1, 2. (a) Abakaiso ba Yahwe nibahukana bata n’ediini ezindi? (b) Kiki eki turukugenda kwegaho omu isomo linu n’erirukuhonderaho?

ABANTU bakira kukaguza Abakaiso ba Yahwe, “Omwebembezi wanyu nuwe oha?” Ekintu kinu bakikaguza habwokuba barora amadiini maingi gaine omusaija rundi omukazi arukugebembera. Baitu ha rubaju orwaitu, Omwebembezi waitu taruga omu bantu abatahikiriire. Yesu Kristo nuwe Omwebembezi waitu! Kandi Omwebembezi waitu ayorobera Yahwe habwokuba nuwe Ise kandi Mwebembezi we.—Matayo 23:10.

² Baitu haroho akatebe k’abasaija akarukwetwa ‘omwiru omwesigwa kandi ow’amagezi,’ akarukwebembera abantu ba Ruhanga omu nsi omu kasumi kanu. (Matayo 24:45) Baitu nitugumya tuta ngu Yahwe nuwe arukutwebembera n’akozesa Omwana we? Nitwija kurora ensonga isatu habwaki nitugumya ngu nukwo kiri. Kandi n’obuturaaba nitugamba ngu Yahwe aikaire n’akozesa abantu abamu kwebembera abantu be, nitwija kukyetegereza kurungi ngu Yahwe wonyini nuwe yali n’abebembera kandi n’ahati nuwe akyayebembera abantu be.—Isaya 58:11.

3. Kiki ekyakonyire Musa kwebembera Isareri?

³ Abasaija Ruhanga yakozesaaga bakatunga amaani ag’omwoyo ogurukwera. Ruhanga akakoma Musa kuba mwebembezi w’Abaisareri. Kiki ekyamukonyire kuhikiriza obujunanizibwa bunu obw’amaani? Yahwe akamuha “omwoyogwe ogurukwera.” (Soma Isaya 63:11-14.) Nahabweki Yahwe nuwe yali n’ayebembera abantu be habwokuba nuwe akaba ahaire Musa omwoyo ogwamukonyeraga.

4. Kiki ekikaba nikyoleka ngu Musa akaba aine omwoyo gwa Ruhanga? (Rora ekisisani ekiri ha kutandika kw’isomo linu.)

⁴ Kyali nikisoboka abantu kurora ngu Musa akaba aine omwoyo gwa Ruhanga? Ego! Omwoyo gwa Yahwe gukaha Musa obusobozi bw’okukora eby’amahano n’okumanyisa ibara lya Yahwe hali omulemi wa Misiri ow’amaani ayayetwaga Faraho. (Okuruga 7:1-3) Kandi omwoyo ogurukwera gukakonyera Musa kuba mwebembezi ow’okugonza kandi arukugumisiriza. Akaba n’ayahukanaho n’abebembezi ab’amahanga agandi abakaba bagumangaine kandi abakaba nibegondeza bonka! (Okuruga 5:2, 6-9) Hataroho okugurukyagurukya, Yahwe akakoma Musa kwebembera abantu be.

5. Bantu ki abandi aba Yahwe yahaire omwoyo gwe nukwo basobole kwebembera abantu be?

⁵ Bantu ki abandi aba Yahwe yahaire omwoyo gwe nukwo basobole kwebembera abantu be? Baibuli n’egamba ngu: “Yosuha mutabani wa Nuni akaba aijuire omwoyo gwamagezi.” (Ekyebiragiro 34:9) “Omwoyo gwa Mukama gwaija ha Gideoni.” (Ekyabacwi 6:34) Kandi “omwoyo gwa Mukama gukaija namani ha Daudi.” (1 Samuiri 16:13) Abasaija banu boona bakakonyerwa omwoyo gwa Ruhanga kukora ebintu ebi bakaba batarukusobora kukora omu maani gabo bonka. (Yosuha 11:16, 17; Ekyabacwi 7:7, 22; 1 Samuiri 17:37, 50) Hataroho kugurukyagurukya, Yahwe nuwe yabahaire amaani g’okukora ebintu by’amaani, nahabweki nuwe wenka akaba asemeriire kuhebwa ekitiinisa.

