ISOMO 42
Baibuli Eyegesa Ki ha Kutaba omu Buswere n’Okuba omu Buswere?
Omu nganda ezindi, abantu batekereza ngu omuntu tasobora kuba n’okusemererwa atataahire obuswere. Baitu, tibali boona abali omu buswere ngu baine okusemererwa kandi ngu boona abataburumu tibakwine. Amananu gali ngu Baibuli ebazaaho kuba omu buswere n’okutaba omu buswere nk’ebisembo.
1. Birungi ki ebinyakuli omu kutaba mubuswere?
Baibuli n’egamba ngu: “Ogu ow’ataaha obuswere aba akozere kurungi, baitu ogu ow’atabutaaha akora kurungi muno.” (Soma 1 Abakolinso 7:32, 33, 38, “NWT”) Omuntu ow’atali omu buswere akora “kurungi muno” omu mulingo ki? Abakristaayo abatali omu buswere tibagira bujunanizibwa obw’okurolerra omuntu ondi. Nahabweki, bakira kuba n’obugabe bwingi. Abamu basoboire kwongera ha buheereza bwabo, ekyokurorraho, kugenda omu nsi endi kutebeza amakuru amarungi. Kandi ekirukukira obukuru nibasobora kukozesa obwire bwabo oburukukira obwingi kwirra haihi na Yahwe.
2. Birungi ki ebinyakuli omu kuba omu buswere obuhandiikisize?
Kusisanaho n’okutaba omu buswere, kuba omu buswere nakyo kirumu ebirungi bingi. Baibuli egamba eti: “Babiri nibakira omu.” (Omugambizi 4:9) Kandi ganu mananu kukira muno obukirukuhika hali Abakristaayo abarukuhondera emisingi ya Baibuli omu buswere bwabo. Omusaija n’omukazi abahandiikisa obuswere bwabo, baraganiza kugonzangana, kutamungana ekitiinisa, na buli omu kurora mutahi we nk’ow’omuhendo. Ekirugamu bahurra baine obulinzi kukira abo abarukwikara hamu kwonka. Ekindi abaana bahurra baine obulinzi.
3. Yahwe arora ata obuswere?
Yahwe obuyatandikireho obuswere, akagamba ati: “Omusaija nikyo alirekera ise na nyina, aterane na mukaziwe.” (Okubanza 2:24) Yahwe n’agonza omusaija na mukazi we bagonzangane kandi baikale hamu obwomeezi bwabo bwona. Aikiriza kugaitururwa kakuba omu halibo asiihana. Omu nyikara nk’egi, Yahwe aha ogu ow’ataine musango obugabe bw’okucwamu obw’araaba n’agonza kugaitururwa. a (Matayo 19:9) Yahwe taikiriza Abakristaayo kutaaha obuswere n’omuntu arukuhingura hali omu.—1 Timoseo 3:2.
YEGA EBIRUKUKIRAHO
Manya omulingo osobora kusemererwa kandi okasemeza Yahwe, koobe oli omu buswere rundi otaburumu.
4. Kozesa kurungi ekisembo eky’okutaba omu buswere
Yesu akarora okutaba omu buswere nk’ekisembo. (Matayo 19:11, 12) Musome Matayo 4:23, Hanyuma mubazeeho ekikaguzo kinu:
-
Yesu akakozesa ata ekisembo eky’okutaba omu buswere kuheereza Ise, n’okukonyera abandi?
Abakristaayo abatali omu buswere nibasobora kwegondeza omu kutaba omu buswere nka Yesu. Mutekeho VIDIYO, hanyuma mubazeeho ekikaguzo ekirukuhonderaho.
-
Miringo ki enungi Abakristaayo abatali omu buswere eibasobora kukozesaamu obwire bwabo?
Obaire okimanyire?
Baibuli tebazaaho emyaka omuntu ey’asemeriire kubanza kuhikya atakataahire omu buswere. Baitu, egamba ngu omuntu asemeriire kuba ahingwize “emyaka ey’obusigazi,” akasumi nambere kisobora kugumira omuntu kukora encwamu ey’amagezi.—1 Abakolinso 7:36, “NWT.”
5. Kozesa amagezi obworukuba n’okomamu ow’okutaaha nauwe omu buswere
Kukomamu ow’okutaaha nauwe omu buswere eri ncwamu ey’amaani ey’osobora kukora. Musome Matayo 19:4-6, 9, hanyuma mubazeeho ekikaguzo kinu:
-
Habwaki Omukristaayo atasemeriire kwanguhiriza kutaaha obuswere?
Baibuli n’esobora kukukonyera kumanya emiringo enungi ey’osemeriire kuserra omu muntu oworukugonza kutaaha nauwe obuswere. Ekirukukira obukuru nukwo kutaaha omu buswere n’omuntu aw’arukugonza Yahwe. b Musome 1 Abakolinso 7:39 na 2 Abakolinso 6:14. hanyuma, mubazeeho ebikaguzo binu:
-
Habwaki tusemeriire kutaaha obuswere n’Abakristaayo bangenzi baitu bonka?
