1. Ekimu ha bintu ebirukukwata hali Yesu ekikira kusemeza abantu baingi nikyo kiha? Soborra.

OGUMU ha miringo ya Yesu erukusemeza nubwo obusobozi bwe obw’okwetegereza obulemeezi obuturukutunga nk’abantu abatahikiriire. Yesu obwakaba akyali omu nsi, ‘akasemererwe hamu nabo abakaba basemeriirwe’ kandi ‘akarra nabo abakaba nibarra.’ (Bar. 12:15) Ekyokurorraho, abegeswa be 70 obubagarukire kuruga omu buheereza basemeriirwe hanyuma y’okutebeza n’obusinguzi, Yesu “akasemerwa omu mwoyo ogurukwera.” (Luk. 10:17-21) Ha rubaju orundi, obuyarozere omulingo abagonzebwa ba Lazaro bakaba baine obujune habw’okufeerwa Lazaro, Yesu ‘akasinda omu mutima natuntura.’​—Yoh. 11:33.

2. Kiki ekyakonyire Yesu kurumirirwa abantu?

² Kiki ekyaletiire omusaija onu ow’akaba ahikiriire kwoleka embabazi nyingi muno obwakaba nakoragana n’abantu? Ensonga erukubanza omu byona eri ngu yagonzaaga abantu. Nk’oku kyolekerwe omu kicweka ekihoire, omu bihangwa byona, Yesu akakira kugonza abantu. (Nfu. 8:31) Okugonza okwakaba ainire abantu kukamuletera kumanyira kimu omulingo abantu batekereza. Omukwenda Yohana nagamba ngu: “Akamanya ebikaba biri omu bantu.” (Yoh. 2:25) Yesu yakwatirwaga abantu embabazi z’amaani. Abantu bakarora okugonza okwakaba abainire kandi kikabaletera kuhuliiriza obutumwa bw’Obukama. Obuturaikara nitukurakuraniza okugonza kwaitu hali abantu, nitwija kuhikiriza kurungi obuheereza bwaitu.​—2 Tim. 4:5.

3-4. (a) Obuturaaba nitufaayo hali abantu, nitwija kuba n’entekereza ki ha buheereza bwaitu? (b) Nitugenda kubazaaho ki omu kicweka kinu?

³ Omukwenda Paulo akamaya nk’oku bwali bujunanizibwa bwe kutebeza, kandi naitwe tukimanyire ngu twine kutebeza. (1 Kol. 9: 16) Baitu obuturaaba nitufaayo hali abantu, titurukwija kurora obuheereza nk’obujunanizibwa kwonka. Nitwija kugonza kwoleka okugonza kwaitu hali abantu kandi nitwija kuba n’ekihika ky’okubakonyera. Nitukimanya ngu “okugaba kwomugisa okukira okuhebwa.” (Eng. 20:35) Obuturatebeza n’ekigendererwa ky’okukonyera abantu nitwija kutunga okusemererwa kwingi.

⁴ Omu kicweka kinu, nitwija kurora omulingo tusobora kwoleka ngu nitufaayo hali abantu abaturukutebeza. Eky’okubanza, nitwija kurora kiki ekiturukwegera ha mulingo Yesu yayehuliiremu hali abantu. Hanyuma nitwija kurora nk’oku tusobora kuhondera ekyokurorraho kye omu miringo ena.​—1 Pet. 2:21.

5-6. (a) Yesu akafaaho abantu ba mulingo ki? (b) Kiki ekyaletiire Yesu kukwatirwa embabazi abantu abayatebiize nk’oku kyali kirangirwe omu Isaya 61:1, 2?

⁵ Katurole ekyokurorraho ekirukwoleka omulingo Yesu yayolekere ngu nafaaho abantu. Kiro kimu, Yesu n’abegeswa be bakaba bajwahire muno habwokuba bakaba basiibire nibatebeza batahumwireho. Bakaba “batanyina kacu nobuhokuba hokulira.” Nahabweki Yesu akatwara abegeswa be “omu kiikaro nambere hatarumu bantu” nukwo ‘bahumuleho.’ Baitu ekitebe ky’abantu baingi bakairuka babanzaayo Yesu n’abegeswa be nambere bakaba nibagenda kuhumurra. Yesu obuyahikireyo yarora abantu banu boona, akakora ki? Baibuli negamba ngu “yabaganyira, * baitu bakaba basisaine nkentama ezitanyina mulisa: yabanza kubegesa ebigambo bingi.”​—Mar. 6:30-34.