6. Habwaki Yahwe yagonzaga Abaisareri kworobera abebembezi babo?

⁶ Abaisareri bakaba basemeriire kukora ki hanyuma y’okurora ngu Musa, Yosuha, Gideoni, hamu na Daudi bakaba baine omwoyo gwa Yahwe? Bakaba basemeriire kubatamu ekitiinisa. Abantu obu bahyemiire Musa, wetegereze omulingo Yahwe yakagwize: “Abantu banu balihikya nkaha okungaya?” (Okubara 14:2, 11) Kinu nikyoleka ngu, Yahwe akaba akomere abasaija banu kwebembera abantu be. Abantu obu bayoroberaga abebembezi banu, kyabarwaga ngu nibahondera Yahwe nk’Omwebembezi wabo.

7. Abamaraika bakakonyera bata Musa?

⁷ Abamaraika bakakonyera Abasaija Ruhanga yakozesaaga. (Soma Abaheburaniya 1:7, 14.) Ruhanga akakozesa abamaraika okwebembera Musa. Eky’okubanza, maraika ‘akamubonekera omu rusaka’ yamuha omulimo  gw’okucungura Abaisareri n’okubebembera. (Engeso Ezabakwenda 7:35) Ekyakabiri, Ruhanga akakozesa abamaraika kuha Musa Ebiragiro ebi yakukozeseze kwegesa Abaisareri. (Abagaratiya 3:19) Ekyakasatu, Yahwe akamugambira: “oyebembere abantu obahikye omu kiikaro eki ekinakugambiire: dora, maraika wange alikwebembera.” (Okuruga 32:34) Baibuli tetugambira ngu Abaisareri bakarora maraika n’akora ebintu binu. Baitu, omulingo Musa yayegeseze kandi yayebembera abantu gukagumya ngu abamaraika bakaba nibamukonyera.

8. Abamaraika bakakonyera bata Yosuha na Hezekiya?

⁸ Bantu ki abandi abakonyiirwe bamaraika? Baibuli n’egamba ngu maraika akaija “nkengabwa yihe lya Mukama,” yakonyera Yosuha okusingura obulemu obwakaba n’arwana n’Abakanani. (Yosuha 5:13-15; 6:2, 21) Akasumi kamu, abantu ba Ruhanga obu bakaba nibebemberwa Omukama Hezekiya, ihe likooto ery’Abasura likagonza kuhwerekereza Yerusalemu. Baitu omu itumbi limu lyonka, “maraika wa Mukama akagenda yahwerekereza abasaija 185,000 omu rukande rwa Abasura.”—Isaya 37:36.

9. N’obukiraaba ngu abasaija Ruhanga yakozesaaga bakaba batahikiriire, Abaisareri bakaba nibetagisibwa kukora ki?

⁹ Bamaraika bihangwa ebihikiriire. Baitu abasaija abakonyirwe bakaba batahikiriire. Ekyokurorraho, ekiro kimu, Musa akalemwa kuhaisa Yahwe ekitiinisa. (Okubara 20:12) Yosuha atabanze kwekaguza hali Ruhanga obu Abasaija kuruga omu Gibeoni baali nibagonza kukora endagaano nauwe. (Yosuha 9:14, 15) Ekiro kimu, Hezekiya akatunga emyehembo. (2 Ebyomubusinge 32:25, 26) Abantu banu n’obu baraaba baali batahikiriire, Abaisareri bakaba nibetagisibwa okuhondera obwebembezi bwabo. Abaisareri bakaba nibarora ngu Yahwe akaba n’akozesa abamaraika okusagika abasaija banu bona. Hataroho okugurukyagurukya, Yahwe nuwe akaba n’ayebembera abantu be.

