1. Bintu ki ebirungi ebi turukwija kutunga habw’ekicunguro?

EKICUNGURO eki Yesu yahaireyo kitukinguliireho emigisa nyingi. Nk’ekyokurorraho, kikinguliireho abaana ba Adamu abarukugonza obuhikiriire okweteraniza ha ka ya Ruhanga. Omugisa ogundi guli ngu, nitusobora kwomerra ebiro byona kandi twine okusemererwa. Ekindi ekirukukira, ekicunguro kiine akakwate n’ensonga enkuru hali buli omu anyakuli omu iguru n’omu nsi.—Abaheburaniya 1:8, 9.

2. (a) Nsonga ki enkuru muno omu iguru n’omu nsi ezi Yesu yabalizeho omu saara ye? (Rora ekisisani ekiri ha kutandika kw’isomo linu.) (b) Biki ebi turukugenda kubazaaho omu kicweka kinu?

² Obu hakaba hasigaireyo emyaka ebiri Yesu aitwe, akegesa abegeswa be kusaba bati: “Isitwe ali omu iguru, ibara lyawe [lyezebwe]. Obukama bwawe buije. Ebyogonza bikorwe hansi nkokubabikora omu iguru.” (Matayo 6:9, 10) Leka turole omulingo ekicunguro kiine akakwate n’okweza ibara lya Yahwe, obulemi bw’Obukama bwa Ruhanga, n’okukora Ruhanga eby’agonza.

3. Ibara lya Yahwe nirisoborra ki? Setani akasiisa ata ibara lya Yahwe?

³ Okubanza kwa byona, Yesu akasaba ibara lya Yahwe okwezebwa, rundi okutwarwa nk’ekintu ekirukwera. Ibara lya Yahwe nirisoborraho oburungi bwe bwona, okwera kwe, ekitiinisa kye, hamu n’obusobozi bwe. Ahikiriire kandi nuwe arukukirrayo kimu amaani omu iguru n’omu nsi. Yesu nauwe akamweta “Taata Ahikiriire.” (Yohana 17:11, NW) Habwokuba Yahwe ali arukwera, buli kintu kyona eky’akora hamu n’ebiragiro bye byona nibyera. Baitu Setani akaletaho okugurukyagurukya omu rugonjo rwa Adeni obu yalengereho kwoleka ngu Yahwe tasemeriire kugambira abantu eby’okukora. Akabaza ebisuba hali Yahwe kandi yasiisa ibara lye erirungi.—Okubanza 3:1-5.

4. Yesu akeeza ata ibara lya Ruhanga?

⁴ Baitu Yesu uwe mali akagonza ibara lya Yahwe kandi akakora kyona ekirukusoboka okulyeza. (Yohana 17:25, 26) Omu mulingo ki? Kurabira omu ngeso ze n’enyegesa ye, Yesu akakonyera abandi kurora ngu emiringo ya Ruhanga ehikire kandi ngu buli kimu eky’atusaba kukora kiba habw’oburungi bwaitu. (Soma Zabuli 40:8-10.) Kandi na Setani obu yamuletiire okubonabona kuhika na ha kufa omu burumi bwingi, Yesu akalinda obwesigwa bwe. Akakyoleka ngu nikisoboka omuntu ahikiriire okworobera Yahwe omu miringo yoona.

5. Nitusobora tuta kweza ibara lya Yahwe?

⁵ Nitusobora kwoleka tuta ngu nitugonza ibara lya Yahwe? Kurabira omu ngeso zaitu. Yahwe n’agonza tube abarukwera. (Soma 1 Petero 1:15, 16.) Kinu nikimanyisa ngu turamye uwe wenka kandi tumworobere n’omutima gwaitu gwona. N’obu tuba nituhiganizibwa, tukora ekirukusoboka kuhondera Baibuli eby’etwegesa. Obutugendera ha rulengo Yahwe atuteriireho, tuhaisa ibara lye ekitiinisa. (Matayo 5:14-16) Tuba nitwoleka ngu ebiragiro bye birungi kandi ngu Setani mubiihi. Tituhikiriire, nahabweki nitusobora kusobya. Baitu obu tusobya, twegarukamu kandi tukora kyona ekirukusoboka kuleka ebintu ebirukujumisa ibara lya Yahwe.—Zabuli 79:9.