⁶ Wetegereze ensonga habwaki Yesu yakwasirwe embabazi, rundi ekyamuletiire kubaganyira. Akakirora ngu abantu bakaba “basisaine nkentama ezitanyina mulisa.” Nikisoboka kuba ngu Yesu akarora abamu omulibo bali banaku kandi baali nibakora muno kusobora kurolerra amaka gabo. Rundi abandi omulibo nibasobora kuba baali baine obujune habw’okufeerwa abantu babo. Obukiraaba nukwo kyali, Yesu aketegereza enyikara eibakaba nibarabamu. Nk’oku  twarozere omu kicweka ekihoire, Yesu nauwe nasobora kuba yarabire omu zimu ha nyikara zinu. Kufaayo hali abandi kikamuletera kubegesa obutumwa oburukuhumuza.​—Soma Isaya 61:1, 2.

7. Nitusobora kwoleka tuta ngu nituhondera ekyokurorraho kya Yesu?

⁷ Ekyokurorraho kya Yesu nikitwegesa ki? Naitwe tuli nka Yesu, twetoroirwe abantu abali “nkentama ezitanyina mulisa.” Baine ebizibu biingi. Kandi niitwe abaine ekintu ekirabahumuza​—amakuru amarungi ag’Obukama. (Kus. 14:6) Nahabweki naitwe tuli nka Mukama waitu, tutebeza amakuru amarungi habwokuba nitugirra embabazi “abasega nabanaku.” (Zab. 72:13) Tukwatwaho habw’ebizibu abantu barukurabamu kandi nitugonza kugira ekitwakoraho kubakonyera.

8. Ogumu ha miringo tusobora kwoleka ngu niturumirirwa abandi omu buheereza nugwo guha? Ha ekyokurorraho.

⁸ Obuturaaba nitutebeza abantu, kiki ekiratukonyera kwoleka ngu nitubafaaho? Tulengeho kwetegereza entekereza y’abantu turukutebeza n’omulingo barukwehurra kandi tulengeho kubatwaza nk’oku twakugondeze batutwaze. * (Mat. 7:12) Katubazeeho emiringo ena nk’oku tusobora kukikora. Eky’okubanza, tekerezaaho ebyetago bya buli omu nk’omuntu. Obutuba nitutebeza, tuba nitusisana dakitaali. Dakitaali omurungi, atekerezaaho ebyetaago bya buli omu ha barwaire be. Akaguza omurwaire ebikaguzo, kandi ahuliiriza kurungi omurwaire obwaba nasoborra nk’oku arukwehurra. Omu kiikaro ky’okumara gahandiikira omurwaire emibazi, nasobora kubanza kumuha obwire ayesoborreho nukwo dakitaali ayeyongere kwetegereza oburwaire kandi amuhe obujanjabi obusemeriire. Nikyo kimu naitwe, titusemeriire kukozesa omulingo nugwo gumu ogw’okutebeza ha buli muntu wena outurukuba tusangire omu buheereza. Tusemeriire kufaayo ha nyikara n’entekereza ya buli omu nk’omuntu.

9. Ntekereza ki eitusemeriire kwetantara? Soborra.

⁹ Obworatangatangaana omuntu omu buheereza, wetantale kutekereza ngu nomanya ebyarukurabamu, rundi enyikiriza ye n’ensonga habwaki naikiririza omu bintu ebimu. (Nfu. 18:13) Omu kiikaro ky’okutekereza oti, lengaho kukozesa ebikaguzo omu mulingo ogw’amagezi nukwo oyeyongere kumwetegereza n’okwetegereza enyikiriza ye. (Nfu. 20:5) Obukiraaba kitali kibi omu buhangwa bw’ekiikaro eki, mukaguze ebirukukwata ha mulimo gwe, eka ye, ebiyarabiremu, hamu n’entekereza ye. Obutukaguza abantu ebikaguzo, tuba nitusisana nk’abarukubaleka batugambire ensonga habwaki nibetaaga amakuru amarungi. Obutumara kwetegereza ensonga, kitukonyera kwoleka ngu nitufaayo ha byetaago byabo, kandi kituletera kubakonyera nk’oku Yesu yakozere.​—Lengesaniza 1 Abakolinso 9:19-23.

10-11. Kusigikirra ha 2 Abakolinso 4:7, 8, omulingo ogwakabiri ogutusobora kwoleka ngu nitufaayo hali abandi nugwo guha? Ha ekyokurorraho.

 ¹⁰ Ekyakabiri, lengaho kuteramu akasisani omulingo obwomeezi bwabo busobora kuba buli. Nitusobora kusanga nitusisana omu miringo emu. Twijuke ngu ebizibu ebihika hali abantu bandi boona naitwe nibisobora kutuhikaho. (1 Kol. 10:13) Nitukimanya ngu obwomeezi omu businge bunu tibwanguhire. Itwe Yahwe nuwe atukonyera kugumisiriza. (Soma 2 Abakolinso 4:7, 8.) Baitu hati banza otekerezeeho abo abataine enkoragana nungi na Yahwe nk’oku kisobora kuba nikibagumira kuraba omu businge bunu bataine obukonyezi bwe. Nka Yesu, tubakwatirwa embabazi kandi kinu kituletera kubaganaaho nabo “ebigambo ebirungi ebyomugisa.”​—Is. 52:7.