10. Musa akebemberwa ata Ebiragiro bya Ruhanga?

¹⁰ Abasaija Ruhanga yakozesaaga bakebemberwa Ekigambo kye. Baibuli eyeta Ebiragiro ebyahairwe Abaisareri “Biragiro bya Musa.” (1 Ekyabakama 2:3) Baitu Baibuli ekyoleka kurungi ngu Yahwe nuwe akaba ahaire Isareri Ebiragiro ebi. Musa nauwe akaba asemeriire kuhondera Ebiragiro ebi. (2 Ebyomubusinge 34:14) Ekyokurorraho, hanyuma ya Yahwe kumugambira omulingo gw’okwombeka ehema y’okutangatanganiramu, Musa akakora “nka byona okubiri Mukama ebiyamuragiire, nukwo yakozire ati.”—Okuruga 40:1-16.

11, 12. (a) Yosuha n’abakama bandi abalemere abantu ba Ruhanga bayetagisibwaga kukora ki? (b) Ekigambo kya Ruhanga kikakonyera kita abebembezi omu busumi bwa kara?

¹¹ Akasumi Yosuha yafookere mwebembezi, akaba aine ekitabu ekikaba kirumu ebimu ha biragiro bya Ruhanga. Yahwe akamugamba ati: “Olikitekererezamu nyamusana nekiro, nukwo okolege byona nkokubyahandikirwemu.” (Yosuha 1:8) Abakama abahondiireho bakaba basemeriire kusoma ebiragiro binu buli kiro, okwehandiikira ebiragiro, n’okworobera “ebigambo ebyebiragiro binu na binu ebitairweho, okubikoraga.”—Soma Ekyebiragiro 17:18-20.

¹² Ekigambo kya Ruhanga kikakonyera kita abasaija abaali nibebembera? Tekereza ha kyokurorraho ky’Omukama Yosiya. Hanyuma y’okuzoora Ebiragiro bya Musa, omuhandiiki wa Yosiya akatandika kubimusomera. * (Rora obugambo obuli hansi.) “Kandi kyahika, omukama  obuyahuliire ebigambo ebyomu kitabu kyebiragiro, yatemura ebyokujwarabye.” Ekigambo kya Ruhanga omu kasumi ako kikaletera Yosiya okuhwerekereza ebisisani byona ebikaba biri omu ihanga eri n’okukora entekaniza z’okujaguza Okuhingurwaho okw’amaani muno okukaba kutakabahoga. (2 Ekyabakama 22:11; 23:1-23) Habwokuba Yosiya n’abebembezi bandi abesigwa bakahondera Ekigambo kya Ruhanga, bakaba betegekere kuhinduramu omulingo bayebemberaga abantu ba Ruhanga. Empinduka zinu zikakonyera abantu ba Ruhanga okumworobera.

13. Abayebemberaga abantu ba Ruhanga bayahukanaga bata n’abebembezi b’amahanga agandi?

¹³ Abebembezi ab’amahanga agandi bayebemberaga nibasigikirra ha magezi make ag’abantu. Ekyokurorraho, abebembezi ba Kanani n’abantu babo bakakora ebintu ebibi muno nk’okuterana n’abanyabuzaale babo, abasaija kuterana n’abasaija bagenzi babo, kuterana n’ebisoro, kuhonga abaana, hamu n’okuramya ebisisani. (Ebyabalevi 18:6, 21-25) Kandi abebembezi ba Baburoni n’aba Misiri batahondere orulengo rw’obwecumi oru abantu ba Ruhanga bahonderaga. (Okubara 19:13) Baitu abantu ba Ruhanga baali nibakirora ngu abebembezi babo babekambisaga okuba becumi omu kuramya, omu mubiri, hamu n’okwerinda ebikorwa eby’obusihani. Hataroho okugurukyagurukya, Yahwe nuwe akaba n’abebembera.

14. Habwaki Yahwe yafubiire abamu ha bebembezi b’abantu be?

¹⁴ Abamu ha bakama abayebembiire abantu ba Ruhanga batahondere oburagirizi bwa Yahwe. Abakama banu abajeemu bakangira kimu kuhondera oburagirizi bw’omwoyo ogurukwera ogwa Ruhanga, obw’abamaraika, n’obw’omu Kigambo kye. Obwire obumu, Yahwe yafubiraga rundi yabaihaga omu bwebembezi. (1 Samuiri 13:13, 14) Hanyuma y’akasumi, Yahwe akakoma omuntu akaba n’agenda kuba mwebembezi ahikiriire.