6. Habwaki Yahwe n’asobora kuturora nk’abahikiriire n’obu turaaba tutahikiriire?

⁶ Tube tuseserweho amagita rundi tuli “entama ezindi,” Yahwe atuganyira eby’okusiisa byaitu obu twikiririza omu kicunguro. Boona abehayo haluwe abatangirra okumuramya. Ayeta Abakristaayo abaseserweho amagita baana be abahikiriire, kandi “entama ezindi” abeta abanywani be abahikiriire. (Yohana 10:16; Abarumi 5:1, 2; Yakobo 2:21-25) Nahabweki, n’omu kasumi kanu, ekicunguro nikitusobozesa kuba banywani ba Yahwe n’okweza ibara lye.

7. Migisa ki ei turatunga habw’ekicunguro?

⁷ Omu saara ya mukama waitu, Yesu akagamba: “Obukama bwawe buije.” Ekicunguro kiine kakwate ki n’Obukama bwa Ruhanga? Obukama bwa Ruhanga, rundi gavumenti ye erumu Yesu hamu 144,000 ey’abantu abakomerwe kuruga omu nsi. Ekicunguro kinu nikyo kisobozesa abantu banu kuhumbuuka bakagenda omu iguru. (Okusuku’rwa 5:9, 10; 14:1) Baliba bakama kandi banyakatagara abalirema hamu na Yesu kumara emyaka rukumi. Omu kasumi ako, Yahwe n’aija kukozesa Obukama okufoora  ensi orugonjo orurungi n’okukonyera abantu boona kufooka bahikiriire. Obu nubwo abaheereza ba Yahwe omu nsi n’omu iguru balifoka eka emu. (Okusuku’rwa 5:13; 20:6) Yesu n’aija kuhwerekereza Setani kandi aiheho ebizibu byona ebyalesere.—Okubanza 3:15.

8. (a) Yesu akakonyera ata abegeswa be kwetegereza ngu Obukama bwa Ruhanga kintu kikuru? (b) Tusagika tuta Obukama omu kasumi kanu?

⁸ Yesu akakonyera abegeswa be okwetegereza omugaso gw’Obukama bwa Ruhanga. Omu mulingo ki? Obwakaba n’akyamara kubatizibwa, akatandika kutebeza ‘ebigambo ebirungi eby’Obukama bwa Ruhanga’ hoona nambere yagendaga. (Luka 4:43) Kandi akagambira abegeswa be kuba Bakaiso be kuhikira kimu ha ‘mpero z’ensi.’ (Engeso Ezabakwenda 1:6-8) Omu kasumi kanu okutebeza kukinguliireho abantu omugisa gw’okwega ha kicunguro n’okufooka basagiki ab’Obukama bwa Ruhanga. Twoleka ngu nitusagika Obukama obu obutukonyera abaseserweho amagita okutebeza amakuru amarungi omu nsi yoona.—Matayo 24:14; 25:40.

9. Habwaki tusemeriire kukigumya ngu Yahwe n’aija kuhikiriza ekigendererwa kye hali Abantu?

⁹ Yesu akaba n’amanyisa ki obu yagambire ngu: “Eby’ogonza bikorwe”? Yahwe obw’agamba ngu ekintu nikiija kubaho, kiine kubaho. (Isaya 55:11) Obujemu bwa Setani butasobole kulemesa Yahwe. Ensi Yahwe akaba n’agigondeza ki? Akaba n’agonza ensi ijulemu abaana ba Adamu na Hawa abahikiriire. (Okubanza 1:28) Kakuba Adamu na Hawa bafiire batakazaire abaana, ekigendererwa kya Ruhanga eky’okwijuza ensi n’abaana babo kyakubaire kifiire. Nahabweki Yahwe akabaleka bazaale abaana. Ekicunguro nikiha buli omu arukukiikiririzamu omugisa gw’okufooka ahikiriire n’okwomeera ebiro byona. Yahwe agonza abantu kandi n’agonza tutunge obwomeezi oburungi obwakaba atutegekiire.

