be omulingo gw’okusabamu. Bintu ki ebi y’abalizeeho omu saara enu? Habwaki saara enu eri nkuru omu kasumi kaitu?

2. Bintu ki bisatu ebiri bikuru ebi Yesu yaturagiire tusabe?

² Yesu akagamba: “Nukwo musabege muti, Isitwe ali omu iguru, ibara lyawe [lyezebwe]. Obukama bwawe buije. Ebyogonza bikorwe hansi nkokubabikora omu iguru.” (Soma Matayo 6:9-13.) Habwaki Yesu y’agambire tusabe ebintu ebi ebisatu?—Rora Ebyongiirweho, akacweka 20.

3. Bintu ki ebirukukwata ha Bukama bwa Ruhanga ebiturukugenda kwegaho?

³ Tukeega ngu ibara lya Ruhanga niryo Yahwe. Kandi tukarora ekingendererwa Ruhanga ainiire abantu hamu n’ensi. Baitu Yesu akaba n’amanyisa ki obu yagambire: “Obukama bwawe buije”? Nitwija kumanya Obukama bwa Ruhanga nikyo kiki, ebintu ebi burakora, n’omulingo burukwija kweza ibara lya Ruhanga.

4. Obukama bwa Ruhanga nikyo kiki, kandi Omukama wabwo nuwe oha?

⁴ Yahwe akataho gavumeenti ye omu iguru kandi akakoma Yesu okuba Mukama wayo. Gavumeenti enu Baibuli egyeta Obukama bwa Ruhanga. Yesu ali “Omukama wabakama, Omulemi wa [w’abalemi].” (1 Timoseo 6: 15) Yesu n’asobora kukora ebintu ebirungi omuntu ondi wena eby’atarukusobora kukora kandi aine obusobozi oburukukira obw’abantu boona abarukulema bateraniziibwe hamu.

5. Obukama bwa Ruhanga nibwija kulemera nkaha, kandi nibwija kulema ki?

⁵ Yesu akagaruka omu iguru hanyuma y’ebiro 40 ahumbuukire. Hanyuma y’akasumi, Yahwe akamufoora Omukama w’Obukama bwe. (Engeso Ezabakwenda 2:33) Gavumeenti ya Ruhanga niija kulemera omw’iguru. (Okusuku’rwa 11:15) Enu niyo ensonga habwaki Baibuli egamba ngu Obukama bwa Ruhanga buli “Obukamabwe obwomu iguru.”—2 Timoseo 4:18.

6, 7. Kiki ekirukufoora Yesu Mukama arukukirrayo kimu abantu boona oburungi?

⁶ Baibuli egamba ngu Yesu n’akirra kimu buli mukama weena habwokuba nuwe wenka “anyina okutafa.” (1 Timoseo 6:16) Abantu boona abali balemi bahikya akasumi nibafa, baitu Yesu talifa. Ebirungi byona ebya Yesu alikora birihangaara.

⁷ Obunabbi obuli omu Baibuli bugamba ngu Yesu aliba Mukama ow’obwinganiza kandi ow’embabazi: ‘N’omwoyo gwa Mukama guliikara haluwe, omwoyo gw’amagezi n’okwetegereza, omwoyo gw’okuhanuura n’amaani, omwoyo gw’okumanya n’ogw’okutiina Mukama. N’okusemererwa kwe kuliba omu kutiina Mukama. Kandi talicwa emisango n’ahondera okurora kwa maiso ge, kunu taliramura n’ahondera okuhu’ra kw’amatuge, baitu nokuhiki’ra nukwo alicwera abanaku, n’aramura eby’obulyo habw’abaculezi abomu nsi.’ (Isaya 11:2-4) Tiwakugondeze kuba n’omukama wa mulingo ogu?

8. Tumanyire tuta ngu Yesu talirema wenka?

⁸ Ruhanga akomeremu abantu abarukugenda kulema  na Yesu omu gavumeenti enu ey’omu iguru. Ekyokurorraho, omukwenda Paulo akagambira Timoseo: “Obutugumisiriza tuliremera hamu nkabakama.” (2 Timoseo 2:12) Bantu baingaha abalirema na Yesu?

