Nk’oku tukwirirra haihi n’omuhito omwingi, omulimo gwaitu ogw’okutebeza tusemeriire kugukora omu bwangu. (Nfu 24:11, 12, 20) Nitusobora kukozesa kaadi zinu kukonyera abantu kumanya ekigambo kya Ruhanga hamu n’okubaragirra omukura gwaitu. Kaadi enu eroho koodi erukukonyera omuntu kurora vidiyo Habwaki Osemerire Kwega Baibuli? Kandi neija n’okumukonyera obwaraaba n’agonza kumanya ebirukukiraho rundi obwaraaba n’agonza okwegesebwa Baibuli. Abantu abamu tibagonza kusoma ebitabu byaitu, baitu nibasobora kubungira omukura gwaitu. Nahabweki, otatiina kugaba kaadi erukuragirra abantu kugenda ha mukura gwaitu. Baitu, titusemeriire kuzisigira abantu abatasiimire amananu.

N’obworaaba oli ha mirimo yaawe, n’osobora kugaba kaadi enu n’okozesa ebigambo binu: “Nyine kaadi eyi n’akugondeze kukuha. Kaadi enu n’ekuragirra ha mukura ogwa busa oguroho ebintu bingi ebirukwegesa hamu na vidiyo ezirukukwata ha bintu bingi.” (Yoh 4:7) N’osobora kwikara oine obu kaadi bunu obwire bwona nukwo osobole kubukozesa habwokuba butaito kandi tibukulemeera.