1. Noha arukwija kutugambira omulingo oguhikiire kuramya Ruhanga?

AMADIINI agarukukira obwingi gateekereza ngu nigegesa amananu agarukukwata hali Ruhanga. Baitu ago tigali mananu, habwokuba buli diini eyegesa kandi eramya omu mulingo ogurukwahukana. Nitusobora tuta kumanya omulingo oguhikire gw’okuramya Ruhanga? Yahwe nuwe wenka arukutwoleka omulingo oguhikire ogutusemeriire kumuramyamu.

2. N’osobora ota kwega omulingo oguhikire gw’okuramya Ruhanga?

² Yahwe atuheeriize Baibuli nukwo tusobole kumanya omulingo oguhikire ogu tusemeriirre kumuramizaamu. Nahabwekyo weyongere kwega nukwo otunge okugasirwa kuruga omu buhabuzi Yahwe obu arukukuha.—Isaya 48:17.

3. Ruhanga n’agonza tukole ki?

³ Abantu abamu bagamba ngu Ruhanga asiima amadiini goona, baitu ago tigali mananu. Yesu Akagamba: “Omuntu wena anyakungambira ati Mukama wange, Mukama wange, tali ogu alitaha omu bukama obwomu iguru; baitu ogu anyakukora isenyowe ali omu igura ebyagonza.” Nahabwekyo kikuru muno okwega ebi Yahwe agonza nukwo tubikole. Kinu kikuru muno habwokuba Yesu akalengesaniza abantu abatarukworobera Ruhanga n’enkozi z’ebibi, rundi “abakora ebyokwema.”—Matayo 7:21-23.

4. Yesu akagamba ki ha kukora Ruhanga eby’agonza?

⁴ Yesu akoleka ngu tikyanguhire kukora Ruhanga eby’agonza.  Akagamba: “Mutahe omu irembo erifunzire; baitu irembo ligalihire nomuhanda ogurukugenda omu kuhwereke’ra mukoto, nabo abagutahamu baingi. Baitu irembo erifunzire nomuhanda [ogutaaha] omu bwomezi muke, nabo abaguzora bake.” (Matayo 7:13, 14) Omuhanda ogufunzire rundi endamya ey’ehikire n’etutwara omu bwomeezi obutahwaho. Omuhanda ogugalihire rundi endamya ey’etahikire n’etutwara omu kuhwereke’ra. Baitu Yahwe tarukugonza omuntu weena kufa. N’aheereza buli muntu omugisa gw’okwega ebirukumukwataho.—2 Petero 3:9.

5. Osobora ota kumanya abo abarukuramya Ruhanga omu mulingo oguhikire?

⁵ Yesu akakyoleka ngu nitusobora kwetegereza abo abarukuramya omu mulingo oguhikire. Akagamba: “Mulibamanyira ha byana byabu. . . . Omuti gwona ogusemiire gwana ebyana ebisemiire.” (Matayo 7:16, 17) Baitu kinu tikirukumanyisa ngu abali omu diini ey’amananu tibakora ensobi yoona. Abaheereza ba Ruhanga balengaho okukora ebihikire. Katurole ebintu ebiratukonyera kwetegereza abarukuramya omu mulingo oguhikire.

6, 7. Habwaki nitusobora kugamba ngu okuramya okuhikire nikusigikirra ha Baibuli? Ekyokurorraho kya Yesu nikitwegesa ki?

⁶ Okuramya kwaitu kusemeriire kusigikirra ha Baibuli. Baibuli egamba: “Ebihandikirwe byona ebiterekerezebwa omwoyo gwa Ruhanga nibigasa obwokwegesa, nobwokuhana nobwokusobo’ra, nobwokugambi’ra okuli omukuhiki’ra. Nukwo omuntu wa Ruhanga aleke okuburwaho kyona kyona, abe na byona ebyegombere omulimo gwona omurungi.” (2 Timoseo 3:16, 17) Paulo akahandiikira Abakristayo n’agamba ati: “Baitu obumwahairwe itwe  ekigambo kyokuhu’ra, nikyo kya Ruhanga, mutakiihabwe nkekigambo kyabantu, baitu, nkokukiri mali amazima, ekigambo kya Ruhanga.” (1 Abasesalonika 2:13) Okuramya okuhikire kusigikirra ha kigambo kya Ruhanga Baibuli. Tikurukusigikirra ha bitekerezo by’abantu, emigenzo, rundi ekintu kindi kyona.

⁷ Buli kintu kyona eki Yesu y’ayegeseze kikaba nikisigikirra ha Kigambo kya Ruhanga. (Soma Yohana 17:17.) Akakoseza ebyahandiikirwe. (Matayo 4:4, 7, 10) Abaheereza ba Ruhanga bahondera ekyokurorraho kya Yesu obu bakozesa Baibuli omu kwegesa kwabo.