15. (a) Abanabbi bakoleka bata ngu hakaba nihagenda kwija omwebembezi ahikiriire? (b) Noha onu ayali mwebembezi ahikiriire?

¹⁵ Ira muno, Yahwe akaraganiza ngu akaba n’agenda kukoma omuntu ahikiriire okwebembera abantu be. Ekyokurorraho, Musa akagambira Abaisareri ati: “Mukama Ruhanga wawe alikuimukizaho nabi hagati yawe, owomu bene banyu, [alisisana] nyowe; nuwe murahurraga.” (Ekyebiragiro 18:15) Isaya akagamba ngu Omulemi onu aliba “omukuru kandi engabwa.” (Isaya 55:4) Kandi Danieri akahandiika hali Masiya yamweta ‘Omukuru.’ (Danieri 9:25) Hanyuma ya binu byona, Yesu akeyeta ‘Omukama’ w’abantu ba Ruhanga. (Soma Matayo 23:10.) Abegeswa ba Yesu bakamuhondera begondiize kandi bakamanya ngu Yahwe nuwe akaba akomere. (Yohana 6:68, 69) Baitu, bakasigikirra hali ki okugumya ngu Yesu nuwe Yahwe akaba akomere okwebembera abantu be?

16. Kiki ekirukwoleka ngu Yesu akaba n’atunga amaani kuruga hali omwoyo ogurukwera?

¹⁶ Omwoyo ogurukwera gukaha Yesu amaani. Yesu obu yabatiziibwe, Yohana akarora “iguru litemukire, nomwoyo [oguli] nkeriba [nigusirimuka] haluwe.” Aho n’aho, omwoyo gwayebembera Yesu yagenda omu irungu. (Marako 1:10-12) Yesu obwakaba n’atebeza omu nsi, omwoyo gwa Ruhanga ogurukwera  gukamusobozesa kwegesa n’okukora eby’amahano. (Engeso Ezabakwenda 10:38) Okwongerezaho, omwoyo ogurukwera gukamukonyera okwoleka emiringo emirungi nk’okugonza, okusemererwa, hamu n’okwikiriza okw’amaani. (Yohana 15:9; Abaheburaniya 12:2) Busaho mwebembezi ondi wena ayakonyirwe omwoyo gwa Ruhanga kwingana Yesu Kristo. Hataroho okugurukyagurukya, Yahwe akakoma Yesu okuba Mwebembezi.

17. Abamaraika bakakora ki kukonyera Yesu?

¹⁷ Abamaraika bakakonyera Yesu. Obu harabireho obwire buke hanyuma ya Yesu okubatizibwa, ‘bamaraika bakaija bamuhereza.’ (Matayo 4:11) Obwakaba asigaizeyo esaaha nke nukwo aitwe, ‘maraika akaruga omu iguru yamugarramu amaani.’ (Luka 22:43) Yesu akaba akimanyire ngu Yahwe akaba n’asobora kumusindikira abamaraika okumukonyera buli murundi ogw’akaba n’abetagiramu.—Matayo 26:53.

18, 19. Yesu akebemberwa ata Ekigambo kya Ruhanga omu obwomeezi bwe n’omu kwegesa kwe?

¹⁸ Yesu akebemberwa Ekigambo kya Ruhanga. Kuruga ha kutandika kw’obuheereza bwe kuhika ha kufa kwe, Yesu akahondera Ebyahandiikirwe. N’obwakaba n’afa, akajuliza obunabbi oburukubaza ha Masiya. (Matayo 4:4; 27:46; Luka 23:46) Baitu abebembezi b’amadiini omu kasumi ako baali nibahukana muno hali Yesu. Ekigambo kya Ruhanga obu kyabaga kitarukwikirraniza n’enyegesa zabo, bakigayaga. Yesu obwakaba n’ababazaaho, akajuliza kuruga omu Kigambo kya Ruhanga n’agamba ati: “Abantu banu nibantaho ekitinisa neminwa yabu: kandi omutima gwabu gundi hara. Baitu bandamiza busa, nibegesa ebiragiro ebyabantu, ngu nibyo byokukwata.” (Matayo 15:7-9) Yahwe akaba atasobora kukoma abantu abatarukuhondera Ekigambo kye kwebembera abantu be.

