JW Library eri puroguramu (ekozesebwa omu byoma bya kalimagezi) ey’erukusobozesa omuntu kwiha ha mukura Baibuli, ebitabu, vidiyo hamu n’eby’okuhuliiriza akabiteeka ha simu ye, compyuta rundi tablet.

OMULINGO GW’OKUGITUNGA: Genda ha Intaneti, oiheho puroguramu ya JW Library ogiteeke ha simu yawe. JW Library n’ekorra ha masimu ag’embaganiza. Obworaaba oli ha intaneti, kingura JW Library okomemu ebintu eby’orukugonza kwihaho. Obworaaba otaine intaneti, n’osobora kugenda hali omunywani anyakugiine, rundi omu kiikaro kyona nambere orukusobora kugitunga. Obworamara kwiha ebitabu binu ha mukura, oija kuba otakyayetaagisa intaneti okubikozesaaga. Baitu kirungi kwikara n’okeberaga ha mukura habwokuba elyahuro lya JW Library likara niryongerwamu ebintu ebihyaka.

HABWAKI OSEMERIIRE KUGITUNGA? Elyahuro lya JW Library nirisobora kukukonyera muno omu kwesomesa rundi oli omu nso’rokano. Kandi lirungi kukozesa obworaaba oli omu buheereza kukira muno omu kutebeza okutetekanirizibwe.