¹¹ Tekerezaaho ekyokurorraho ky’ow’oruganda arukwetwa Sergey. Obwakaba atakegere amananu, akaba muntu w’ensoni kandi atarukubazabaza n’abantu. Tikyamwanguhiraga kubaza n’abantu abandi. Obwire bukahika yaikiriza kwegesebwa Baibuli. Sergey nagamba ati: “Habw’okwega Baibuli, nkakyetegereza ngu Abakristaayo baine obujunanizibwa bw’okutebeza amakuru amarungi. Baitu nyowe nkaba ninyerorra nk’omuntu atarukusobora kutebeza.” Baitu akatekerezaaho abo abatakegesiibwe amananu yarora ngu obwomeezi bwabo bwine kuba bugumire muno habw’okutamanya Yahwe. Sergey nagamba ati: “Ebintu ebihyaka ebinkaba ninyega bikandetera okusemererwa kwingi n’obusinge omu bitekerezo. Nkakirora ngu abandi nabo bakaba nibetaaga kumanya amananu ganu.” Sergey obuyayeyongiire kurumirirwa abandi, obumanzi bw’okutebeza bukeyongera. Sergey nagamba ati: “Ekyampuniriize, kugambiraho abandi ebintu eby’omu Baibuli kikankonyera kuba muntu mumanzi. Kandi kikongera kugumya okwikiriza kwange.” *

12-13. Habwaki tusemeriire kugumisiriza abantu abaturukwegesa omu buheereza? Ha ekyokurorraho.

¹² Ekyakasatu, gumisiriza abantu ab’orukwegesa. Ijuka ngu nibasobora kuba batakatekerezaahoga amananu ag’omu Baibuli, itwe agatumanyire kurungi. Kandi abaingi halubo nibasobora kuba nibagonza muno enyikiriza  zaabo. Nibasobora kuba nibarora enyikiriza zaabo nk’ekintu ekirukubateraniza hamu nk’eka, nk’oruganda, rundi nk’abantu b’ekiikaro kimu. Nitusobora kubakonyera tuta?

¹³ Tekerezaaho ekyokurorraho kinu: Orutindo oburuba rukuzire kandi nibagonza kwombeka oruhyaka, bakora ki? Obwire oburukukira obwingi, obubaba nibombeka oruhyaka, basigaho orukuru nukwo abantu bakozeseege orukuru kuhikya oruhyaka ruhoire. Oruhyaka oburuhwa, orukuzire nubwo barwihaho. Nikyo kimu naitwe, tutakagambiire abantu kuleka enyikiriza zaabo ezibarukugonza muno, tubanze tubakonyere kugonza amananu amahyaka​—ezo nizo enyegesa eza Baibuli ezibaba batamanyire obututandika kwega nabo Baibuli. Obu nubwo kirabanguhira kuleka enyikiriza zaabo ezibabaire nazo. Nikisobora kutwara obwire kurora abantu bakora empindahinduka zinu.​—Bar. 12:2.

14-15. Nitusobora tuta kukonyera abantu abamanyire bike rundi abataine ekibamanyire ha kunihira okw’obwomeezi obutahwaho omu nsi? Ha ekyokurorraho.

¹⁴ Kakuba tugumisiriza abantu abaturukutebeza, titurukwija kubanihirramu kwetegereza rundi kwikiriza amakuru amarungi ha murundi gw’okubanza. Baitu kubarumirirwa nikiija kutuletera kumara akasumi nitubakonyera kutekereza ha Baibuli eky’eyegesa. Ekyokurorraho, tekerezaaho omulingo tusobora kukonyera omuntu kwetegereza omurago ogw’obwomeezi obutahwaho omu nsi empyaka. Abantu baingi bamanyire bike kandi abandi tibaine ekibamanyire ha nyegesa enu. Nibasobora kuba nibatekereza ngu omuntu obwafa kiba kihoire. Rundi nibasobora kuba nibatekereza ngu abantu abarungi boona bagenda omu iguru. Nitusobora kubakonyera tuta?