9. Bantu baingaha abarukwija kulema na Yesu? Ruhanga akatandika ddi okubakoma?

⁹ Nk’oku twayegere omu Suura eya 7, omukwenda Yohana akabonekerwa yarora Yesu ali Mukama omu iguru kandi ali n’abakama bandi abarukuhika 144, 000. Abantu banu abarukuhika 144,000 nubo baha? Yohana n’asoborra ngu “banyina ibaralye [Yesu] nibara lya Ise lihandikirwe ha buso bwabu.” Akongera yagamba: “Nibo bakuratira Omwana Gwentama [Yesu] nambere agenda hona. Nibo baguzirwe omu bantu.” (Soma Okusuku’rwa 14:1, 4.) Abantu banu 144,000 nibo Yahwe akomeremu omu Bakristaayo abeesigwa kugenda omw’iguru baleme hamu na Yesu ensi enu. Obu bafa, bahumbuurwa nibatwarwa omw’iguru. Kuruga omu biro by’abakwenda, Yahwe aikare n’akomamu Abakristaayo abeesigwa abaraaba bakama nukwo aijuze omuhendo 144,000.

10. Habwaki nitusobora kugamba ngu eri enteekaniza y’okugonza Yahwe okukomamu Yesu hamu n’abantu 144,000 okuba balemi?

¹⁰ Yahwe ayolekere ngu n’atufaaho muno habwokuba ateireho entekaniza y’abantu kulema hamu na Yesu. Yesu n’aija kuba mulemi murungi habwokuba n’amanya ebirukutukwataho. Akabaho muntu nkaitwe, kandi amanyire omulingo abantu babonabona. Paulo akooleka ngu Yesu akwatwaho habw’ebizibu ebi turabamu. Akagamba ngu “titunyina nyakatagara omukuru atarukusobora okusali’rwa hamu naitwe obwobugara bwaitu,” kandi ngu akeegera omwebi “ebiyabonabonisiibwe.” (Abaheburaniya 4:15; 5:8) Abantu 144,000 abakomerwe kuba bakama bamanyire emitalibaine eyi turabamu nk’abantu. Baikaire  nibatalibanizibwa obutahikirra bwabo hamu n’endwaire. Kinu nikitugumya ngu Yesu hamu 144,000 nibamanya omulingo twehurramu n’ebizibu ebiturabamu.

11. Abamaraika boona abaikaraga omw’iguru bakaba nibakora Ruhanga eby’agonza?

¹¹ Habwaki Yesu yaragiire abegeswa be kusaba ngu Ruhanga eby’agonza bikorwe omu nsi nk’okubikorwa omw’iguru? Omu Suura 3 tukarora ngu Setani Omuhangirizi akajeemera Yahwe. Hanyuma y’obujemu bunu, Yahwe akabanza yamuleka n’abamaraika abakaba bamweteranizeho okwikara omu iguru habw’akasumi kake. Nahabwekyo, abamaraika bamu omw’iguru bakaba batarukukora ebi Ruhanga agonza. Omu Suura ya 10, nitwija kwega ebirukukwata hali Setani n’abamaraika be.

12. Bintu ki ebikuru ebirukubalizibwaho omu Okusuku’rwa 12:10?

¹² Baibuli esoborra ngu Yesu obu yafookere Mukama w’Obukama bwa Ruhanga, akatandikiraho kurwanisa Setani. (Soma Okusuku’rwa 12:7-10.) Orukarra 10 nirubazaaho ebintu bibiri ebikuru muno. Eky’okubanza, Obukama bwa Ruhanga butandika kulema kandi Yesu ali Omukama wabwo. Ekyakabiri, Setani anagwa omu nsi kuruga omu iguru. Nk’oku turarora, ebintu binu bikabaho ira.

13. Kiki ekyabaireho omw’iguru hanyuma ya Setani kunagwa omu nsi?

¹³ Baibuli n’esoborra omulingo abamaraika abesigwa basemeriirwemu hanyuma ya Setani n’abamaraika be kunagwa omu nsi. Baibuli egamba: “Nukwo musemererwe iguru nabarukuikaramu.” (Okusuku’rwa 12:12) Kuruga obu, boona abali omw’iguru baine obusinge n’obumu kandi nibakora Ruhanga eby’agonza.

