1, 2. Yesu obu yagarukireyo omwiguru, abakwenda nibasobora kuba bali nibekaguza ki?

ABAKWENDA ba Yesu bakemerra ha rusozi Zeituni barolerra omukama wabo kandi omunywani wabo, Yesu, natwarwa omwiguru kandi n’aswekwa ekicu. (Engeso Ezabakwenda 1:9, 10) Yesu akaba amazire emyaka nk’ebiri n’abegesa, n’abagarramu amaani, kandi n’abebembera. Baitu hati nk’oku akaba agarukireyo, bakaba nibagenda kukora ki?

² Yesu obwakaba atakagenzere omu iguru, akagambira abegeswa be: “Nainywe muraikaraga bakaiso bange omu Yerusalemu, na Buyudaya bwona, nomu Samaliya, nokuhikya empero zensi.” (Engeso Ezabakwenda 1:8) Omulimo gunu bakusoboire bata kugukora bakagumara? Yesu akaba abaraganiize ngu omwoyo gwa Ruhanga ogurukwera gukaba nigugenda kubakonyera. (Engeso Ezabakwenda 1:5) Baitu noha akaba n’agenda kubebembera n’okutekaniza mulimo gw’okutebeza omu nsi yoona? Abakwenda bakaba  bakimanyire ngu omu busumi bwa kara, Yahwe akakozesa abasaija bamu kwebembera Isareri. Hati nibasobora kuba baali nibekaguza Yahwe obwaraaba yali n’agenda kukoma omwebembezi omuhyaka.

3. (a) Hanyuma ya Yesu kugenda omwiguru, abakwenda be bakakora encwamu ki enkuru? (b) Bikaguzo ki ebiturukwija kugarukamu omu isomo linu?

³ Hanyuma y’akaire kake Yesu agarukire omwiguru, abegeswa be bakaseruliiriza omu Byahandiikirwe, basaba Yahwe abakonyere, kandi hanyuma bakoma Matiya okugaruka omu kiikaro kya Yuda Isikalyota nukwo bahike 12. (Engeso Ezabakwenda 1:15-26) Habwaki kyali kikuru hali bo na hali Yahwe kukoma omuntu ondi? Abegeswa bakakyetegereza ngu hakaba hasemeriire kubaho abakwenda 12. * (Rora obugambo obuli hansi.) Yesu akakoma abakwenda yabatendeka kukora omulimo mukuru muno omu bantu ba Ruhanga. Ogu gwali mulimo ki, kandi Yesu na Yahwe bakabatekaniza bata kukora omulimo gunu? Entekaniza ki eziroho omu kasumi kanu ezirukusisana n’ez’akasumi ako? Kandi nitusobora kwijuka tuta abarukutwebembera, kukira muno ‘omwiru omwesigwa kandi ow’amagezi’?—Abaheburaniya 13:7; Matayo 24:45.

4. Abakwenda hamu n’abagurusi ab’omu Yerusalemu bakaba baine bujunanizibwa ki?

⁴ Abakwenda bakatandika kwebembera ekitebe Ekikristaayo ha kiro kya pentekote omwaka gwa 33. Baibuli n’egamba “Petero akaimuka hamu n’abo ikumi nomu” yatebeza ekitebe kingi amakuru amarungi ag’okujunwa. (Engeso Ezabakwenda 2:14, 15) Abantu baingi omu kitebe eki bakafooka Bakristaayo. Kuruga obu, Abakristaayo abo abahyaka “bayekambaga omu kwegesa okwabakwenda.” (Engeso Ezabakwenda 2:42) Abakwenda nubo bali n’obujunanizibwa bw’okukozesa kurungi sente ez’ekitebe. (Engeso Ezabakwenda 4:34, 35) Ekindi, bakegesa abantu ba Ruhanga kandi bakabasabira nibagamba: “Baitu itwe turayekambaga omu kusaba nokuhereza ekigambo.” (Engeso Ezabakwenda 6:4) Kandi bakatuma Abakristaayo abakuzire omu by’omwoyo kugenda kutebeza omu biikaro ebihyaka. (Engeso Ezabakwenda 8:14, 15) Hanyuma, abagurusi bandi ab’ekitebe abakaba baseserweho amagita bakabeteranizaho omu kwebembera ekitebe. Bakafoka akatebe akelemi akaherezaga ebitebe bindi byona oburagirizi.—Engeso Ezabakwenda 15:2.

