Nobukiraaba ngu Yahwe akaba atakahaire ekiragiro ekirukutanga kuramya ebisisani, Yakobo akaba akimanyire ngu Yahwe wenka nuwe asemeriire kuramibwa. (Kurug 20:3-5) Nahabweki Yahwe obuyamugambiire kugaruka Beseri, Yakobo akaragira buli muntu weena ow’akaba ali nauwe kweyihaho ebisisani bye. Yakobo akamara yanaga ebisisani otwaliremu n’ebyoma by’amatu ebibakiraga kujwara nibateekereza ngu bisobora kubaletera emigisa rundi kubalinda. (Kub 35:1-4) Hataroho kugurukyagurukya Yahwe akasemererwa habw’ekintu Yakobo yakozere.

Kasumi kanu, nitusobora tuta kwoleka ngu Yahwe wenka nuwe asemeriire kuramibwa? Tusemeriire kwetantara ekintu kyona ekiine akakwate n’okuramya ebisisani rundi oburaguzi. Kinu nikitwarramu kweyihaho ebintu ebiine akakwate n’eby’amasano hamu n’okwekebiija eby’okwesemeza byaitu. Ekyokurorraho, wekaguze: ‘Ngonza ebitabu, rundi filimu ezirumu ebintu nka vampaya, emizimu, rundi amaani agatali ga buli kiro? Eby’okwesemeza byange byoleka amasano, oburogo, rundi kubandwa nk’ebitaine kabi?’ Tusemeriire kwetantarra kimu ebintu byona Yahwe eby’anoba.—Zab 97:10.

MUROLE VIDIYO “RWANISA SITAANI,” HANYUMA MUGARUKEMU EBIKAGUZO BINU:

• Bizibu ki ebyahikire ha mwegi wa Baibuli arukwetwa Palesa?

• Habwaki kikuru kuserra obukonyezi kuruga omu bagurusi b’ekitebe kakuba iwe, omuntu ondi, rundi omwegi wawe wa Baibuli aba natalibanizibwa ekizibu ky’oburaguzi?

• Obuturaaba nitugonza obulinzi bwa Yahwe, bintu ki ebitusemeriire kwetantara?

• Kiki Palesa ekiyakozere aho naaho?

• Miringo ki eyosobora kwetantaramu badaimoni omu kiikaro nambere orukwikara?