1, 2. Abantu bakira kwekaguza bikaguzo ki?

ABAANA bakaguza muno. N’osobora kumusoborra eky’akukagwize baitu n’ayongera kukukaguza, ‘Habwaki?’ N’obw’olengaho kwongera kumugarukamu eky’akukagwize, ayeyongera kukukaguza, ‘Baitu habwaki?’

² Buli muntu weena akaguza, kaabe mwana rundi muntu mukuru. Obwire obumu twekaguza ha bintu ebiturajwara, ekituragura, rundi eby’okulya ebituraalya. Rundi nitusobora kuba twine ebikaguzo ebiturukwekaguza ebirukukwata ha bwomeezi, n’ekiraabaho omu busumi bw’omu maiso. Baitu nitusobora kuhwa amaani tukalekeraaho kuserra eby’okugarukamu kakuba tulemwa kubitunga.

3. Habwaki abantu baingi bateekereza ngu tibarukusobora kutunga eby’okugarukamu eby’ebikaguzo ebikuru?

³ Baibuli erumu eby’okugarukamu by’ebikaguzo ebikuru ebitukira kwekaguza? Abantu abamu bamanyire ngu Baibuli erumu eby’okugarukamu baitu bagamba ngu tikyanguhire kubyetegereza. Bateekereza ngu abegesa b’amadiini bonka nubo barukusobora kugyetegereza. Abamu baswara kugamba ngu tibamanyire eby’okugarukamu. Iwe n’oteekereza ota?

4, 5. Bikaguzo ki eby’okira kwekaguza? Habwaki osemeriire kwikara nose’ra eby’okugarukamu?

⁴ Naiwe n’osobora kuba n’oyekaguza: Habwaki Ruhanga yampangire? Kiki ekirimpikaho obu ndifa? Ruhanga aine miringo eki? Omwegesa ruranganwa Yesu akagamba: “Musabe, mulihebwa; muse’re, mulizora; mwerange; mulikingu’rwaho.”  (Matayo 7:7) Otalekeraho kuserra kuhikya obw’oratunga eby’okugarukamu ebihikire.

⁵ Obw’oraikara ‘nose’ra’ noija kutunga eby’okugarukamu kuruga omu Baibuli. (Enfumo 2:1-5) Eby’okugarukamu tibigumire. Eby’orayega nibiija kukuletera okusemererwa kandi noija kutunga okunihira kw’obwomeezi obutahwaho. Katubazeeho ekikaguzo ekikyakizire kutalibaniza abantu.

6. Habwaki abantu abamu bateekereza ngu Ruhanga tarukufaayo obu barukuba batungire ebizibu?

⁶ Abantu baingi bateekereza ngu Ruhanga tatufaaho. Bagamba ngu kakuba Ruhanga yali n’atufaaho ensi tiyakubaire nk’oku eri hati. Ijwiremu obulemu, enobi, hamu n’enaku. Abantu barwara, babonabona, kandi bafa. Kinu kireteriize abantu kwekaguza, ‘Ruhanga obwaraaba n’atufaaho, tiyakutangire ebizibu binu kubaho?’

7. (a) Abebembezi b’amadiini baleteriize bata abantu kuteekereza ngu Ruhanga taine embabazi? (b) Habwaki nitukigumya ngu Ruhanga tali nuwe ndugirro y’emihito?

⁷ Abebembezi b’amadini baleteriize abantu kuteekereza ngu Ruhanga tafaayo. Ekintu ekibi obu kibaho, bagamba ngu Ruhanga nukwo agondeze. Bagamba ngu akakitegeka kubaho. Obu bagamba bati, baba nibajunaana Ruhanga. Baitu Baibuli egamba ngu Ruhanga takabaga ndugirro y’ebibi. Yakobo 1:13 nirwoleka ngu Ruhanga takozesa ebibi kulenga abantu. Egamba: “Omuntu wena obwayohebwa aleke kugamba ati ninyohebwa Ruhanga: baitu Ruhanga tasobora okwehebwa nobubi, kandi uwe wenka tayohya omuntu wena.” Kinu nikimanyisa ngu, Ruhanga n’obwaraaba atakatangire ebintu ebibi  kubaho, tali nuwe arukubiletaho. (Soma Yobu 34:10-12.) Katurole ekyokurorraho.

