Baibuli ekaragura ngu hanyuma y’okufa kwa Yesu, omu kitebe Ekikristaayo hakwimukiremu abanabbi ab’ebisuba kandi babuzebuze amananu. (Engeso 20:29, 30) Ekyo kikabaho kwo mali. Bakatabura enyegesa z’ekikafiiri hamu ne za Yesu, eky’aimukizeho Abakristaayo ab’ebisuba. (2 Timoseo 4:3, 4) Tusobora tuta kukigumya ngu itwe twine enyetegereza ya Baibuli enyakuhikire?

Akasumi aka Yahwe kusukurra abantu amananu kakahika. Akaranga ngu ‘omu kasumi akaha mpero, okumanya kulyeyongera.’ (Danieri 12:4) Omu mwaka 1870, akatebe k’abantu abaali nibaserra amananu bakakyetegereza ngu nyingi ha nyegesa z’amakanisa zaali zitarukusigikirra ha Byahandiikirwe. Nahabwekyo bakatandiika kuseruliriza enyegesa za Baibuli zonyini kandi Yahwe akabaha omugisa.

Abasaija abesigwa bakatandika kusoma Baibuli n’ekigendererwa ky’okugyetegereza. Abeegi ba Baibuli banu bakakozesa omulingo gw’okusoma Baibuli ogutukyahondera omu kasumi kanu. Bakecencura enyegesa za Baibuli. Obubalemwaga kwetegereza ekicweka kimu omu Baibuli, baserulirizaaga enkaarra ezindi ezabakonyeraga kukyetegereza. Obu kyaikiranizaaga n’Ebyahandiikirwe ebindi, bakikirizaaga. Kukozesa Baibuli omu mulingo gunu kikabakonyera kuzonzora amananu agarukukwata ha ibara lya Ruhanga n’Obukama bwe, ekigendererwa kye hali abantu n’ensi, omulingo ogu abafiire barumu, n’okunihira okw’okuhumbuka. Okuseruliriza kwabu kukabakonyera kwecwa ha nyegesa ez’ebisuba n’ebikorwa ebibi.—Yohana 8:31, 32.

Nambere omwaka 1879 gwahikiire, abeegi ba Baibuli baali bakyetegerize ngu abantu boona baali baine kumanyisibwa amakuru amarungi. Omu mwaka ogu bakatandiika kuteera akatabu akarukwetwa, The Watchtower Announcing Jehovah’s Kingdom, akakyateerwa buli kwezi. Omu kasumi kanu amananu agali omu Baibuli nitugatebeza omu nsi ezirukuhingura omu 240, kandi omu ndimi ezirukuhingura omu 750. Amakuru amarungi gatebeziibwe mali!

• Kiki ekyahikire ha mananu agali omu Baibuli hanyuma y’okufa kwa Yesu?

• Kiki ekitukonyiire kuzonzora amananu agali omu Kigambo kya Ruhanga?