ITWENA tugonza abantu abandi baturole nk’abantu abarungi. Baitu omu nsi enu tikyanguhire kwoleka oburungi. Ensonga emu eri ngu habwokuba abantu baingi bali ‘abatagonza oburungi.’ (2 Tim. 3:4) Baangira kimu kuhondera endengo za Yahwe. Yahwe ekyayeta ekirungi, ubo “bakyeta ekibi” kandi ekyayeta ekibi, ubo bakyeta “ekirungi.” (Is. 5:20) Ekintu ekindi, tikyanguhire kuba abantu abarungi habwokuba tituhikiriire kandi n’ebintu ebitwarabiremu nibisobora kutulemesa kwoleka oburungi. Nahabweki nitusobora kwehurra nka munyaanya itwe arukwetwa Anne, * anyakumazire emyaka nyingi naheereza Yahwe. Nagamba ati: “Kingumira muno kwikiriza ngu ninsobora kuba muntu murungi.”

Amakuru amarungi gali ngu, itwena nitusobora kukurakuraniza oburungi! Oburungi buletwa omwoyo gurukwera kuruga hali Ruhanga kandi omwoyo gunu gw’amaani kukira obutahikirra bwaitu hamu n’ebintu ebindi ebisobora kutulemesa kuba n’oburungi. Leka turole oburungi nikimanyisa ki kandi turole nk’oku tusobora kweyongera kwoleka omulingo gunu omu bwijwire.

Oburungi nikitwarramu engeso enungi, obuhikiriire, n’okutaba muntu mubi. Omuntu omurungi aikara naserra omulingo asobora kukorra abantu abandi ebirungi kandi abibakorra.

Nosobora kuba okirozere ngu abandi kibanguhira kukorra ab’omu maka gabo hamu n’abanywani babo ebirungi, baitu aho oburungi nuho busemeriire kugarukira? Ky’amananu ngu twine nambere turukugarukira obukirukuhika ha kwoleka omulingo gunu, habwokuba Baibuli negamba ngu “mazima kwo tiharoho hansi omuntu ahikiriire, arukukora kurungi, atarukukora kubi.” (Mug. 7:20) Omukwenda Paulo akebazaaho ati: “Manyire nti omuli nyowe, omu mubiri gwange, tiharumu ekirungi.” (Bar. 7:18) Nahabweki nikyeyoleka kurungi ngu tusemeriire kwegera hali Yahwe obuturaaba nitugonza kukurakuraniza omulingo gunu ogw’oburungi.

Yahwe Ruhanga nuwe atekaho orulengo orw’ebintu ebirungi. Baibuli emubazaaho eti: “Iwe oli murungi, kandi okora ebirungi. Onyegese ebyoragira.” (Zab. 119:68) Leka tubazeeho ebintu bibiri ebibaziibweho omu rukarra runu ebirukwoleka oburungi bwa Yahwe.

Yahwe murungi. Yahwe murungi kandi tikirukusoboka uwe kulemwa kwoleka oburungi. Tekerezaaho ekyabaireho Yahwe obuyagambiire Musa ngu: “Ndarabya oburungi bwange bwona omu maiso gawe.” Yahwe akoleka Musa ekitiinisa kye otwaliremu n’oburungi bwe. Kandi Musa akahurra iraka niribazaaho Yahwe nirigamba ngu: “[Yahwe, Yahwe], Ruhanga aijuire okuganyira kandi wembabazi, aikaraho okutabihiirwa, asagire ebyokuganyira namazima; nagirra embabazi enkumi nenkumi, alekera okutahikirra nokusisa nekibi: kandi ataliihaho omusango nakake hali ogu anyinagwo.” (Kurug. 33:19; 34:6, 7) Kinu nikyolekera kimu ngu Yahwe murungi muno omu buli mulingo. N’obukiraaba ngu Yesu nuwe yakizireyo kwoleka oburungi omu bantu, nauwe akagamba ngu: “Busaho murungi, rundi omu, nuwe Ruhanga.”​—Luk. 18:19.