8. Yesu akatwegesa ki ha bikwatiraine n’okuramya Yahwe?

⁸ Tusemeriire kuramya Yahwe wenka. Zabuli 83:18 rugamba: “Niwe wenka, ibara lyawe Yahwe, oli haiguru muno, nolema ensi zona.” Yesu akaba n’agonza abantu bamanye Ruhanga ow’amananu nuwe oha, kandi akabegesa ibara lya Ruhanga. (Soma Yohana 17:6.) Yesu akagamba: “Oramyege Yahwe Ruhanga wawe, kandi nuwe wenka ou osemeriire kuheereza.” (Matayo 4:10, NW) Nahabwekyo, nk’abaheereza ba Ruhanga, tuhondera ekyokurorraho kya Yesu. Turamya Yahwe wenka, tukozesa ibara lye kandi tugonza abantu bamanye ibara eri hamu n’eby’arukugenda kukorra abantu.

9, 10. Twoleka tuta ngu nitugonzangana?

⁹ Tusemeriire kwoleka abantu okugonza kwonyini. Yesu akegesa abakurasibe okugonzangana. (Soma Yohana 13:35.) Okugonza kwonyini nikyo kintu kikuru hagati yaitu baitu hatali itungo, orulimi, rundi nambere turuga. Tugonzangana nk’ab’oruganda n’abanyaanya itwe. (Abakolosai 3:14) Nahabwekyo titwetahya omu bulemu. Baibuli egamba: “Abaana ba Ruhanga bolekerwe, kandi n’abaana ba Setani: wena atarukukora ebyokuhiki’ra tali wa Ruhanga, nobwakuba ogu atarukugonza mugenziwe.”  Eyongera egamba: “Tugonzanganege: tikuli nka Kaini okwakaba ali womubi, kandi akaita mugenziwe.”—1 Yohana 3:10-12; 4:20, 21.

¹⁰ Tukozesa obwire bwaitu, amaani, hamu n‘itungo lyaitu okukonyerangana n’okugaramungana amaani. (Abaheburaiya 10:24, 25) Tukorra “abantu boona” ebintu ebirungi.—Abagaratiya 6:10.

11. Habwaki tusemeriire kwikiriza Yesu nk’omuhanda ogurukutuhikya hali Ruhanga?

¹¹ Nitwetagisa tworobere Yesu habwokuba nuwe muhanda ogurukuhikya hali Ruhanga. Baibuli egamba: “Busaho ibara lindi hansi yiguru eryabahairwe abantu erituhikiriire okutujuna.” (Engeso Ezabakwenda 4:12) Omu Suura 5, tukeega nk’oku Yahwe yatumire Yesu yahayo obwomeezi bwe nk’ekicunguro nukwo asobole kujuna abantu abahulizi. (Matayo 20:28) Yahwe akomeremu Yesu okulema ensi nk’omukama. Egi niyo ensonga habwaki Baibuli etugambira ngu nitwetaagisa kworobera Yesu obuturaaba nitugonza kutunga obwomeezi obutahwaho.—Soma Yohana 3:36.

12. Habwaki tutetahya omu by’obulemi?

¹² Titusemeriire kwetahya omu by’obulemi. Yesu atetahye omu by’obulemi. Obwakaba nacwerwa omusango, akagambira omulemi w’Abaruumi Pirato ati: “Obukama bwange tibuli bwomunsi enu.” (Soma Yohana 18:36.) Naitwe tusagika Obukama bwa Ruhanga bwonka kandi titwetaahya omu by’obulemi byona. Baitu Baibuli etutererra okuhu’raga, “abalemi abakuru” aba gavumenti. (Abarumi 13:1) Tuhondera ebiragiro by’amahanga nambere twikara. Baitu kakuba ekiragiro kya gavumenti kiba nikitutaanga kuheereza Yahwe, tuhondera ekyokurorraho ky’abakwenda obu bagambire, “Kituhikiriire kuhu’ra Ruhanga okukira abantu.”—Engeso Ezabakwenda 5:29; Marako 12:17.

13. Biki ebitutebeza ebirukukwata ha Bukama bwa Ruhanga?

 ¹³ Tumanyire ngu Obukama bwa Ruhanga nubwo bwonka oburukwija kumaraho ebizibu ebiri omu nsi. Yesu akagamba “nenjiri enu eyobukama” eritebezebwa omu nsi yoona. (Soma Matayo 24:14.) Busaho gavumenti z’abantu ezisobora kukora eki Obukama bwa Ruhanga ekiburukwija kukorra abantu. (Zabuli 146:3) Yesu akatwegesa okusaba hali Obukama bwa Ruhanga obu yagambire: “Obukama bwawe buije. Ebyogonza bikorwe hansi nkokubabikora omu iguru.” (Matayo 6:10) Baibuli etugambira ngu Obukama bwa Ruhanga nibwija kuhwerekereza gavumenti z’abantu kandi bwo “buligumaho ebiro nebiro.”—Danieri 2:44.