-
Notekereza Yahwe n’asobora kwehurra ata kakuba tutaaha obuswere n’omuntu ow’atarukumugonza?
Kakuba ebisoro bibiri ebitarukwingana biteekwa omu kikoligo kimu, byona nibiija kubonabona. Nikyo kimu, n’Omukristaayo ow’ataaha omu buswere n’omuntu atarukuheereza Yahwe naija kutunga ebizibu bingi
6. Rora obuswere nk’oku Yahwe aburora
Omu Isaleri eya kara, abasaija abamu babingaga bakazi baabo habw’ensonga ez’okwegondeza bonka. Musome Maraki 2:13, 14, 16, hanyuma mubazeeho ekikaguzo kinu:
-
Habwaki Yahwe atakigonza abantu obu bagaitururwa nibasigikirra ha nsonga ezitarukusigikirra ha Baibuli?
Obusiihani hamu n’okugaitururwa bireetera ow’ataine musango hamu n’abaana kubonabona
Mutekeho VIDIYO, hanyuma mubazeeho ekikaguzo ekirukuhonderaho.
-
Obw’oraaba oli omu buswere n’omuntu ow’atarukuheereza Yahwe, n’osobora kukora ki kuba n’obuswere oburumu okusemererwa?
7. Teeka omu nkora endengo za Yahwe ezirukukwata ha buswere
Nikisobora kwetaagisa omuntu kukora empindahinduka ez’amaani kuteeka omu nkora endengo za Yahwe ezirukukwata ha buswere. c Baitu Yahwe aha omugisa abo abazihondera. Mutekeho VIDIYO.
Musome Abaheburaniya 13:4, hanyuma mubazeeho ebikaguzo binu:
-
N’otekereza ngu endengo za Yahwe ezirukukwata ha buswere z’amagezi? Habwaki?
Yahwe nanihirramu Abakristaayo kuhandiikisa obuswere n’okuhandiikisa okugaitururwa, habwokuba omu mahanga maingi gavumenti z’etaagisa abantu kuhandiikisa obuswere n’okugaitururwa. Musome Tito 3:1, hanyuma mubazeeho ekikaguzo kinu:
-
Obw’oraaba oli omu buswere, n’okigumya ngu obuswere bwawe nibwikirizibwa omu gavumenti?
OMUNTU N’ASOBORA KUKAGUZA: “Habwaki ngaitwa? Omusaija n’omukazi tibasobora kwikara hamu batagaisirwe?”
-
Wakugarukiremu ota?
OYEGERE KI?
Kuba omu buswere n’okutaba omu buswere byona bisembo kuruga hali Yahwe. Byona nibisobora kuleeta okusemererwa n’okumarwa kakuba babyegondezaamu nk’oku Yahwe arukugonza.
Kweijukyamu
-
Omuntu ow’atali omu buswere n’asobora ata kukozesa kurungi omugisa ogu?
-
Habwaki Baibuli n’egamba ngu tusemeriire kutaaha omu buswere n’Omukristaayo mugenzi waitu wenka?
-
Baibuli eha nsonga ki ey’esobora kuleetera abaswerangaine kugaitururwa?
SERULIIRIZA
Nikimanyisa ki kuswera rundi kuswerwa “omu Mukama waitu”?
“Ebikaguzo Kuruga omu Basomi Baitu” (Watchtower, eya Julaayi 1, 2004)
Rora vidiyo ibiri engufu ezisobora kukukonyera kukora encwamu enungi ezirukukwata ha kujumbira n’okutaaha obuswere.
Manya ensonga habwaki ow’oruganda omu n’arora ngu Yahwe ebyamuhaire nibikira ebintu byona ebiyayeferiize.
Omuntu asemeriire kubanza kutekerezaaho bintu ki atakacwiremu kugaitururwa rundi kwahukana n’owali nauwe omu buswere?
“Teekamu Ekitiinisa “Ruhanga Ekiyateranize Hamu” (Omunaara gw’Omulinzi, ogwa Desemba 2018)
a Rora Ebyongiirweho 4 ebirukukwata ha kwahukana obuharukuba hatabaireho busiihani.
b Omu nganda ezindi, abazaire nubo baserurra abaana baabo ab’okutaaha nabo obuswere. Obukiraaba nukwo kiri, abazaire abaine okugonza tibatekerezaaho sente rundi ekitiinisa omuntu aine baitu batekerezaaho omuntu ogu obw’araaba n’agonza Yahwe.
c Obw’oraaba noikara n’omuntu ow’otagaisirwe nauwe, eri ncwamu yaawe kumuleka rundi kugaitwa nauwe.
