Bizibu ki eby’orukurabamu buli kiro? Oli nyineka ow’arukulengaho kuhikiriza obujunanizibwa bwingi? Oli muzaire omu, ow’arukulengaho kuhikiriza eby’etaago by’eka yaawe? Oli mwana ow’arukwenderezebwa bagenzi bawe ha isomero? Oliyo n’orwanisa oburwaire rundi ebizibu ebiretwa kukura omu myaka? Buli muntu aine ebizibu eby’arukurabamu. Abakristaayo baingi baine ebizibu by’emiringo nyingi ebibarikurabamu ha murundi gumu. Baitu tukimanyire ngu omu kasumi akatali ka hara, Yahwe naija kutucungura kuruga omu bizibu binu byona.​—2Kol 4:16-18.

Baitu na kasumi kanu, nikituhumuza kumanya ngu Yahwe n’amanya ebizibu ebiturukurabamu kandi atusiima obutulinda obwesigwa kandi tukagumiisiriza, naija kutuha emigisa nyingi. (Yer 29:11, 12) Yesu nauwe atutaho omutima. Obuturaaba nituhikiriza obujunanizibwa bwaitu obw’Ekikristaayo, tukimanye ngu akaturaganiza ati: “Ndi hamu nainywe.” (Mat 28:20) Obutwecumiitiriza ha bugabe obutulitunga hansi y’Obukama bwa Ruhanga, tweyongera kugumya okunihira kwaitu kandi tucweramu kimu kugumiisiriza ebizibu ebiturukurabamu kasumi kanu.​—Bar 8:19-21.

MUROLE VIDIYO NK’OKU IHUNGA LIRIYO NIRIRRA HAIHI, IKAZA AMAISO GAAWE HALI YESU!​—EMIGISA EY’ERALETWA OBUKAMA BWA RUHANGA, HANYUMA MUGARUKEMU EBIKAGUZO BINU:

• Abantu bakeyahukaniza bata hali Ruhanga, kandi kiki ekyarugiremu?

• Abantu abesigwa hali Yahwe balindiriire migisa ki?

• Obusumi obw’omu maiso oburungi nibusoboka buta?

• Migisa ki ey’olindiriire n’ekihika omu nsi empyaka?