5, 6. (a) Omwoyo ogurukwera gukakonyera guta akatebe akalemi? (Rora ekisisani ekiri ha kutandika kw’isomo linu.) (b) Abamaraika bakakonyera bata akatebe akalemi? (c) Ekigambo kya Ruhanga kikakonyera kita akatebe akalemi?

⁵ Abakristaayo omu kyasa ky’okubanza bakaba bakimanyire ngu Yahwe yakozesaga Yesu okuragirra akatebe akalemi. Kiki ekyabagumize ngu Yahwe nuwe akaba n’akozesa akatebe  akalemi? Eky’okubanza, omwoyo ogurukwera gukaha akatebe akalemi amaani. (Yohana 16:13) Abakristaayo boona abakaba baseserweho amagita bakatunga omwoyo ogurukwera, baitu kukira muno, gukakonyera abakwenda n’abagurusi omu Yerusalemu okuhikiriza obujunanizibwa bwabo nk’abaroleerezi. Ekyokurorraho, omu mwaka gwa 49, omwoyo ogurukwera gukakonyera akatebe akalemi okukora encwamu erukukwata ha kusarwa. Ebitebe bikagendera ha ncwamu enu kandi, “nukwo ekanisa zagumire ziti omu kuikiriza, kandi zakanyaga omuhendo obukyabukya.” (Engeso Ezabakwenda 16:4, 5) Ebbaruha erukukwata ha kusarwa eyasindikiirwe ebitebe ekoleka ngu akatebe akalemi kakaba nikebemberwa omwoyo gwa Ruhanga kandi kakaba kaine okugonza n’okwikiriza.—Engeso Ezabakwenda 15:11, 25-29; Abagaratiya 5:22, 23.

⁶ Ekyakabiri, abamaraika bakakonyera akatebe akalemi. Ekyokurorraho, maraika akagambira Koruneryo kuserra omukwenda Petero. Petero obu yamazire kutebeza Koruneryo n’abanyabuzaale be, bakatunga omwoyo ogurukwera n’obukiraaba ngu abasaija banu bakaba batasazirwe. Nahabweki, Koruneryo nuwe omuntu ayabandize kufooka Mukristaayo kuruga omu bantu ab’amahanga abatasazirwe. Abakwenda hamu n’ab’oruganda abandi obu bakihuliire, bakaikiriza ngu egi yali ntekaniza ya Ruhanga kandi batangirra abantu abatasazirwe omu kitebe Ekikristaayo. (Engeso Ezabakwenda 11:13-18) Kinu nikyoleka ngu abamaraika bakasagika muno omulimo gw’okutebeza ogukaba nigwebemberwa akatebe akalemi. (Engeso Ezabakwenda 5:19, 20) Ekyakasatu, akatebe akalemi kakahondera Ekigambo kya Ruhanga. Abasaija abo basigikirraga ha Byahandiikirwe kukora encwamu enkuru ezirukukwata ha nyikiriza ez’Ekikristaayo n’okwebembera ebitebe.—Engeso Ezabakwenda 1:20-22; 15:15-20.

