Omu Baibuli harumu ebyokurorraho bingi eby’esaara Yahwe eziyagarukiremu. Abaheereza ba Ruhanga obubaarozere omulingo Yahwe yahuliire okusaba kwabo kandi yabakonyera, hataroho kugurukyagurukya okwikiriza kwabo kukeyongera kuguma. Nahabweki, kirungi obuturukuba nitusaba kugamba ebintu byonyini ebiturukwetaaga kandi tulengeho kumanyirra omulingo Yahwe agarukamu esaara zaitu. Oikale noijuka ngu omulingo agarukamu nigusobora kwahukanira kimu ha biturukuba tusabire rundi n’atukorra ekirukukira ha bitusabire. (2Kol 12:7-9; Bef 3:20) Bintu ki Yahwe eby’asobora kutuha kugarukamu esaara zaitu?

• Amaani ag’omubiri, omu biteekerezo rundi kutuha okwikiriza tukagumira ekizibu.​—Baf 4:13

• Amagezi ag’okukora encwamu enungi.​—Yak 1:5

• Okugonza n’amaani ag’okukora ekintu.​—Baf 2:13

• Okutekaana obuturukuba twetuntwire.​—Baf 4:6, 7

• Obusagiki n’okuhuumuzibwa kuruga omu bantu abandi.​—1Yoh 3:17, 18

• Kukonyera abo abatuba tusabiire.​—Eng 12:5, 11

MUROLE VIDIYO YAHWE “ANYAKUHURRA OKUSABA,” HANYUMA MUGARUKEMU EBIKAGUZO BINU:

• Ekyokurorraho ky’Ow’oruganda Shimizu nikisobora kita kutugarramu amaani kakuba tuba nitulemesebwa kukora ekitwakugondeze habw’obuceke omu bwomeezi?

• Nitusobora tuta kwegera ha kyokurorraho ky’Ow’oruganda Shimizu?