Kasumi kanu ebigwererezi nibyeyongera. Obuhabaho ekigwererezi, kyetaagisa entekaniza enungi kurora twakozesa kurungi amaani gaitu. Enu niyo ensonga habwaki Akatebe Akalemi kataire ha buli ofiisi y’itaagi ekitongole ekirukukonyera abahikirweho ebigwererezi.

Ab’oruganda abakora omu kitongole eki obubakimanya ngu habaireho ekigwererezi, bahikirra abagurusi ab’omu kiikaro eki, kumanya bukonyezi ki abatebezi barukwetaaga. Enyikara obweba esiisikaire muno, abatebezi omu kiikaro eki batasobora kukonyera bonka, itaagi likoma ab’oburuganda abakugu kwebembera omulimo gw’okukonyera. Ab’oruganda abo nibasobora kusaba abakonyezi abarukwetaagwa, sente ez’okugura ebintu ebirukwetaagisa rundi nibagura kandi nibagaba ebintu ebirukwetaagwa nambere habaire ekigwererezi.

Entekaniza enu ebamu ebirungi bingi. Etukonyera kutasiisa amaani, kutaburanganizibwa, kutasiisa sente n’ebintu, ekisobora kubaho kakuba ab’oruganda bekorra entekaniza zabo habwabo.

Ab’oruganda abatairweho ofiisi y’itaagi nibasobora kubalirra bakamanya sente n’abantu abarukwetaagwa kukonyera nambere habaire ekigwererezi. Nibasobora n’okukwataniza n’abebembezi b’ekiikaro, kandi eki nikisobora kwanguhyaho emirimo yaitu ey’okukonyera. Nahabweki kakuba habaho ekigwererezi, tosemeriire kusorooza sente, ebintu rundi kugenda omu kiikaro eki rundi buli osabirwe kukikora.

Baitu, obuhabaho ekigwererezi tugonza kukonyera. (Baheb 13:16) Nitugonza ab’oruganda! Kiki ekitusobora kukora? Ekirukukirayo obukuru, nukwo kusabira abo abakwasirweho naabo abali omu mulimo gw’okubakonyera. Nitusobora n’okuhayo sente kusagika omulimo gw’ensi yoona. Ofiisi z’amataagi zihondera oburagirizi bw’Akatebe Akalemi kandi zimanyire omulingo omurungi ogw’okukozesaamu sente zinu. Obuturaaba nitugonza kwejumbira omu mulimo gw’okukonyera, nitusobora kwoleka ngu twetekaniize kuraba omu kwijuza foomu eya Local Design/Construction Volunteer Application (DC-50).

MUROLE VIDIYO OKUSANDAARA KW’AMAIZI OKWASIISIRE BINGI OMU BRAZIL, HANYUMA MUGARUKEMU EKIKAGUZO KINU:

Kiki ekikusemiize h’amaani Abakaiso ba Yahwe baatairemu kukonyera obuhabaireho okusandaara kw’amaizi omu Brazil omu 2020?