Yesu akasobora kutebeza omukazi Omusamaliya atakyetekaniriize habwokuba nuwe yatandikire kubaza n’omukazi onu. Nitusobora tuta kwongera ha bukugu obw’okubaza n’abantu abatutamanyire?

• Lengaho kunywana kandi n’okubaza n’abantu. Yesu n’obwaraaba akaba ajwahire, akatandika kubaza n’omukazi onu n’amusaba amaizi g’okunywa. Naiwe n’osobora kutandika kubaza n’omuntu n’omuramukya, kandi okabazaaho ebintu nk’enyikara y’obwire rundi ebintu ebibaireho. Ijuka nk’oku ekigendererwa kyawe ha kubanza nikyo eky’okutandika kubaza n’omuntu nahabweki bazaaho ebintu ebiramusikiriza. N’obwaraaba atakugarukiremu tikiine nsonga, lengaho obaze n’omuntu ondi. Saba Yahwe akuhe obumanzi.​—Neh 2:4; Eng 4:29.

• Kozesa buli kagisa koona kubazaaho amakuru amarungi, baitu kandi otakikora n’oyanguhiriza. Otahambiriza omuntu kubaza naiwe habwokuba obw’oramuhambiriza asobora kutiina kandi akaculeera. Otahwamu amaani kakuba obaza n’omuntu baitu mukamara kubaza otakamutebiize. Obw’oraaba n’otiina kutandika kutebeza amakuru amarungi, werengesemu kubaza n’abantu n’obworaaba otaine kigendererwa ky’okubatebeza. [Tekaho vidiyo 1 kandi mugibazeeho.]

• Bazaaho ekintu kuruga ha mutima gwawe ekirukukwata ha kwikiriza kwawe, ekisobora kuleetera omuntu kukukaguza omusoborre. Yesu akabaza ebigambo ebirukusikiriza eby’aletiire omukazi kumukaguza. Nambere yatandikiire kumutebeza, akaba n’agarukamu bugarukamu ebikaguzo bye. [Tekaho vidiyo 2 kandi mugibazeeho, hanyuma tekaho vidiyo 3 kandi mugibazeeho.]