14. Setani kunagwa omu nsi kiresereho bizibu ki?

¹⁴ Baitu obwomeezi omu nsi tiburukusisana n’obw’omu  iguru. Abantu nibahikwaho ebintu ebibi muno habwokuba “Diabolo asirimukire” kandi aine “ekiniga kingi, baitu aboine ngu ayina akacu kake.” (Okusuku’rwa 12:12) Setani aine ekiniga kingi muno. Akabingwa omu iguru kandi hati amanyire ngu ali haihi kuhwerekerezebwa. N’akora kyona ekirukusoboka kurora yaletaho ebizibu, oburumi, n’okubonabona omu nsi yoona.

15. Ekigendererwa kya Ruhanga hali ensi nikyo kiha?

¹⁵ Ekigendererwa kya Ruhanga hali ensi tikikahindukaga. N’agonza abantu abahikiriire baikale omu nsi empyaka. (Zabuli 37:29) Obukama bwa Ruhanga nibwija kuhikiriza buta ekigendererwa kye?

16, 17. Danieri 2:44 nirubaza ki hali Obukama bwa Ruhanga?

¹⁶ Obunabbi obw’omu Danieri 2:44 bugamba: “Kandi omu biro ebyabakama abo Ruhanga owomu iguru aliimukya obukama, obutalihwerekerezebwa ebiro byona, nobukwakuba okulema kwabwo tikulisigirwa ihanga erindi baitu bulicwacwana nubumaraho obukama obu bwona kandi buligumaho ebiri nebiro.” Obunabbi bunu nibutwegesa ki ha Bukama bwa Ruhanga?

¹⁷ Eky’okubanza, ekyahandiikirwe kinu kyolekere ngu Obukama bwa Ruhanga bwakutandikire kulema omu “biro ebyabakama abo.” Kinu nikimanyisa ngu Obukama bwa Ruhanga bukaba nibugenda kutandika kulema gavumenti z’abantu zitakarugireho. Ekyakabiri, orukarra runu nirwoleka ngu Obukama bwa Ruhanga bwakwikaireho ebiro n’ebiro hataroho gavumenti endi yoona erukubwihaho. Ekyakasatu, hakubaireho obulemu, Obukama bwa Ruhanga niburwanisa gavumenti z’abantu. Obukama bwa Ruhanga bwakusingwire kandi nibutandika kulema ensi yoona. Nubwo abantu balitunga gavumenti ey’erukukirrayo kimu oburungi.

18. Obulemu obulibaho hagati y’Obukama bwa Ruhanga na gavumenti z’abantu nibwetwa buta?

 ¹⁸ Obukama bwa Ruhanga nibwija kugaruka buta omu kiikaro kya gavumenti z’abantu? Obulemu bwa Hara-Magedoni butakabaireho, abadaimoni nibaija kuhabisa “abakama bensi zona okubasoroza hamu hali obulemu obwekiro ekikuru ekya Ruhanga Owobusobozi bwona.” Kinu nikyoleka ngu gavumenti z’abantu niziija kurwanisa Obukama bwa Ruhanga.—Okusuku’rwa 16:14, 16; rora Ebyongiirweho, akacweka 10.

19, 20. Habwaki nitwetagisa Obukama bwa Ruhanga kulema ensi?

¹⁹ Habwaki nitwetagisa Obukama bwa Ruhanga? Haroho ensonga isatu. Ey’okubanza, tuli basiisi ekituletereza kurwara n’okufa. Baitu Baibuli eyoleka ngu Obukama bwa Ruhanga obu buliba nibulema, titulifa. Niyo ensonga habwaki Yohana 3:16 rugamba: “Baitu Ruhanga nukwo yagondeze ati Ensi, nahayo omwanawe ayazairwe omu wenka, omuntu wena anyakumuikiriza aleke okubura, baitu atunge obwomezi obutahwaho.”

