OBWOMEEZI BWAITU NK’ABAKRISTAAYO
Kakuba Omwana Atutangirra
Kakuba omwana atutangirra, tusemeriire kumukaguza abazaire be obubaraaba baroho. Obutukora kinu kyoleka ngu nitutekamu mukama w’eka ekitinisa. (Nfu 6:20) Omwana obwaratugamba ngu tutahe omu nju, tutaikiriza. Bazaire be obubaraaba bataroho, nitusobora kugaruka omurundi ogundi.
Omwana n’obwaraaba ali omu myaka ey’obusigazi, kirungi kumukaguza bazaire be obubaraaba baroho. Obubaraaba bataroho, nitusobora kumukaguza obukiraaba kitarukwija kubabihiza kakuba tumusigira ekitabu eky’okusoma. Bazaire be obubaraaba nibamwikiriza, nitusobora kumuheereza ekitabu eky’okusoma rundi tukamuragirra omukura gwaitu ogwa jw.org.
Obuturaaba tugarukire kurora omusigazi rundi omwisiki ayayolekere okugonza, tusemeriire kubanza kubaza n’abazaire be. Kinu nikiija kutukonyera kubasoborra ekigendererwa kyaitu hamu n’okuboleka omulingo amagezi agali omu Baibuli nk’oku g’asobora kukonyera eka yaabo. (Zab 119:86, 138) Obuturatekamu abazaire b’omwana ekitinisa nikiija kubasemeza kandi nikisobora n’okutuha omugisa ogw’okutebeza abandi abarukwikara omu ka egyo.