7. Habwaki nitugamba ngu Yesu nuwe yayebembiire Abakristaayo ba kara?

⁷ Nobukiraaba ngu akatebe akalemi kakaba kaine obusobozi hali ekitebe, ab’oruganda abakaba bali ha katebe kanu bakaba bakimanyire ngu Yesu Kristo nuwe yali Mwebembezi wabo. Eki nitukimanya tuta? Omukwenda Paulo akagamba ngu Kristo nuwe akaba akomere “abandi okuba abakwenda.” Akongera yagamba ngu Kristo nugwo “mutwe,” rundi Omwebembezi w’ekitebe. (Abefeso 4:11, 15) Kandi omu kiikaro ky’okwetwa ibara ly’omu ha bakwenda, ‘abegeswa baketwa Bakristaayo.’ (Engeso Ezabakwenda 11:26) Paulo akakimanya ngu kyali kikuru kuhondera okwegesa okw’abakwenda n’abagurusi okukaba nikusigikirra ha Baibuli. Baitu nabwo, Paulo akagamba ati: “Ningonza inywe mumanye ngu Kristo nuwe mutwe gwomusaija wena.” Ebigambo binu bikaba nibitwarramu buli w’oruganda wena akaba ali ha katebe akalemi. Paulo akongera yagamba: “Omutwe ogwa Kristo Ruhanga.” (1 Abakolinso 11:2, 3) Hataroho kugurukyagurukya, Yahwe akaba akomere Yesu Kristo okwebembera ekitebe.

8, 9. Ow’oruganda Russell akaba n’obujunanizibwa ki obukuru?

⁸ Kutandika n’omwaka 1870, Charles Taze Russell n’abanywani be bakatandika kutamu amaani kuramya kusigikirra ha Baibuli n’okukonyera abandi kuramya omu mulingo ogu. Kinu kikaba nikitwarramu kukonyera abantu abakaba nibabaza endimi ezirukwahukana. Nahabweki omu mwaka 1884, bakatandikaho omu butongole ekitebe ekirukwetwa Zion’s Watch Tower Tract Society, kandi ow’Oruganda Russell akafooka purezidenti  wakyo. * (Rora obugambo obuli hansi.) Akasoma Baibuli n’obwegendereza kandi atatiine kugambira abandi ngu enyegesa ez’amakanisa tizisigikirra ha Baibuli, nk’ey’Obusatu hamu n’okugamba ngu omuntu tafa. Aketegereza ngu okugaruka kwa Kristo kukaba kutarukugenda kurorwa kandi “obusumi obwabamahanga” bwakuhoireho omu 1914. (Luka 21:24) Ow’Oruganda Russell akakozesa obwire, amaani, na sente ze okwegesa abantu abandi ebintu binu. Nikyeyolekera kimu ngu Yahwe na Yesu bakakozesa ow’Oruganda Russell okwebembera omu kasumi ako.

⁹ Ow’oruganda Russell atagonze ebitiinisa byona kuruga omu bantu. Omu 1896, akahandiika yagamba ngu uwe n’abasaija boona abakaba nibajunanizibwa bakaba batarukugonza kuhebwa ebitiinisa byona. Bakaba batarukugonza amabara g’ebitiinisa kandi batagonze ekitebe kyona okurukwa ibara lyabo. Hanyuma akagamba ati: “Gunu tiguli mulimo gw’abantu.”

10. (a) Yesu akakoma di ‘omwiru omwesigwa kandi ow’amagezi”? (b) Soborra omulingo kyayolekerwe kurungi ngu, Akatebe Akelemi kakaba nikahukana na Watch Tower Society.