¹⁹ Kandi Yesu akakozesa Ekigambo kya Ruhanga  obwakaba n’ayegesa abandi. Abebembezi b’ediini obu bamuhakanizaga, tiyasigikirraga ha magezi ge kubagarukamu, baitu yayegesaaga n’asigikirra ha Byahandiikirwe. (Matayo 22:33-40) Ekintu ekindi, Yesu akaba n’asobora kugambira abantu ebintu ebirukuhuniriza ebiri omu iguru rundi ebirukukwata ha kuhangwa okw’ebintu byona. Baitu habwokugonza Ekigambo kya Ruhanga, yagonzaga kukyegesa abandi naigura ebitekerezo byabo nukwo basobole kwetegereza Ebyahandikirwe.—Luka 24:32, 45.

20. (a) Yesu akaha ata Yahwe ekitiinisa? (b) Entekereza ya Yesu ekaba n’eyahukanaho ata n’eya Herode Agulipa ow’Okubanza?

²⁰ Nobukiraaba ngu abahuliriizaga Yesu bahunirraga habw’omulingo yayegesaga, emirundi yona ekitiinisa yakiherezaga Omwegesa we Yahwe. (Luka 4:22) Omusaija omu omuguuda obu yalengereho kuha Yesu ekitiinisa n’amweta “Omwegesa Omurungi,” Yesu akebundaaza yamugarukamu n’agamba: “Nonyetera ki omurungi? Busaho murungi rundi omu, nuwe Ruhanga.” (Marako 10:17, 18) Hanyuma y’emyaka nka munaana, Herode Agulipa ow’Okubanza akafooka mwebembezi wa Yuda. Baitu omwebembezi onu akaba aine entekereza erukwahukana n’eya Yesu. Kiro kimu obu hakaba haroho oruso’rokano orw’embaganiza, Herode akajwara ekijwaro ky’obukama ekirungi muno. Abantu obu bamurozere kandi bahurra ebyakaba n’abaza, bakatokera haiguru nibagamba: “Iraka lya ruhanga tiriri lyomuntu!” Herode akagonza okuhaisanizibwa kandi habwokuba “atahe Ruhanga ekitinisa”, maraika wa Ruhanga akamutera “yalibwa enzito, yafa.” (Engeso Ezabakwenda 12:21-23) Eki nikyoleka ngu Yahwe akaba atakomere Herode okuba mwebembezi. Baitu ha rubaju orundi, Yesu uwe akoleka ngu Ruhanga akaba amukomere, kandi yaikaraga naha Yahwe ekitiinisa habwokuba nuwe Mwebembezi Omukuru ow’abantu be.

21. Kiki ekiturukwija kubazaaho omu isomo erirukuhonderaho?

²¹ Yahwe atakome Yesu kuba Omwebembezi ow’akacu akake muno. Yesu obu yahumbuukire, akagambira abegeswa be ati: “Mpairwe obusobozi bwona omu iguru na hansi.” Akongera yagamba: “Dora, nyowe ndi hamu nainywe ebiro byona okuhikya obusinge bunu obubulihwaho.” (Matayo 28:18-20) Baitu nikisoboka kita Yesu okwebembera abantu ba Ruhanga abali omu nsi kandi kunu ali omu iguru tutarukumurora? Baitu hanu omu nsi, noha Yahwe owakaba n’agenda kukoma kusigara omu bigere bya Yesu? Abakristaayo bakumanyire bata abasaija Ruhanga abarukukozesa? Isomo erirukuhonderaho niriija kugarukamu ebikaguzo ebi.