8, 9. Habwaki kitali kirungi kujunaana Ruhanga habw’ebizibu ebitutangatangaana? Hereza eky’okurorraho.

⁸ Teekereza hali omusigazi arukwikara n’abazaire be. Ise n’amugonza muno kandi amwegesa omulingo asemeriire kukora encwamu ezihikire. Omusigazi ajemera ise kandi aruga omuka. Nambere agenda, atandika kukora ebintu ebibi kandi atunga ebizibu. N’osobora kujunaana omuzaire onu habw’okutatanga mutabani we kuruga omuka? Nangwa! (Luka 15:11-13) Nka taata ogu, Ruhanga nauwe atatange abantu obu bacwiremu kumujemera n’okukora ebintu ebibi. Nahabwekyo ebintu bibi obu birabahoga, tulekege kugamba ngu Ruhanga nuwe ndugirro yabyo. Tikiri ky’obwinganiza kujunaana Ruhanga.

⁹ Ruhanga aine ensonga nungi muno habwaki atakaihireho ebintu ebibi. Noija kumanya omulingo Baibuli ebazaaho ensonga enu omu suura 11. Baitu okigumye ngu Ruhanga n’atugonza kandi titusemeriire kumujunaana habw’ebizibu ebiturabamu. Kandi Nuwe wenka arukusobora kubimaraho.—Isaya 33:2.

10. Habwaki nitukigumya ngu Ruhanga n’aija kusemeza ebintu byona eby’abantu basiisire?

¹⁰ Ruhanga ali arukwera. (Isaya 6:3) Buli kintu kyona eky’akora kiba kirungi, kitaine kamogo, kandi kiba kihikiriire. Nahabwekyo, tusemeriire kumwesiga. Abantu tibali nka Ruhanga. Obwire obumu bakora ebintu ebibi. Kandi n’omulemi arukukirayo obwesigwa tasobora kumaraho ebintu ebibi rundi abantu ababi. Busaho muntu aine obusobozi oburukwingana n’obwa Ruhanga. N’asobora kandi n’aija kusemeza ebintu byona eby’abantu basiisire. N’aija kumaraho obubi bwona kandi tibuligaruka kubaho.—Soma Zabuli 37:9-11.

11. Ruhanga ahu’ra ata obw’arora n’obonabona?

¹¹ Ruhanga ahu’ra ata obwarora ebintu ebibi ebirukubaho n’ebizibu eby’orukutunga nk’omuntu? Baibuli eyegesa ngu ‘Mukama n’agonza omusango ogw’obulyo.’ (Zabuli 37:28) Nahabwekyo akwatwaho habw’ebihikire n’ebitahikire. Anobera kimu kurora abantu nibabonabona. Baibuli egamba ngu “kikamubihiza omu mutimagwe” abu yarozere obubi bwijwire ensi yoona eya ira. (Okubanza 6:5, 6) Ruhanga takahindukaga. (Maraki 3:6) Baibuli egamba ngu Ruhanga n’akufaaho nk’omuntu.—Soma 1 Petero 5:7.

12, 13. (a) Habwaki tufaayo, tugonza hali abantu abandi, kandi twehurra tuta obuturora abantu nibabonabona? (b) Habwaki nitukigumya ngu Ruhanga n’aija kumaraho okubonabona n’obutali bwinganiza?

¹² Baibuli eyongera n’egamba ngu Ruhanga akatuhanga omu kisisani kye. (Okubanza 1:26) Eki nikimanyisa ngu akatuhangiramu emiringo ye emirungi. Nahabwekyo, obworaaba osaalirwa kurora abantu nibabonabona, okimanye ngu Ruhanga kimusaaliza n’okukiraho. Habwaki nitugamba tuti?

