Obworora ekyakyo ekirungi, iguru liijwire enyunyuzi, rundi ekiisurumba, otekerezaaho Omuhangi w’ebintu binu? Ebintu ebitwetoroire Yahwe ebiyahangire byolekera kimu emiringo ye ey’etakurorwa. (Bar 1:20) Obututunga obwire kutekerezaaho ebintu ebiturora, kitukonyera kwetegereza emiringo ya Ruhanga nk’amaani ge, okugonza kwe, amagezi ge, obwinganiza bwe, hamu n’obugabi.​—Zab 104:24.

Bintu ki Yahwe ebiyahangire eby’orora buli kiro? N’obworaaba oikara omu rubuga, n’osobora kurora ebinyonyi rundi emiti. Kutekerezaaho ebintu Yahwe yahangire nikitukonyera kukehyaho kweralikirra, kwebembeza ebintu ebirukukira obukuru, kandi n’okwongera kwesiga ngu Yahwe aine obusobozi obw’okuturolerra ebiro n’ebiro. (Mat 6:25-32) Obworaaba oine abaana, bakonyere kwetegereza emiringo ya Yahwe ey’embaganiza. Obuturayeyongera kwoleka ngu nitusiima ebintu Yahwe yahangire, nitwija kweyongera kwirra haihi n’Omuhangi waitu.​—Zab 8:3, 4.

MUROLE VIDIYO EBINTU RUHANGA YAHANGIRE BYOLEKA EKITIINISA KYE​—EKYEREREZI HAMU N’ERAANGI, KANDI HANYUMA MUGARUKEMU EBIKAGUZO BINU:

• Kiki ekitusobozesa kurora eraangi?

• Kiki ekiretera eraangi ezimu kuhinduka kusigikirra nambere oziroliire?

• Kiki ekiretera iguru kuba n’eraangi ezirukwahukana?

• Raangi ki ezirukusikiriza ez’ebintu Yahwe yahangire, ez’orozere haihi n’eka yaawe?

• Habwaki tusemeriire kutunga obwire obw’okwetegereza muno ebintu Yahwe yahangire?