Wesisanirize ngu noikara omu Galiraya omu kasumi ka Yesu. Ogenzere omu Yerusalemu kujaguza Obugenyi bw’Enkande. Orubuga rwijwiremu abantu abaizire kuramya kuruga omu biikaro ebya hara. Nogonza kuhayo ekihongwa hali Yahwe, osika embuzi yawe kugirabya omu rubuga orwijwiremu abantu baingi n’ogitwara ha yekaru. Obwohika ha yekaru, osanga naho haliyo abantu baingi abaizire kuhonga ebihongwa by’abo. Obwire bwawe, obw’okuhayo ekihongwa hali banyakatagara buhika. Baitu oijuka ngu mugenzi wawe aine eky’akukujunana, kandi n’asobora kuba ali omu h’abantu abaingi abali ha yekaru rundi abali omu rubuga. Yesu natugambira eky’okukora. (Soma Matayo 5:24.) Iwe na mugenzi wawe ow’otungire nauwe obutetegerezangana nimusobora muta kugarraho obusinge nk’oku Yesu yagambire? Omu by’okugarukamu ebihairwe, taho emanyikirizo nambere hali eky’okugarukamu ekihikire.

OSEMERIIRE . . .

• kubaza na mugenzi wawe obw’oraaba niwe omusobiize

• kulengaho kumuhabura obw’oraaba norora ngu n’abihirwa bwangu rundi nauwe akakusobeza

• kubanza kuhuliriza mugenzi wawe obw’araaba n’akusoborra enyehurra ye, kandi n’obworaaba otamwetegeriize, musabe ekiganyiro kurugira kimu ha mutima habw’okumusaliza rundi habw’ebi byona ebirugire omu enyetwaza yawe

MUGENZI WAWE ASEMERIIRE . . .

• kugambira abandi omu kitebe nk’oku omu bihiize nukwo bamusagike

• kukutabukira, kukugambira nk’oku wa musobiize kandi n’okukuragira kwikiriza ensobi yawe

• kurora obwebundaazi n’obumanzi obwoyolekere kusobora kumuhikirra, kandi nukwo akuganyire kuruga ha mutima

N’obukiraaba ngu hati omu kuramya kwaitu titukyahonga ebisoro, Yesu akoleka ata akakwate akali hagati y’enkoragana yaitu n’ab’oruganda hamu n’okuramya kwaitu?