Emirimo ya Yahwe mirungi. Buli kimu Yahwe ekyakora kyoleka ngu murungi. “Yahwe murungi hali  bona: kandi embabazi ze zeyolekera omu mirimo ye yona.” (Zab. 145:9, NW) Habwokuba Yahwe murungi kandi tasoroora, aha abantu boona obwomeezi n’ebibarukwetaaga kwikara bali bomeezi. (Eng. 14:17) Kandi n’obwatuganyira aba natwoleka oburungi bwe. Omuhandiiki wa Zabuli akagamba ati: “Baitu iwe, [Yahwe], oli murungi, orahuka okuganyira.” (Zab. 86:5) Tukigumye ngu “ekintu kyona ekirungi” Yahwe “talikiima abo abagenda niberinda.”​—Zab. 84:11.

Tukahangwa omu kisisani kya Ruhanga, nahabweki nitusobora kuba bantu abarungi kandi nikisoboka kukora ebintu ebirungi. (Kub. 1:27) Baitu nabwo, Ekigambo kya Ruhanga kitutererra kiti: “Mwege okukora kurungi.” (Is. 1:17) Hati, nitusobora kweyongera tuta kwoleka oburungi? Katurole emiringo esatu nk’oku tusobora kukikora.

Eky’okubanza, saba omwoyo ogurukwera kuruga hali Yahwe habwokuba gukonyera Abakristaayo kuba barungi omu maiso ga Yahwe. (Bag. 5:22) Mali, omwoyo gwa Ruhanga nigusobora kutukonyera kugonza ebirungi n’okunoba ekibi. (Bar. 12:9) Baibuli eyoleka ngu Yahwe nasobora kutugumya “omu ngeso zona nebigambo byona ebirungi.”​—2 Bas. 2:16, 17.

Ekyakabiri, tusemeriire kusoma Ekigambo kya Ruhanga. Obuturaaba nitukisoma, Yahwe naija kutwegesa “omuhanda gwona omurungi” kandi naija kutwegesa kukora “omulimo gwona omurungi.” (Nfu. 2:9; 2 Tim. 3:17) Obutukisoma kandi tukecumitiriza ha bitusomere, twijuza emitima yaitu n’ebintu ebirungi ebirukukwata hali Ruhanga hamu n’eby’agonza. Omutima gwaitu guli nk’elyahurro ly’ebintu ebirungi. Obutusoma Baibuli, tuba nitwahura ebintu ebirungi omu mutima gwaitu ebitusobora kukozesa omu bwire obuturukuba nitubyetaaga.​—Luk. 6:45; Bef. 5:9.

Ekyakasatu, tutamu amaani gaitu goona kwegera ha bintu ebirungi. (3 Yoh. 11) Ebyokurorraho ebirungi eby’okuhondera nitubisanga omu Baibuli. Nitukimanya ngu ekyokurorraho ekirukukirayo nikyo ekya Yahwe n’ekya Yesu. Baitu nitusobora n’okuhondera ebyokurorraho by’abantu abandi abaali barungi omu maiso ga Yahwe. Abantu babiri abatusobora kutekerezaaho nuwe Tabisa na Baranaba. (Eng. 9:36; 11:22-24) Nosobora kwecumitiriza ha byahandiikirwe ebirukubabazaaho, kandi nosobora kulengaho kwetegereza ebintu ebibakozere kusobora kukonyera abandi. Tekerezaaho omulingo osobora kukonyera abantu ab’omu ka yaawe rundi ab’omu kitebe kyanyu. Kandi otaitira eliiso ebirungi ebibaatungire habw’okuba bantu barungi. Naiwe nosobora kubisoma n’ogasirwa.

Nitusobora n’okutekerezaaho eby’okurorraho by’abaheereza ba Yahwe ab’omu kasumi kanu abakora ebirungi. Ekyokurorraho, tekerezaho abagurusi abarukukora n’amaani kandi ‘abagonza oburungi.’ Kandi titusobora kwebwa n’abanyaanya itwe  abesigwa “abegesa oburungi” kuraba omu bigambo n’omu bikorwa byabo. (Tit. 1:8; 2:3) Munyaanya itwe arukwetwa Roslyn nagamba ati: “Munyaanya itwe omu anyakuli munywani wange atamu amaani maingi kusobora kukonyera abandi omu kitebe n’okubagarramu amaani. Atekerezaaho enyikara ei barukurabamu, abaha ebisembo ebitaitotaito, kandi abakonyera n’omu miringo endi. Mali nimmutwara kuba muntu omurungi.”

Yahwe natererra abantu be ati: “Muserre ebirungi.” (Am. 5:14) Obuturakora eki, nitwija kugonza endengo ze kandi nitwija kweyongera kutunga ekihika ky’okukora ebirungi.