10. Ekicunguro kigasira kita abantu abafiire?

¹⁰ Kandi obukaikuru n’obukaikuru bw’abantu abafiire batakatungire omugisa gw’okumanya Yahwe? Yahwe n’agonza abantu babe bomeezi. N’aija kuhumbuura abafiire. Ekicunguro nikyo ekirukusobozesa abantu banu kuhumbuuka. Obu nubwo baratunga omugisa gw’okwega hali Yahwe n’okwomeera ebiro n’ebiro. (Engeso Ezabakwenda 24:15) Yahwe nuwe Ndugirro y’obwomeezi kandi obwagarurra omuntu afiire obwomeezi, afooka Ise. (Zabuli 36:9) Omu saara ya Mukama waitu, Yesu akagamba ngu Yahwe nuwe “Isitwe ali omu iguru.” (Matayo 6:9) Yahwe ahaire Yesu obujunanizibwa obw’amaani muno obw’okuhumbuura abafiire. Yesu akagamba: “Ninyowe kuhumbuka, nobwomezi.”—Yohana 6:40, 44; 11:25.

11. Ruhanga n’agondeza ki “ekitebe kingi”?

¹¹ Yesu akagamba: “Omuntu Wena anyakukora Ruhanga ebyagonza, ogu nuwe mwene waitu, nuwe munyanya nyowe, nuwe mau.” (Marako 3:35) Yahwe n’agonza abantu kuruga omu mahanga goona, n’endiimi zoona okumuramya. Nibetwa “ekitebe kingi omuntu wena ekyatasobora okubara.” Nibaikiririza omu kicunguro kandi nibagonza kworobera Yahwe. Bamuramya nibagamba: “Okujunwa kube hali Ruhanga waitu, anyakuikaliire ha kitebe kyobukama, na hali Omwana Gwentama.”—Okusuku’rwa 7:9, 10.

12. Esaara ya Yesu netwegesa ki ha kigendererwa kya Yahwe habw’abantu?

 ¹² Omu saara ya Mukama waitu, twegeremu ebintu bingi ebirukukwata hali Yahwe n’ekigendererwa kye hali abantu. Eky’okubanza, twine kukora kyona ekirukusoboka kweza ibara lya Yahwe n’okumuha ekitiinisa. (Isaya 8:13) Ekicunguro kya Yesu kitusobozesa kutunga okujunwa kandi akaire nuko kamu kihaisa ibara lya Yahwe ekitiinisa. Kandi twijuke ngu n’ibara lya Yesu nirimanyisa “Yahwe nuwe Kujuna.” Ekyakabiri, Yahwe n’aija kukozesa Obukama bwe kurora ngu abantu abahulizi batunga emigisa yoona ey’ekicunguro. Kandi ekyakasatu, nitukigumiza kimu ngu busaho ekintu kyona ekisobora kulemesa okugonza kwa Yahwe okuhikirra.—Zabuli 135:6; Isaya 46:9, 10.

13. Habwaki tubatizibwa?

¹³ Okwehayo n’okubatizibwa guli mulingo omukuru ogu twoleka ngu nitusiima Yahwe habw’ekicunguro. Tuba nitwoleka ngu nitwikiririza omu kicunguro kandi ngu “tuli ba Mukama waitu.” (Abarumi 14:8) Obutubatizibwa, tusaba Yahwe kutuha ‘omutima omurungi.’ (1 Petero 3:21) Yahwe atugarukamu obwatuha emigisa kuraba omu ekicunguro. Kandi nitukigumiza kimu ngu n’aija kutuha buli kintu kyona eky’aturaganiize.—Abarumi 8:32.

