Oburwaire bw’Omutwe Bweyongiire omu Nsi Yoona
“Nkira kweralikirra n’obuhaba hataroho ekisemeriire kunyeraliikiriza.”
“Obunyehurra ndi kurungi ekihinguraine kindetera kweralikirra. Mba nkimanyire ngu ekirahonderaho nukwo kubiihirwa muno.”
“Ndengaho kuteralikirra ebiraabaho nyenkya, baitu ahonaaho ntandika kweralikirra ebintu bingi.”
Ebigambo binu bikagambwa abantu abarukutalibanizibwa oburwaire bw’omutwe. Wakehurraga oti rundi omuntu ow’orukugonza ayakehurraga ati?
Kimanye ngu toli wenka. Kasumi kanu, abantu baingi rundi abanyabuzaale baabo baine oburwaire bw’omutwe.
Hataroho kugurukyagurukya tuli “omu biro bya hanyuma ebiro ebyakabi kaingi” kandi nikyo kiretiire abantu kweyongera kwetuntura. (2 Timoseo 3:1) Okuseruliiriza kumu kukooleka ngu omu nsi yoona haihi omuntu omu, omu bantu munaana natalibanizibwa oburwaire bw’omutwe. Omu 2020, oburwaire bwa Korona bukaleetera abantu abarukuhika omu bukaikuru 78 kwetuntura ekihunguraine n’okwenuuba muno.
Omuhendo gw’abantu abaine oburwaire bw’omutwe tinikyo kikuru. Ekikuru nugwo mulingo iwe n’abantu baawe murukwehurramu.
Omuntu ataine oburwaire bw’omutwe ayehurra ata?
Aba atekaine omu bitekerezo kandi nayehurra kurungi. Aba n’asobora kugumira okwetuntura okwa buli kiro, n’akora kurungi emirimo ye kandi ahurra aine okumarwa omu bwomeezi.
Oburwaire bw’omutwe . . .
-
TIBULEETWA omuntu kuba muceke rundi ngu haroho ekibi eky’akozere.
-
BULI burwaire obuleetera omuntu kwetuntura ekihinguraine, kutalibanizibwa omu bitekerezo, omu nyehurra n’omu nyetwaza.
-
Nibusobora kuleetera omuntu kutagonza kuba n’abantu abandi n’okugumanganirwa kukora emirimo eya buli kiro.
-
Nibusobora kukwata abantu ab’emyaka yoona, ab’enganda, erangi, orulimi n’ediini zoona, abasomere n’abatasomere, otwaliremu abaguuda n’abanaku.
Kutunga obukonyezi obworukuba notalibanizibwa oburwaire bw’omutwe
Iwe rundi omuntu ow’omanyire kakuba atandika kwetwaza omu mulingo gutali gwa buli kiro, kuburwa oturo, kuhindura ha ndyaye, kwetuntura kumara akasumi akaraihire, kweralikirra muno, rundi kwenuuba, n’osobora kuba noyetaaga kuhikirra dakitaali akukebere nukwo omanye endugirro y’obwokurorraho bunu.
Yesu Kristo, omusaija arukukirayo amagezi ayakabaho omu nsi akagamba ati: ‘Abomiire tibetaaga mufumu, baitu abarwaire’ nibamwetaaga. (Matayo 9:12) Abo abarukutalibanizibwa oburwaire bw’omutwe obubatunga obujanjabi obuhikire nikisobora kukehyaho obwokurorraho kandi nibehurra kurungi. Kirungi kwanguha kutunga obujanjabi kakuba obwokurorraho buba bw’amaani rundi bwikaraho kumara akasumi. a
N’obukiraaba ngu Baibuli tikiri kitabu eky’eby’obujanjabi, ebirumu nibisobora kukukonyera omu bwomeezi. Nitukusaba osome ebicweka ebirukuhonderaho, orole omulingo Baibuli esobora kukukonyera obworukuba notalibanizibwa oburwaire bw’omutwe.
a Omunaara gw’Omulinzi tigurukwija kukugambira obujanjabi bwonyini obwosemeriire kutunga. Buli muntu asemeriire kwekebiija emiringo y’obujanjabi ey’amanyire atakakozere encwamu habwe nk’omuntu.
Nosobora Kugonza na Binu;
ENYEGESA ZA BAIBULI ENKURU
Habwaki Ruhanga Aikiriza Okubonabona Kubaho?
Abantu baingi bakaguza habwaki ensi eijwiremu enobi n’okubonabona. Eky’okugarukamu kya Baibuli nikituletera kumarwa n’okuhumura.
IKARA OLI BULINDAARA!
Oburwaire bw’Omutwe omu Nsinganto Nibweyongera—Baibuli n’Ekibazaaho Ki?
Baibuli n’eha obukonyezi obusobora kukonyera ensinganto abaine oburwaire obw’omutwe.
EBIRUKUTUKWATAHO
Saba Kubungirwa
Tunga eky’okugarukamu ky’ekikaguzo kyawe, rundi omanye ebirukukiraho ebirukukwata h’Abakaiso ba Yahwe.