Titusemeriire kutekereza ngu kwoleka oburungi nikyetagisa kukora ebintu eby’amaani rundi kuha abantu ebisembo by’amaani. Katukozese ekyokurorraho: Ekimera kusobora kukura kurungi, tikirukumara kukisesera amaizi maingi muno habw’omurundi gumu gwonka. Twine kukisesera amaizi make make kumara akasumi. Nikyo kimu naitwe, obutukorra bangezi baitu ebintu bingi ebitaitotaito kusobora kubakonyera, tuba nitwoleka oburungi bwaitu.

Baibuli etutererra kwikara nituserra omugisa gw’okukora ebirungi “nokwetekanirizaga” kukora ebirungi. (2 Tim. 2:21; Tit. 3:1) Kwikara nitufaayo kumanya enyikara bagenzi baitu barukurabamu nikiija kutukonyera kurora emiringo tusobora kusemeza omutaahi waitu “omu burungi obwokwekambisa.” (Bar. 15:2) Kinu nikisobora kutwarramu kugabana n’omuntu ekintu ekitwine. (Nfu. 3:27) Nitusobora kuraaliza omuntu kwija nukwo tulye nauwe ekiihuro rundi tumaleho obwire tuli nauwe. Obuturaaba tumanyire omuntu wena anyakurwaire nitusobora kumuhandiikira akabbaruha k’okumuhuumuza, nitusobora kumubungira, rundi kumuterraho akasimu. Mali nitusobora kutunga emigisa nyingi ey’okubaza “ekirungi kyona . . . obwokwombeka nkomuntu okwa[ye]taga” kandi nikisobora kumugasira.​—Bef. 4:29.

Nka Yahwe, tukorra abantu boona ebirungi. Nahabweki titusoroora omuntu wena. Omulingo ogurukukirayo kwoleka kinu nukwo kutebeza abantu boona amakuru amarungi ag’Obukama bwa Ruhanga. Nk’oku Yesu yaragiire, tugonza kukora kurungi n’abo abooleka ngu nibatunoba. (Luk. 6:27) Tikiri kibi kwoleka abantu embabazi n’okubakorra ebirungi habwokuba “hali [ebirukusisana] biti busaho kiragiro.” (Bag. 5:22, 23) Obutukorra abantu ebintu ebirungi n’omu bwire obw’okulengwa rundi obw’okuhiganizibwa, kisobora kuletera abandi kwega amananu n’okukugiza Ruhanga.​—1 Pet. 3:16, 17.

Baibuli egamba ngu “omuntu omurungi atunga empeera habw’ebikorwa bye” (Nfu. 14:14, NW) Okukora ebirungi kirugamu mpeera ki? Kakuba tutwaza abandi kurungi, nabo nibasobora kututwaza kurungi. (Nfu. 14:22) Abandi n’obubaraaba batatutwaize kurungi, twikale nitukora ebintu ebirungi habwokuba nikisobora kubaletera kuhindura ha ntekereza yabo kandi nibatandika kututwaza kurungi.​—Bar. 12:20.

Ab’oruganda n’abanyaanya itwe baingi bagambire ngu bagasiirwe muno habw’okwetantara kukora ebibi baitu bakakora ebirungi. Katubazeeho ekyokurorraho kya mugenzi waitu arukwetwa Nancy. Nagamba ati: “Nkakura ndi muntu atarukufaayo, ndi musihani, kandi ntarukutamu abantu ekitiinisa. Baitu obunatandikire kwega ha ndengo za Ruhanga ezirukukwata ha burungi, kandi natandika kuzita omu nkora, nkatandika kutunga okusemererwa. Hati ndi muntu arukwetamu ekitiinisa kandi ninkitamu n’abandi.”

Ensonga erukukirayo obukuru habwaki tusemeriire kukurakuraniza omulingo ogw’oburungi eri ngu habwokuba kisemeza Yahwe. N’obukiraaba ngu abarukukira obwingi tibarora ebirungi ebiturukora, Yahwe uwe abirora. Amanyire buli kirungi kyona ekitukora n’ekitekerezo kyona ekirungi ekitwine. (Bef. 6:7, 8) Kiki ekirugamu? “Omuntu omurungi alibona embabazi hali Mukama.” (Nfu. 12:2) Nahabweki leka twikale nitukurakuraniza omulingo ogw’oburungi. Yahwe naraganiza “okusimwa nekitinisa nobusinge hali wena arukukora okurungi.”​—Bar. 2:10.