HABWAKI KIKURU: Kukozesa esimu kutebeza guli mulingo mukuru “gwokutebeza enjiri.” (Eng 20:24) * Gutukonyera kutebeza omuntu kakuba enyikara eba etarukutwikiriza kumurora maiso ha maiso.

OMULINGO OGW’OKUKIKORAMU:

• Wetekanize. Komamu omutwe ogusemeriire. N’osobora n’okuhandiika ebyorukugonza kubaza. Ekindi, tekaniza ebigambo bigufu ebirukusoborra ensonga habwaki otiire esimu, kakuba esimu ey’otiire ekusaba kusiga obutumwa. Kirungi oikarre haihi n’emeeza kandi aine ebintu ebyorukwetaga nk’orupapura oruroho ebyohandikire, hamu n’ekyoma kyawe ekyakalimagezi ekiroho JW Library^® rundi jw.org^®

• Tekaana. Baza nk’oku obaza buli kiro. Mwegerra kandi okezese ebicweka byawe eby’omubiri noyesisaniza ngu omuntu oworukubaza na uwe nakurora. Werinde kubaza n’oculeera nambere kitarukwetagisa. Kikuru kutebeza n’omuntu ondi. Kakuba oworukutebeza akaguza ekikaguzo, yongera okigarukemu omu iraka erirukuhulirwa nukwo ou murukutebeza hamu akihurre kandi kimusobozese kukukonyera kuserra eky’okugarukamu

• Musigire ekyoratandikiraho omurundi ogundi. Omuntu obwarayoleka ngu nagonza kumanya ebirukukiraho, n’osobora kumusigira ekikaguzo ekimuragarukamu obumurayongera kubaza. N’osobora kumuraganiza kumusindikira akatabu ha e-mail, iwe kukamwetwarra rundi kukamutwekera. Rundi n’osobora kumusindira vidiyo, rundi ekicweka kuruga omu bitabu byaitu nokozesa obutumwa rundi e-mail. Obukirukuba kyetagisize muhe endagirro eramutwara ha kicweka ekindi ekiri ha mukura gwaitu