Buli mwaka abantu ba Yahwe baikara balindiriire n’ekihika kwijuka okufa kwa Yesu. Omu wiiki ez’okubanza ekiijukyo kitakabaireho na hanyuma y’okuhwa, tukozesa akasumi kanu akembaganiza kukugiza Yahwe n’okwoleka okusiima kwaitu habw’ekisembo ky’ekicunguro. (Bef 1:3, 7) Ekyokurorraho, tutekamu amaani maingi kuraaliza abantu ha Kiijukyo. Abamu nibasobora kukora empindahinduka nukwo baheereze nk’abapayoniya abasagiki n’ekigendererwa eky’okuhayo esaaha 30 rundi 50 omu kwezi kwa Maaci na Apuli. Wakugondeze kwongera ha bwire obw’omara omu kutebeza omu kasumi ak’Ekiijukyo? Kiki ekirakukonyera kukikora?

Tukira kuhika ha bigendererwa byaitu obutwetekaniza kara. (Nfu 21:5) Nk’oku Ekiijukyo kiriyo nikirra haihi, kanu nuko akasumi otandike kukora entekaniza. Tekerezaaho omulingo wakugondeze kwongera ha buheereza bwawe omu kasumi ak’Ekiijukyo, hamu n’eky’osemeriire kukora kuhika ha bigendererwa byawe. Hanyuma osabe Yahwe ahe omugisa entekaniza zaawe zoona.​—1Yoh 5:14, 15.

N’osobora kutekerezaaho emu ha miringo osobora kwongera ha buheereza bwawe omu kasumi k’Ekiijukyo?