Kuba n’Obwomeezi Obworobere Kireta Okusemererwa
DANIEL NA MIRIAM bakaswerangana omu Sebutemba 2000, bakaba nibaikara omu Barcelona, Spain kandi bakaba nibasobora kwehikyaho buli kimu. Daniel n’agamba ngu: “Habw’emisaara ei twatungaga, twasoboraga kuliira omu ma hoteri amarungi muno, kugenda omu nsi ez’aheeru, n’okujwara engoye eziri ha mutindo. Kandi twatebezaga butoosa.” Baitu haroho ekintu ekyabaireho.
Omwaka 2006, Daniel obwakaba ali omu ruso’rokano orw’ebiro bisatu, akahurra orubazo orukaba rurumu ekikaguzo: “Abantu abarukutaratara nibagenda omu kuhwerekerra nitubakonyera kugaruka ha muhanga ogw’obwomeezi?” (Enfumo 24:11) Omu rubazo oru bakasoborra ngu twine obujunanizibwa bw’okutebeza amakuru amarungi habw’okuba obwomeezi bw’abantu baingi buli omu kabi. (Engeso Ezabakwenda 20:26, 27) Daniel n’aijuka ngu, “Nkarora ngu Yahwe nuwe akaba n’abaza nanyowe.” Kandi orubazo rukongera rwayoleka ngu okusemererwa kweyongera obu twongeramu amaani kuheereza Yahwe. Ekintu kinu Daniel akarora kiri ky’amananu habwokuba akaba n’arora omulingo Miriam akaba aine okusemererwa kwingi habwokuba akaba atandikire ira kukora nka payoniya.
Ekintu kinu kikakwataho muno Daniel kyamuletera n’okurora ngu obwire bukaba buhikire obw’okukora empinduka y’amaani omu bwomeezi bwe. Akatandika kumara obwire buke muno ha mulimo, yatandika kukora nka payoniya, kandi yateramu akasisani kurora omulingo uwe na Miriam bakaba nibagenda kutunga okusemererwa kakuba bagenda nambere hali obwetago bw’amaani.
BAKABANZA BATUNGA OBULEMEEZI —HANYUMA BATUNGA AMAKURU AMARUNGI
Omu 2007 okwezi kwa Maayi, Daniel na Miriam bakaleka emirimo yabo bagenda omu ihanga eri bakaba babungireho ira erikwetwa Panama. Nambere bagenzere kutebeza hakabayo ebizinga bingi nka Bocas del Toro Archipelago omu kinyanja ekirukwetwa Caribbean Sea. Abantu abarukukira obwingi abaikaramu nibetwa Guaymi. Daniel na Miriam bakarora ngu bakaba nibasobora kumara ameezi munaana omu ihanga eri nibakozesa sente ezi bakaba beyahuliire.
Bakozesaga amaato n’amagaali kugenda kutebeza omu bizinga binu. Nahati nibaijuka omurundi gwabo obu bavugire amagaali gabo mairo ezirukuhika omu 20 nibatemba obusozi kandi n’obwire nibwokya. Daniel akajwaha muno kandi akaba ali haihi kukaba. Baitu abantu ababatanganaga babolekaga amakune, kukira muno obu batandikire kwega ebigambo bimu eby’orulimi oru. Omu bwire obuke muno, bakatunga abeegi ba Baibuli 23.
Kiki ekyabaireho obu sente zabahoireho? Daniel n’agamba: “Obu twatandikire kutekereza omulingo tukaba nitugenda kugaruka omu ihanga lya Spain, tukatandika kurra. Tukakwatwa muno enaku habwokuba tukaba nitugenda kusiga abeegi baitu.” Baitu hakarabaho okwezi kumu kwonka batunga amakuru amarungi. Miriam n’agamba: “Bakatufoora batebezi ab’embaganiza. Tukasemererwa muno habwokuba tukaba nitugenda kugumayo.”
OKUSEMERERWA OKU BAKIZIREYO KUTUNGA
Habw’empinduka ezakozerwe omu kitebe kya Yahwe, omwaka gwa 2015, Daniel na Miriam bakemerezebwa balekaho kukora nk’aba payoniya ab’embaganiza. Hati bakaba nibagenda kukora ki? Bakesiga omurago gwa Yahwe ogurukusangwa omu Zabuli 37:5: “Orugendo rwawe oruheyo hali Mukama; kandi omwesigege, aliruhikiriza.” Bakatunga omulimo gw’okukora nukwo gubakonyere kweyongera kukora nk’abapayoniya ab’akasumi koona, kandi hati baliyo nibaheereza omu kitebe ekiri Veraguas, omu Panama.
Daniel n’agamba ngu: “Obu tukaba tutakarugire Spain, tukaba tutarukumanya obu kirasoboka kworobyamu obwomeezi bwaitu. Baitu hati nubwo bwomeezi obu twine, kandi titurukuburwaho kintu kyona eky’omugaso gw’amaani.” Kiki ekikizireyo kubasemeza? Nibagamba: “Kukonyera abantu kumanya Yahwe harugamu okusemererwa okutasobora kuruga hantu handi hoona!”