¹³ Baibuli etugambira ngu “Ruhanga nukwo kugonza.” (1 Yohana 4:8) Buli kintu kyona Ruhanga eky’akora kisigikirra ha kugonza. Tugonza habw’okuba Ruhanga nauwe aine okugonza. Tekereza hali kinu: Kakuba waIi oine obusobozi bw’okumaraho okubonabona n’obutali bwinganiza ebiri omu nsi munu, wakubimazireho? Hataroho okugurukyagurukya wakukikozere habwokuba ogonza abantu. Kandi Ruhanga? Ruhanga n’aija kwihaho okubonabona n’obutali bwinganiza habwokuba atugonza kandi aina obusobozi bw’okubimaraho. Oikale okimanyire ngu  ebintu byona Ruhanga eby’araganiize nk’oku byolekerwe ha nyanjura y’akatabu kanu nibiija kuhikirra. Baitu kugumya ngu mali emirago enu n’egenda kuhikirra, nitwetaagisa tumanye kurungi Ruhanga ayabiraganiize.

14. Ibara lya Ruhanga niryo liha, kandi nitumanya tuta ngu n’agonza tulikozese?

¹⁴ Obwoba n’ogonza kunywana omuntu, kintu ki eky’obanza kumugambira? Ibara lyawe. Ruhanga aine ibara? Amadiini maingi gagamba ngu ibara lye niryo Ruhanga rundi Mukama. Ganu tigali mabara, baitu bitiinisa nk’oku “mukama” rundi “purezidenti” biri bitiinisa. Ruhanga atugambira ngu ibara lye niryo Yahwe. Zabuli 83:18 rugamba: “Nukwo bamanye ngu niwe wenka, ibara lyawe Yahwe, oli haiguru muno, nolema ensi zona.” Abahandiikire Baibuli bakakozesa ibara lya Ruhanga emirundi enkumi n’enkumi. Yahwe n’agonza omanye ibara lye kandi olikozese. Nakugambira ibara lye nukwo ofooke munywani we.

15. Ibara Yahwe limanyisa ki?

¹⁵ Ibara Yahwe, liina amakuru ag’embaganiza. Limanyisa ngu Ruhanga n’asobora kuhikiriza buli kintu kyona eky’aba araganiize kandi n’asobora kuhikiriza ekigendererwa  kye. Tiharo kintu kyona ekirukusobora kumulemesa. Yahwe wenka nuwe arukusemerra ibara linu. *

16, 17. Ebigambo binu bimanyisa ki (a) “Ow’Obusobozi bwona”? (b) “Omukama owaira naira”? (c) “Omuhangi”?

¹⁶ Nk’oku tusomerege, Zabuli 83:18 rugamba: ‘Niwe wenka, oli haiguru muno.’ Kandi, Okusuku’rwa 15:3 rugamba: “Ebiwakozire bikuru kandi byamahano, Ai  Mukama Ruhanga Owobusobozi bwona; emihanda yawe ehikirire kandi yamazima, iwe Mukama owaira naira.” Ekitinisa “Owobusobozi bwona” kimanyisa ki? Kimanyisa ngu Yahwe nuwe arukuki’rayo kimu buli muntu obusobozi. Ekitinisa “Mukama owaira naira” nikimanyisa ngu Mukama nuwe aikaireho ebiro byona. Zabuli 90:2 rwoleka ngu Ruhanga akabaho ebintu byona bitakahangirwe kandi ngu n’aija kubaho ebiro n’ebiro. Ekyo tikiri ky’okuhuniriza mali!

¹⁷ Yahwe nuwe Omuhangi w’ebintu byona. Okusuku’rwa 4:11 rugamba: “Osemeriire, ai Mukama Ruhanga waitu, okuhabwa ekitinisa nokutinwa nobusobozi: baitu niwe wahangire byona, kandi nkokuwagondeze bikabaho, kandi bikahangwa.” Abamaraika, enyunyuzi, ebijuma ebyana ha miti, encu, na buli kintu kyona kikahangwa Yahwe.