¹⁰ Omu 1919 hanyuma y’emyaka esatu ow’Oruganda Russell afiire, Yesu akakoma ‘omwiru omwesigwa kandi ow’amagezi.’ Akamukoma kukora ki? Kuha abahondezi be “ebyokulya byabu omu kasumi kabu.” (Matayo 24:45) N’omu myaka egi, akatebe kataito ak’ab’oruganda abaseserweho amagita ha ofiisi enkuru ez’ensi yoona omu Brooklyn, New York, bakahereza abahondezi ba Yesu eby’okulya eby’omwoyo. Kuruga omu myaka ya 1940, ebigambo “akatebe akalemi” nubwo byatandikire kukozesebwa omu bitabu byaitu. Omu kasumi ako, akatebe akalemi kakaba kaine akakwate k’amaani n’ab’oruganda abayebemberaga Watch Tower Bible and Tract Society. Baitu omu 1971, kikasobororwa kurungi ngu Akatebe Akalemi kaali nikahukana na Watch Tower Society, eyajunanizibwaga n’ensonga z’omu mbuga z’ebiragiro zonka. Kuruga obu ab’oruganda abaseserweho amagita bakaba nibasobora kukomwa kuba ha Katebe Akalemi batabandize kufooka bebembezi ba Watch Tower Society. Omu myaka nke erabireho, ab’oruganda kuruga omu “entama ezindi” bakonyire kwebembera Watch Tower Society hamu n’ebitebe ebindi ebirukukonyera abantu ba Ruhanga. Kinu nikikonyera Akatebe Akalemi okuta amaani omu kwegesa Baibuli n’okwebembera ekitebe kya Yahwe. (Yohana 10:16; Engeso Ezabakwenda 6:4) Watchtower ya Julaayi 15, 2013, ekasoborra ngu ‘omwiru omwesigwa kandi ow’amagezi’ bali b’oruganda bataito abaseserweho amagita abali ha Katebe Akalemi.

11. Akatebe Akalemi kakora kata encwamu?

¹¹ Akatebe Akalemi kaikarra buli wiiki okukora encwamu enkuru kandi tali ow’oruganda omu akora encwamu baitu boona bazikorra hamu. Okuso’rokana hamu omu mulingo gunu kibakonyera kwikara nibabaza hamu n’okwikara omu bumu. (Enfumo 20:18) Busaho ow’oruganda omu Katebe Akalemi  arukukira abandi obusobozi, nahabweki, buli mwaka bakoma ow’oruganda arukwahukana omu katebe kanu okwebembera enso’rokano zabo. (1 Petero 5:1) Ekintu nikyo kimu ekikorwa n’omu butebe mukaaga obundi obw’Akatebe Akalemi. Tiharoho ow’oruganda ha Katebe Akalemi ayerora kuba mwebembezi w’abegenzi be. Buli w’oruganda ha katebe kanu nauwe asemeriire kulisibwa kandi asemeriire kutunga eby’okulya by’omwoyo kuruga hali omwiru omwesigwa n’okuhondera oburagirizi bwe.

12. Bikaguzo ki ebi turukugenda kugarukamu?

¹² Ab’oruganda abali ha Katebe Akalemi tibahikiriire. Nikasobora kukora ensobi obu karukuba nikasoborra Baibuli rundi nikaragirra ekitebe kya Yahwe. Ekyokurorraho, ebitabu byaitu ebirukwetwa Watch Tower Publications Index bibamu omutwe gunu “Beliefs Clarified,” [Kuterekerezamu Okwetegereza Kwaitu] ekiba nikyoleka empinduka ezitali zimu ezikozerwe omu nsoborra y’Ebyahandiikirwe  kuruga omwaka 1870. Yesu atatugambire ngu omwiru we omwesigwa akaba n’agenda kuturukya eby’okulya eby’omwoyo ebitaine akamogo. Hati nitusobora kugarukamu tuta ekikaguzo kinu ekya Yesu: ‘Araha omuiru ogu rubale ow’okwesiga kandi ow’amagezi?’ (Matayo 24:45) Bwa kaiso ki oburoho oburukwoleka ngu Akatebe Akalemi nuwe omwiru omwesigwa? Leka turole ebintu nibyo bimu bisatu ebyakonyire akatebe akalemi omu busumi bw’abakwenda.

