Obutabu Baibuli Etwegesa hamu na Baibuli eky’Eyegesa nibusisana. Obutabu bunu bwona obunyakuli omu bikwato byaitu eby’okukozesa nibukozesebwa omulingo gumu okwegesa abantu amananu. Baitu akatabu Baibuli Etwegesa nikakozesa orulimi orwanguhire kwetegereza kandi nikasoborra omu mulingo ogwanguhire kwetegereza. Kakozerwe kukonyera abo abatarukwanguhirwa kwetegereza akatabu Baibuli eky’Eyegesa. Akatabu Baibuli Etwegesa kaine ekicweka ekirukwetwa Ebyongiirweho ekirukusoborraho amakuru g’ebintu ebimu ebibazibweho omu katabu koona. Esuura z’akatabu kanu tiziri nk’ez’akatabu akakuru habwokuba tiziine ebikaguzo ebisangwa ha kubanza kw’esuura kandi tiziine akasanduuko aka ha kumalirra okw’esuura. Oihireho, ha kumalirra kwa buli suura, haroho ekicweka ekirukwetwa Ebitwegere ekirukusoborra omu bigufu ebintu ebibazibweho omu suura egi. Nk’oku tukora n’akatabu Baibuli eky’Eyegesa, akatabu kanu nako nitusobora kukagaba obwire bwona n’obu bakuba batolekere ngu nuko akasemeriire kugabwa okwezi oku. Obu turukuba nitwegesa omwegi wa Baibuli, nitusobora tuta kukozesa ebintu eby’embaganiza ebiri omu katabu kanu?

EBITWEGERE: Abantu abarukukira obwingi, enkora y’okubanza kusoma akacweka omu katabu Baibuli eky’Eyegesa hanyuma okakuguza omwegi ekikaguzo niija kubakorra kurungi. Baitu, kakuba omwegi aba atamanyire kurungi orulimi rundi tamanyire kusoma kurungi, n’osobora kucwamu kukozesa akatabu Baibuli Etwegesa Ki. Hanyuma ekicweka Ebitwegere nikisobora kukozesebwa kwegesa omwegi kandi n’osobora n’okumugambira ayesomere obucweka obw’esuura. Nimusobora kukozesa nk’edakiika 15 kubazaaho buli nsonga eri hansi y’ekicweka kinu. Kusigikirra nk’oku buli nsonga eri omu kicweka kinu nibagibazaaho omu bugufu, arukwegesa omwegi asemeriire kutekaniza kurungi muno nayecumitirizaho ebyetaago by’omwegi we. Kakuba arukwegesa acwamu kukozesa obucweka bwona obw’esuura, n’asobora n’okukozesa ekicweka kinu ekya “ebitwegere” kwijukya omwegi eby’ayegere.

EBYONGIIRWEHO: Ensonga ezirukusangwa omu kicweka kinu zitekaniziibwe kurungi kusigikirra nk’oku zirukuhonderangana omu katabu koona. Omwegesa n’asobora kucwamu kukozesa ekicweka kinu ekiri omu Baibuli Etwegesa obu barukuba nibeega.