18. Habwaki abantu abamu basobora kuteekereza ngu tikirukusoboka kuba banywani ba Ruhanga? Baitu Baibuli yo egamba eta?

¹⁸ Abantu abamu obu basoma ha miringo ya Yahwe, kibaletera kwekaguza, ‘Ruhanga anyakwine obusobozi, ekitiinisa, kandi anyakuli hara muno n’abantu n’asobora kufaayo hali nyowe omuntu buntu?’ Baitu Ruhanga nukwo ateekereza ati? Nangwa. Yahwe n’agonza kutwirra haihi. Baibuli egamba ngu Ruhanga tali “hara nomu wena haliitwe.” (Engeso Ezabakwenda 17:27) Ruhanga n’agonza omwirre haihi, kandi n’araganiza ngu ‘nauwe alikwirra haihi.’—Yakobo 4:8.

19. (a) Osobora ota kufooka munywani wa Ruhanga? (b) Mulingo ki ogwa Yahwe ogurukukira kukusikiriza?

¹⁹ N’osobora ota kufooka munywani wa Ruhanga? Yesu akagamba: “Bunu nubwo bwomezi obutahwaho, okumanya iwe Ruhanga omu owamananu, nogu ouwatumire, Yesu Kristo.” (Yohana 17:3) Weyongere kwega nukwo omanye kurungi Yahwe na Yesu, eki nikijja kukurugirramu obwomeezi obutahwaho. Ekyokurorraho, tumazire ira kwega ngu “Ruhanga nukwo kugonza.” (1 Yohana 4:16) Yahwe aina emiringo endi emirungi. Baibuli etugambira ngu Yahwe “aijuire okuganyira kandi owembabazi, aikaraho okutabihirwa, asagire ebyokuganyira namazima.” (Okuruga 34:6) Yahwe ‘murungi kandi arahuka kuganyira.’ (Zabuli 86:5) Ruhanga agumisiriza kandi mwesigwa. (Abaheburaniya 10:23; 2 Petero 3:9) Noija kweyongera kumanya emiringo endi emirungi obw’orayeyongera kwega Baibuli.

20-22. (a) Osobora ota kwirra haihi na Ruhanga kandi kunu otarukusobora kumurora? (b) Kiki eky’osemeriire kukora kakuba omuntu weena alengaho kukulemesa kwega Baibuli?

²⁰ N’osobora ota kwehurra oli haihi na Ruhanga kandi  kunu otarukusobora kumurora? (Yohana 1:18; 4:24; 1 Timoseo 1:17) Obw’osoma Baibuli, ekukonyera kumanya Yahwe nk’omuntu. (Zabuli 27:4; Abarumi 1:20) Obworayeyongera kwega hali Yahwe, noija kweyongera kumugonza kandi noija kumwirra haihi.

²¹ Noija kumanya ngu Yahwe nuwe Isiitwe. (Matayo 6:9) Akatuheereza obwomeezi kandi n’agonza na hati tube n’obwomeezi oburungi. Eki nikyo taata ow’engonzi agondeza abaana be. (Zabuli 36:9) Baibuli eyegesa ngu n’osobora kuba munywani wa Ruhanga. (Yakobo 2:23) Kiteekerezeeho, Yahwe Omuhangi w’ebintu byona n’agonza obe munywani we!

²² Abantu abamu nibasobora kukulemesa kwega Baibuli. Basobora kuba nibateekereza ngu noija kuruga omu diini yaawe. Otaikiriza omuntu weena kukulemesa kuba munywani wa Yahwe. Nuwe munywani arukuki’rayo kimu oburungi ow’osobora kutunga.

23, 24. (a) Habwaki osemeriire kwikara n’okaguza ebikaguzo? (b) Nitwija kwega hali ki omu suura erukuhonderaho?

²³ Obworaaba n’oyega Baibuli, haroho ebintu eby’otarukwija kwetegerereza habwawe. Otaswara kukaguza rundi kusaba bakusoborre. Yesu akagamba ngu tusemeriire kuba nk’abaana abato abakaguza ebikaguzo bingi. (Matayo 18:2-4) Ruhanga n’agonza otunge eby’okugarukamu. Nahabwekyo lengaho kwega Baibuli nukwo orole obworaaba noyegesebwa amananu.—Soma Engeso Ezabakwenda 17:11.

²⁴ Omulingo ogukyakirireyo kimu ogw’okwega hali Ruhanga nukwo kwega Baibuli. Omu suura erukuhonderaho, nitwija kumanya habwaki Baibuli eyahukanaho hali ebitabu bindi.