13. Omwoyo ogurukwera gukonyire guta Akatebe Akalemi?

¹³ Omwoyo ogurukwera gukonyera Akatebe Akalemi. Omwoyo ogurukwera gukonyire Akatebe Akalemi kwetegereza amananu ag’omu Baibuli agakaba gatamanyirwe kara. Ekyokurorraho, tekereza ha kintu eki tusangirwe tubalizeho, eky’okuterekerezamu enyikiriza yaitu. Tiharoho omuntu ayakusoboire kwetegereza n’okusoborra ebintu binu ‘ebitarukumanywa ebya Ruhanga’ omu maani ge habwe! (Soma 1 Abakolinso 2:10.) Akatebe Akalemi nikehurra nk’oku omukwenda Paulo yayehuliire obu yahandiikire n’agamba: “Nibyo tugamba, hatali omu bigambo amagezi gabantu ebigegesa, baitu omwebi omwoyo [ebigwegesa].” (1 Abakolinso 2:13) Habwaki habaireho okweyongera omu kwetegereza Baibuli kuruga 1919 kandi kunu emyaka nyingi muno enyuma abantu baikaire nibegesebwa ebisuba kandi bataine oburagirizi oburungi? Ensonga eri emu yonka, Ruhanga aikaire n’aha obukonyezi kuraba omu omwoyo gwe ogurukwera!

14. Kusigikirra ha Okusuku’rwa 14:6, 7, abamaraika bakonyera bata Akatebe Akalemi n’abantu ba Ruhanga omu kasumi kanu?

¹⁴ Abamaraika bakonyera Akatebe Akalemi. Akatebe Akalemi kaine obujunanizibwa bw’amaani muno obw’okuragirra abatebezi abarukuhingura omu bukaikuru munaana omu mulimo gw’okutebeza omu nsi yoona. Habwaki omulimo gunu gurugiremu ebirungi? Emu ha nsonga eri habw’obusagiki bw’abamaraika. (Soma Okusuku’rwa 14:6, 7.) Emirundi nyingi, abamaraika baragiriire abatebezi bagende ha muntu abaire n’akyaruga kusaba Yahwe kumukonyera! * (Rora obugambo obuli hansi.) N’omu biikaro nambere abatebezi barukuhiganizibwa, omulimo gw’okutebeza n’okwegesa Baibuli nigweyongera kukura. Kinu nakyo nikisoboka habw’obukonyezi bw’abamaraika.

15. Akatebe Akalemi nikahukanaho kata n’abebembezi b’amadiini ageyeta Makristaayo? Ha ekyokurorraho.

¹⁵ Ekigambo kya Ruhanga nikyebembera Akatebe Akalemi. (Soma Yohana 17:17.) Tekereza ha kintu ekyabaireho omu 1973. Watchtower ya Juuni 1 ekakaguza obu kiraaba nikisoboka “omuntu okubatizibwa atakalekere kunywa etaaba.” Eky’okugarukamu eki yahaire kikaba nikisigikirra ha misingi ya Baibuli, kandi kikaba nikigamba nangwa! Watchtower ekajuliza ebyahandiikirwe bingi kandi yasoborra ensonga habwaki omuntu arukunywa etaaba asemeriire kwihwa omu kitebe. (1 Abakolinso 5:7; 2 Abakolinso 7:1) Ekagamba ngu, orulengo runu orugumire ruti tirutairweho abantu, baitu “niruruga hali Ruhanga, abaza n’arabira omu Kigambo kye ekihandiikirwe.” Busaho ekitebe kindi kyona eky’ediini ekisoboire kugumira ha nyegesa ya Baibuli ehikire kukira muno enyegesa egi obw’erukuba etarukusemeza abahondezi ba diini egi. Ekitabu ekirukubaza ha diini ekyaturukiibwe omu America nikigamba: “Abebembezi b’enyikiriza z’Ekikristaayo baikaire nibahindura enyegesa zabo omu mulingo oguraikirraniza n’entekereza z’abantu  nukwo batunge obusagiki kuruga omu bantu babo n’abandi baingi.” Baitu Akatebe Akalemi tikacwamu nikasigikirra hali ebi abantu baingi barukugonza. Abakora ha katebe kanu bebemberwa Ekigambo kya Ruhanga, kandi kinu nikigumya ngu mali Yahwe nuwe arukwebembera abantu be omu kasumi kanu.