²⁰ Ensonga yakabiri habwaki nitwetaagisa Obukama bwa Ruhanga eri ngu, ensi ijwiremu abantu ababi. Abantu baingi babaza ebisuba, banyaga, kandi bakora ebintu bibi. Itwe nk’abantu titurukusobora kubiihaho oihireho Ruhanga. Abantu abali nkozi z’ebibi nibaija kuhwerekerezebwa ha kiro kya Hara-Magedoni. (Soma Zabuli 37:10.) Ensonga yakasatu habwaki nitwetaagisa Obukama bwa Ruhanga eri ngu, gavumenti z’abantu ziri nceke, nizitwaza kubi abantu, kandi ngobya. Tizirukwekambisa abantu kworobera Ruhanga. Baibuli egamba ngu haroho “omuntu obwaba nobusobozi okukora kubi omuntu ondi.”—Omugambizi 8:9.

21. Obukama bwa Ruhanga bulikora ki kurora ngu Ruhanga eby’agonza bikozerwe omu nsi?

 ²¹ Hanyuma ya Hara-Magedoni, Obukama bwa Ruhanga nibwija kukora kyona ekirukusoboka kurora ngu Ruhanga eby’agonza bikozerwe omu nsi. Ekyokurorraho, nibwija kwihaho Setani n’abadaimoni be. (Okusuku’rwa 20:1-3) Hanyuma, busaho muntu aligaruka kurwara rundi kufa. Habw’ekicunguro, abantu boona abeesigwa nibaija kutunga omugisa gw’okwikara omu rugonjo ebiro byona. (Okusuku’rwa 22:1-3) Obukama nibwija kweza ibara lya Ruhanga. Kinu nikimanyisa ki? Nikimanyisa ngu gavumenti ya Ruhanga obw’eriba niyo n’erema ensi, abantu boona balihaisa ibara lya Yahwe ekitiinisa.—Rora Ebyongiirweho, akacweka 21.

22. Tumanya tuta ngu Yesu atafooke Mukama obwakaba akyali omu nsi kandi ngu n’obuyagarukire omw’iguru atafookereho Mukama aho n’aho?

²² Yesu akeegesa abeegeswa be kusaba ngu: “Obukama bwawe buije.” Kinu kikaba nikimanyisa ngu Obukama bwali butakaizire ha kasumi ako baitu bwali bw’okwija omu busumi bw’omu maiso. Yahwe akaba aine kubanza kutaho gavumenti ye nubwo afoole Yesu Mukama.  Yesu akafokeraho Mukama obu yagarukireyo omu iguru? Nangwa, akaba aine kubanza kulinda. Hanyuma y’akasumi Yesu ahumbuukire, Petero na Paulo bakasoborra ngu obu yagarukire omw’iguru, obunabbi obuli omu Zabuli 110:1 bukahikirra. Yahwe akagamba: “Ika’ra ha mukono gwange ogwobulyo, Okuhikya obundifora abanyanzigwa bawe akatebe akebigere byawe.” (Engeso Ezabakwenda 2:32-35; Abaheburaniya 10:12, 13) Yesu akaba ali w’okumara akasumi ki alindiriire Yahwe amufoole Mukama?

23. (a) Yesu akatandika di kulema nk’Omukama wa gavumenti ya Ruhanga? (b) Kiki ekiturukwija kwega omu suura erukuhonderaho?

²³ Ira muno omwaka 1914 gutakahikire, akatebe k’Abakristaayo abeesigwa bakooleka ngu omwaka gunu gukaba nigugenda kuba mukuru omu byafaayo kusigikirra ha bunabbi bw’omu Baibuli. Ebiizire nibibaho kuruga 1914 nibikigumya ngu bakabaza ebihikire. Omwaka gunu nubwo Yesu yatandikire kulema nk’Omukama. (Zabuli 110:2) Hakarabaho akaire kake, Setani akanagwa omu nsi kandi hati “ayina akacu kake.” (Okusuku’rwa 12:12) Omu suura erukuhonderaho, nitwija kutunga obwakaiso obundi oburukwoleka ngu tuli omu kasumi akarukubazibwaho. Kandi twija kwongera turole ngu Obukama bwa Ruhanga buli haihi kuhikiriza Ruhanga eby’agonza omu nsi.—Rora Ebyongiirweho, akacweka 22.