14. N’otekereza nibaha abarukuramya Ruhanga omu mulingo oguhikire?

¹⁴ Hanyuma y’okwega ensonga enkuru zinu, wekaguze: ‘Nibaha abegesa nibasigikirra ha Baibuli? Nibaha abegesa abantu ibara lya Ruhanga? Nibaha abolekangana okugonza kandi baikiriza ngu Ruhanga akatuma Yesu okutujuna? Nibaha abatetahya omu by’obulemi? Nibaha abatebeza nibooleka ngu Obukama bwa Ruhanga nubwo bwonka oburukwija kumaraho ebizibu by’abantu?’ Ni Bakaiso ba Yahwe.—Isaya 43:10-12.

15. Kiki ekitusemeriire kukora kurora Ruhanga yasiima okuramya kwaitu?

¹⁵ Tikirukumara kumanya bumanya ngu Ruhanga aroho. N’Abadaimoni nabo bamanyire ngu Ruhanga aroho baitu tibamworobera. (Yakobo 2:19) Obuturaaba nitugonza Ruhanga asiime okuramya kwaitu, tusemeriire kukora eby’aturagira hatali kumanya bumanya kwonka ngu aroho.

16. Habwaki tusemeriire okwetantara amadiini ag’ebisuba?

 ¹⁶ Kurora Ruhanga yasiima okuramya kwaitu, tusemeriire okwetantara amadiini eg’ebisuba. Nabbi Isaya akahandiika n’agamba ati: “Murugemu, nukwo mwikale musemeziibwe.” (Isaya 52:11, NW; 2 Abakolinso 6:17) Nahabwekyo tusemeriire kwetantarra kimu ekintu kyona ekiine akakwate n’amadiini ag’ebisuba.

17, 18. “Baburoni Orukuru,” nikyo kiki?, kandi habwaki kikuru kurwetantara?

¹⁷ N’osobora ota kumanya ediini ey’ebisuba? Ediini obw’eba n’eyegesa ebintu ebitali omu Baibuli eba diini y’ebisuba. Baibuli eyeta amadiini goona ag’ebisuba “Baburoni Orukuru.” (Okusuku’rwa 17:5) Habwaki? Hanyuma y’okusandaara kw’amaizi omu busumi bwa Nuha, enyegesa nyingi ez’ebisuba zikatandikira omu rubuga rwa Baburoni. Enyegesa ezi ez’ebisuba zikajanjaara omu nsi yoona. Ekyokurorraho, abantu abaikaraga omu Baburoni baramyaga obusatu. N’omu busumi bwaitu, amadiini maingi geegesa ngu Ruhanga ali mu Busatu, baitu Baibuli eyegesa ngu haroho Ruhanga omu ow’amanamu, Yahwe, kandi Yesu mwana we. (Yohana 17:3) Abantu abaikaraga omu Baburoni baikirizaaga ngu omuntu obwafa haroho ekintu ekimurugamu kikeyongera kwomera, kandi ngu nikisobora kwokebwa omu murro. Ebi bisuba.—Rora Ebyongiirweho, akacweka 14, 17, hamu na 18.

¹⁸ Ruhanga araganiize ngu ali haihi kuhwerekereza amadiini goona ag’ebisuba. (Okusuku’rwa 18:8) N’omanya habwaki kikuru kuruga omu madiini g’ebisuba omu bwangu? Yahwe n’agonza okole encwamu obwire butakahoireyo.—Okusuku’rwa 18:4.

19. Yahwe n’aija kukukonyera mu mulingo ki obworacwamu kumuheereza?

¹⁹ Obworacwamu kuruga omu diini y’ebisuba nukwo  oheereze Yahwe, abanywani n’abanyabuzaale baawe nibasobora okuteetegereza encwamu yaawe kandi nibasobora kukuhiganiza. Yahwe tarukwija kukunagiiriza. Noija kweteraniza ha kitebe ky’Abakaiso ba Yahwe abali omu nsi yoona abarukwolekangana okugonza kwonyini, kandi noija kuba n’okunihira kw’okwikara omu nsi empyaka ebiro byona. (Marako 10:28-30) Kandi, akasumi nikasobora kuhika abanywani n’abanyabuzaale baawe abarukukuhakaniza nibakantandika kwega Baibuli.

20. Habwaki kikuru okuramya Ruhanga omulingo oguhikire?

²⁰ Omu busumi obutali bwahara, Ruhanga n’agenda kumaraho obubi bwona kandi Obukama bwe nibwija okulema ensi yoona. (2 Petero 3:9, 13) Kanikaija kuba akasumi akarungi muno! Abantu boona nibaija kuramiza omu diini emu yonka ey’amananu. Buli omu n’aija kuramya Yahwe omu mulingo oguhikire. Nahabwekyo kikuru muno okole encwamu hati kandi oramye Yahwe omu mulingo oguhikire.