16. Ogumu ha miringo tusobora kwijuka Akatebe Akalemi nugwo guha?

¹⁶ Soma Abaheburaniya 13:7. Baibuli n’etugambira ‘okwijukaga abarukutwebembera.’ Ogumu ha miringo ei tusobora kubaijukaga nukwo kubasabira Akatebe Akalemi. (Abefeso 6:18) Baine obujunanizibwa bwingi otwaliremu n’okutuha eby’okulya eby’omwoyo, okwebembera omulimo gw’okutebeza omu nsi yoona, n’okurolerra ebihairweyo hali ekitebe. Nahabweki nikyetagisa tubasabire buli kiro!

17, 18. (a) Tuhondera tuta oburagirizi obw’Akatebe Akalemi? (b) Obutukora omulimo gw’okutebeza, tuba nitusagika tuta Akatebe Akalemi na Yesu?

¹⁷ Omulingo ogundi ogw’okwijuka Akatebe Akalemi nukwo kuhondera okuterererwa n’oburagirizi bwabo. Akatebe Akalemi katuha oburagirizi kurabira omu bitabu byaitu, enso’rokano entaito hamu n’enkooto. Kandi nuko kakoma abaroleerezi b’ebicweka nukwo n’abaroleerezi nibakoma abagurusi. Abaroleerezi b’ekicweka hamu n’abagurusi b’ebitebe obu bahondera kurungi oburagirizi bw’Akatebe Akalemi, kiba nikyoleka ngu nibabaijuka. Kandi itwena tutamu Omwebembezi waitu Yesu Kristo ekitiinisa obutworobera abasaija abarukukozesa omu kasumi kanu.—Abaheburaniya 13:17.

¹⁸ Omulingo ogundi ogu tusobora kwijuka Akatebe Akalemi nukwo kwekambira kimu omu mulimo gwaitu ogw’okutebeza. Abaheburaniya 13:7 nirutererra Abakristaayo okwegera ha kwikiriza okwabo abarukwebembera. Akatebe Akalemi kolekere okwikiriza kw’amaani muno obu katebiize kandi kararangya amakuru amarungi. Naitwe nitubasagika omu mulimo gunu omukuru muno? Obuturaaba nitubasagika, nitwija kusemererwa obu turahurra Yesu natugambira: “Nkokumwakoliire omu hali abo bagenzi bange abarukukira obuto, buli mukakiko’ra nyowe.”—Matayo 25:34-40.

19. Habwaki omaliriire kuhondera Omwebembezi waitu Yesu?

¹⁹ Yesu obu yagarukireyo omwiguru, atanagirize abahondezi be. (Matayo 28:20) Akaba akimanyire ngu omwoyo ogurukwera, abamaraika, hamu n’Ekigambo kya Ruhanga bikamukonyera okwebembera obwakaba ali omu nsi. N’omwiru omwesigwa nauwe namuha obukonyezi nubwo bumu. Akatebe Akalemi nikeyongera kuhondera “Omwana Gwentama,” ogu nuwe Yesu, “nambere agenda hona.” (Okusuku’rwa 14:4) Nahabweki obu tuhondera oburagirizi obw’Akatebe Akalemi, tuba nituhondera Omwebembezi waitu Yesu. Obwire obutali bwa hara, n’aija kutwebembera atuhikye omu bwomeezi obutahwaho. (Okusuku’rwa 7:14-17) Kandi busaho omwebembezi arukusobora kuturaganiza ekintu eki!