¹⁵ Gunu nugwo omulingo ow’oruganda akonyera abantu kwetegereza omurago ogw’okwomeera ebiro n’ebiro omu nsi. Abanza kusoma, Okubanza 1:28. Hanyuma akaguza ow’arukutebeza ngu, Ruhanga akaba nagonza abantu baikale nkaha kandi babe n’obwomeezi bwa mulingo ki? Abantu abarukukira obwingi bamugarukamu ngu, “Omu nsi kandi omu bwomeezi oburungi.” Ekihonderaho, ow’oruganda asoma Isaya 55:11 kandi ayongera akaguza ekigendererwa kya Ruhanga obukiraaba kyahindukire. Obwire oburukukira obwingi, omuntu agarukamu ngu nangwa. Ow’oruganda amalirra nasoma Zabuli 37:10, 11 kandi akaguza abantu baliba n’obwomeezi oburukusisana buta omu busumi bw’omu maiso. Akozeseze omulingo gunu kukonyera abantu baingi kurora ngu na hati Ruhanga n’agonza abantu abarungi baikale omu nsi empyaka ebiro n’ebiro.

16-17. Obuturaikara nitwijuka omusingi oguli omu Enfumo 3:27, bintu ki ebiturakora kwoleka abandi ngu nitubafaaho? Ha ekyokurorraho.

¹⁶ Ekyakana, Tekereza ha kintu ekyosobora kukora kwoleka abantu ngu n’obafaaho. Ekyokurorraho, obuturaaba twiziire omu bwire obutasemeriire, nitusobora kusaba ekiganyiro kandi tukaraganiza kugaruka omu bwire obundi obusemeriire. Kandi kakuba omuntu ou turukutebeza aba nayenda obukonyezi ha kalimo akaaliyo nakora? Rundi kakuba omuntu ow’atasobora kuruga omuka habw’okurwaara aba nagonza omuntu w’okutuma kugenda kumugurra ebintu? Omu nyikara nk’ezi, nitusobora kubakonyera.​—Soma Enfumo 3:27.

 ¹⁷ Munyaanya itwe omu akakora ekikorwa eky’embabazi ekikaba nikisisana nk’ekitali ky’amaani baitu kyarugamu ebirungi. Habw’okufaayo muno, akahandiika ebbaruha yagisindikira abazaire abakaba baferiirwe omwana wabo ayafiire ekiro kyonyini ekiyazaliirwemu. Ebbaruha ekabamu Ebyahandiikirwe ebirukuhuumuza. Ebbaruha enu ekakwataho eta eka egi? Nyina w’omwana akagarukamu ebbaruha ya munyaanya itwe nagamba ati: “Ijo mbairege ninyehurra kubi muno. Ebbaruha ey’otuhandikiirege etukonyiirege muno. Timmanyire n’omulingo gw’okukusiima habw’omulingo otuhumwizemu. Ebbaruha yaawe ijo nkagisoma emirundi nka 20. Kimpuniriizege omulingo etuhumwizeemu kandi yatugarramu amaani. Nitukusiima kuruga hansi y’omutima gwaitu.” Hataroho kugurukyagurukya, nikisobora kurugamu ebirungi kakuba tulengaho kwetegereza omulingo abantu barukubonabona kandi tukagira ekitwakoraho kubakonyera.

18. Kusigikirra ha 1 Abakolinso 3:6, 7, kiki ekitusemeriire kwijuka ha buheereza bwaitu, kandi habwaki?

¹⁸ Ky’amananu, nitugonza kukora ekiturukusobora omu buheereza. Nitusobora kukonyera abandi nabo kwega hali Ruhanga, baitu twijuke ngu obujunanizibwa oburukukirayo omu mulimo gunu tibuli bwaitu. (Soma 1 Abakolinso 3:6, 7.) Yahwe nuwe aleeta abantu omu kitebe. (Yoh. 6:44) Kiri hali buli omu kwikiriza amananu rundi kuganga kusigikirra ha kiri omu mutima gwe. (Mat. 13:4-8) Ijuka ngu abantu baingi bataikirize obutumwa bwa Yesu​—kandi kunu omu bantu boona abarabaireho, Yesu nuwe Mwegesa arukukirayo! Nahabweki titusemeriire kuhwamu amaani kakuba abantu baingi abaturukulengaho kukonyera banga kutuhuliiriza.

19. Birungi ki ebirarugamu obuturayoleka ngu nitufaaho abandi omu buheereza bwaitu?

¹⁹ Nikiija kurugamu ebirungi kakuba twoleka ngu nitufaaho abandi omu buheereza bwaitu. Nitwija kweyongera kugonza omulimo gw’okutebeza. Nitwija kutunga okusemererwa kw’amaani okuruga omu kugaba. Kandi obuturakora tuti, abo boona abaine ‘entekereza enungi eyesobora kubaletera kutunga obwomeezi obutahwaho’ nibaija kwanguhirwa kwikiriza amakuru amarungi. (Eng. 13:48) Nahabweki “nukwo obutunyina omwanya tukolege kurungi abantu bona.” (Bag. 6:10) Nitwija n’okutunga okusemererwa habw’okuhaisa Isiitwe ow’omu iguru ekitiinisa.​—Mat. 5:16.