14. Habwaki Yahwe aturagira kugonza abandi?

¹⁴ Buli kintu kyona Yahwe eky’akora akikora habw’okugonza. N’agonza abahereza be kumwegeraho n’okugonzangana. (1 Yohana 4:8-11) Obu tugonza abantu, tuba nitukyoleka ngu nitugonza kuba baana ba Yahwe. (Matayo 5:43-48) Ebiragiro bibiri ebirukukirayo obukuru nibyo binu: kugonza Yahwe, kandi ekyakabairi, kugonza abandi. (Matayo 22:37-40) Omulingo ogumu ogu twolekamu abandi okugonza nukwo kubegesa amakuru amarungi ag’Obukama. Obu tworobera ekiragiro kya Yahwe eky’okugonza abandi, kukira muno abahereza bagenzi baitu, okugonza kwaitu haluwe ‘kuhikirra.’—1 Yohana 4:12, 20.

15. (a) Migisa ki ei turukutunga hati kuruga hali Yahwe? (b) Migisa ki ei turukwija kutunga omu busumi bw’omu maiso?

¹⁵ Yahwe n’aturaganiza ngu habw’okwikiririza omu kicunguro, ebibi byaitu ‘biragazibwa.’ Atuganyira kuruga ha mutima. (Soma Engeso Ezabakwenda 3:19-21.) Nk’oku tusangirwe tubalizeeho, ekicunguro kisobozesa Yahwe okukomamu abantu abake okubafoora abaana be omu iguru. Banu nubo abaseserweho amagita. (Abarumi 8:15-17) “Entama ezindi” nazo nazeeta kuba bantu ab’eka ye omu nsi. Obu balimara kufooka abahikiriire, balirengesebwa omurundi ogurukumalirra. Obu balisingura okulengesebwa kunu, nabo alibafoora baana be. (Abarumi 8:20, 21; Okusuku’rwa 20:7-9) Yahwe n’aija kwikara n’agonza abaana be boona. Ekicunguro nikiija kwikara nikireta emigisa ebiro byona. (Abaheburaniya 9:12) Yahwe atuhaire ekisembo kinu eky’omuhendo, kandi busaho omuntu asobora kukitwihaho.

16. Ekicunguro kitukonyera kita kutunga obugabe?

¹⁶ Kakuba twegarukamu ebibi byaitu, tiharoho ekintu kyona Setani eky’asobora kukora ekiritulemesa kweteraniza ha ka ya Yahwe. Yesu akafa “omurundi gumu.” Ekicunguro kikasasurwa omurundi gumu nahabweki tikiryongera okuhebwayo. (Abaheburaniya 9:24-26) Adamu akatuletera okufa, baitu ekihongwa kya Yesu nikiija kutuletera obwomeezi obutahwaho. Ekicunguro nikisobora kutujuna kuruga omu nsi ya Setani n’omu kutiina okufa.—Abaheburaniya 2:14, 15.

17. Iwe okugonza kwa Yahwe nikukugasira kuta?

¹⁷ Emirago ya Ruhanga tesobora kulemwa kuhikirra. Nk’oku ebiragiro by’obuhangwa bitasobora kuhinduka, Yahwe nauwe tasobora kuhinduka. Tasobora kutuhemukira. (Maraki 3:6) Haroho ebindi bingi muno Yahwe eby’atuha oihireho ekisembo eky’obwomeezi. Atuha okugonza kwe. “Tumanyire, kandi tukaikiriza okugonza Ruhanga okwayina omulitwe. Ruhanga nukwo kugonza.” (1 Yohana 4:16) Emirago ye niija kuhikikirizibwa. Ensi niija kufooka rugonjo orusemiire. Buli muntu elyegera hali Yahwe kandi aligonza mutahi we. Obu nubwo abaheereza be boona ab’omu iguru n’omu nsi baligamba: “Okusimwa, nekitinisa, namagezi, nokwebaza, nokutinwa, nobusobozi, namani bibe hali Ruhanga waitu okuhikya ebiro nebiro. Amina.”—Okusuku’rwa 7:12.