Ekiijukyo kitukoonyera kucumiitiriza ha migisa eyi turatunga omu busumi bw’omu maiso kuraba omu kicunguro. Okuhumbuuka guli gumu ha migisa turukwija kutunga. Yahwe atahange abantu kwikaraho habw’obwire butaito hanyuma bakafa. Enu niyo nsonga habwaki okufeerwa omugonzebwa kiri kimu ha bintu ebitusaaliza muno. (1Kol 15:26) Yesu akakwatwaho muno obu y’aboine abegeswa be nibarra habw’okufa kwa Lazaro. (Yoh 11:33-35) Kusigikirra nk’oku Yesu ali omu kisisani kya Ruhanga, nitugumya ngu Yahwe nauwe akwatwaho muno obwarora abantu nibarra habw’okufeerwa abantu baabu. (Yoh 14:7) Yahwe aine ekihika ky’okuhumbuura abaheereza be kandi naitwe tusemeriire kuba n’ekihaka ky’okulindirra okuhumbuuka.—Yob 14:14, 15.

Okuhumbuuka nikugenda kubaho omu mulingo oguteekaniziibwe habwokuba Yahwe ateekaniza kurungi ebintu bye. (1Kol 14:33, 40) Omu kiikaro ky’okuba n’emikoro ey’okuziika, nihasobora kubaho emikoro ey’okutangirra abahumbuukire. Ocumiitiriza ha kuhumbuuka obwoba oine enaku habw’okufeerwa omugonzebwa waawe? (2Kol 4:17, 18) Osiima Yahwe habw’okutuheereza ekicunguro na habw’okukozesa ebyahandiikirwe kutuha okunihira kw’okuhumbuuka?—Bak 3:15.

• Nibaha omu banywani baawe rundi omu banyabuzaale baawe aba wakugondeze kubanza kurora bahumbuukire?

• Bantu ki abarukubazibwaho omu Baibuli abawakugondeze kubazaaho n’abo hanyuma y’okuhumbuuka?