Twine vidiyo ina ezirukukwata ha kwegesa Baibuli ez’okukozesa omu buheereza. Buli vidiyo ekatekanizibwa kukozesebwa eta?

• Habwaki Osemerire Kwega Baibuli?​—eyeraihire ekatekanizibwa kuleetera omuntu kugonza kwega Baibuli kaabe ali w’enyikiriza ki. Eyekambisa abantu kusoma Baibuli nukwo bantunge eby’okugarukamu by’ebikaguzo ebibakira kwekaguza kandi eyoleka omulingo Baibuli egarukamu bimu hali byo. Esoborra omulingo omuntu asobora kusaba kwegesebwa Baibuli.

• Habwaki Osemeriire Kwega Baibuli? (engufu) n’esisanaho n’eyeraihire baitu eri nka kimu kyakasatu eky’eyeraihire. N’esobora kwolekwa omu biikaro nambere abantu bataine bwire bwingi obw’okubaza naitwe.

• Omulingo Twegesamu Baibuli? ekatekanizibwa kwekambisa omuntu kwikiriza kwegesebwa Baibuli atasaswire kandi egarukamu bimu ha bikaguzo ebirukukwata ha ntekaniza enu, n’omulingo gw’okusaba kwegesebwa Baibuli.

• Webale Kutandika Kwega Baibuli ekatekanizibwa kugyoleka abeegi ba Baibuli. N’obukiraaba ngu vidiyo enu eri ha rupapura rwakabiri omu kitabu Wegondeze omu Bwomeezi Ebiro n’Ebiro!, esobora n’okwolekwa omu kwega burocuwa Wegondeze omu Bwomeezi Ebiro n’Ebiro! Vidiyo enu ebazaaho ebirukusangwa omu kitabu, n’omwegi eby’asemeriire kunihira obwaraaba nayega.

N’obukiraaba ngu buli vidiyo ekatekanizibwa n’ekigendererwa ekyembaganiza, nitusobora kuzooleka abantu rundi kuzibasindikira obukirukuba kyetaagisize. Abatebezi boona nibekambisibwa kumanya vidiyo zinu n’okuzikozesa kurungi omu buheereza.